Hou kerse byderhand tot Saterdag

André de Ruyter (Skermskoot uit perskonferensie)

André de Ruyter, Eskom se uitvoerende hoof, het Dinsdag tydens ʼn perskonferensie gewaarsku dat beurtkrag waarskynlik tot die naweek gaan voortduur.

Volgens hom is daar ʼn nuwe uitdaging wat kop uitgesteek het waar sommige munisipaliteite nie hul kant gebring het in die inwerkingstelling van beurtkrag nie. “Tydens fase 2 was daar verskeie munisipaliteite wat nie volledig voldoen het aan hul verpligtinge wat beurtkrag betref nie. Dit het veroorsaak dat ons nie die verwagte 2 000 MW kon bespaar nie en ons moes die beurtkragfase aanpas.”

Monde Bala, Eskom se uitvoerende hoof van verspreiding het op sy beurt onthul dat slegs twee van die groot metro-munisipaliteite, naamlik Ethekwini (Durban) en Buffalo City (Oos-Londen), ten volle voldoen het aan die opdrag om die nodige beurtkrag toe te pas. Eskom is in gesprek met munisipaliteite en ander grootmaat kliënte om seker te maak dat beurtkrag wel toegepas word volgens die kragvoorsiener se regulatoriese vereistes. Bala het nie die name van die munisipaliteite of kliënte, wat nie aan beurtkragversoeke voldoen het, bekendgemaak nie.

Ander redes wat aangevoer word vir druk op die kragnetwerk sluit in herstelwerk wat voortduur by die Medupi-kragstasie (ná ʼn ontploffing in Augustus), ʼn brand by die Kendal-kragstasie in September en onderbrekings by ander eenhede wat die netwerk onder uitermatige druk geplaas het. Dieselvoorraad is aangevul by Gourikwa, maar ʼn landswye gebrek aan dieselvoorraad het ʼn negatiewe impak gehad op Ankerlig-kragstasie. Volgens De Ruyter duur dit ook minstens ses weke vanaf die dag wat diesel bestel word totdat dit afgelewer kan word.

Vooruitsig vir beurtkrag

Volgens hom sal verskeie eenhede egter deur die loop van die week aangeskakel word en indien alles vlot verloop is die verwagting dat beurtkrag fase 3 van Woensdagoggend om 05:00 sal geld tot Vrydagoggend om 05:00. Fase 2-beurtkrag sal na verwagting dan ingestel word tot Saterdagoggend om 05:00, en beurtkrag sal moontlik daarna opgehef word.

De Ruyter voeg by hy begryp dat beurtkrag ʼn groot ongerief is en die kragvoorsiener vra om verskoning vir enige negatiewe impak op ondernemings, bedrywe en veral matrikulante wat met hul eindeksamen besig is. “Ons vra verbruikers om ook hul rol te speel om die aanvraag te verminder deur byvoorbeeld geysers en swembadpompe af te skakel. Daar is talle stappe wat ons kan doen om die aanvraag behoorlik te bestuur.”

Herstelwerk by Medupi-eenheid 4

Jan Oberholzer, bedryfshoof van Eskom, het gewaarsku dat eenheid 4 by die Medupi-kragstasie, wat sowat 720 MW aan die netwerk verskaf, waarskynlik vir 18 tot 24 maande buite werking gaan wees ná die ontploffing in Augustus.

Oberholzer het gesê die ondersoek is byna afgehandel, maar die omvang van die skade is nog nie bepaal nie. Die ondersoek het wel onthul dat die ontploffing weens ʼn menslike fout plaasgevind het.

Volgens die kragvoorsiener se voorlopige ondersoek na die voorval het die ontploffing plaasgevind tydens die proses om waterstof met onderskeidelik koolstofdioksied en lug te verplaas ten einde ʼn eksterne lekkasie te vind. Dit blyk dat lug tydens die uitvoering van dié aktiwiteit in die kragopwekker ingebring is in ʼn stadium waar daar nog meer as 35% waterstof in die opwekker was. Volgens regulasies moet minder as 5% waterstof in die opwekker wees voor koolstofdioksied bygevoeg kan word. Dit het dus ʼn plofbare mengsel gevorm wat aan die brand geslaan en tot die ontploffing gelei het.

Ontploffing by Kendal

Oberholzer het gesê die brand by Kendal-kragstasie het ook ʼn verlies van 640 MW beteken op die kragnetwerk. Herstelwerk duur voort en die eenheid sal na verwagting in die middel van Desember weer aan die kragnetwerk gekoppel word.

Oor uitvoerende hoofde se afdankings

Oor versoeke deur onder andere metaalvakbond Numsa dat De Ruyter en Oberholzer die trekpas moet kry, het De Ruyter gesê dit is belangrik om in gedagte te hou dat Eskom se uitvoerende lede deur die raad aangestel word; die raad word op sy beurt deur die minister van openbare ondernemings aangestel en die minister word deur die president aangestel. “Ons het geen só gesprek gehad oor die moontlikheid van afdankings nie en ek is ook nie van voornemens om self te bedank nie,” het hy gesê. “Mens kan die jokkie op ʼn dooie perd vervang, maar dit gaan nie die situasie verander nie. Dit is in hierdie stadium belangriker om die kontinuïteit van bestuur te behou as om net weer in die strik te trap deur 11 verskillende hoofde te hê wat grootskaalse onstabiliteit in die organisasie veroorsaak het. Ons begryp die frustrasie dat ons nie ons teikens haal nie, maar die probleem gaan nie opgelos word om in hierdie stadium die perd of die jokkie te verander nie.”

Oor ʼn moontlike algehele ineenstorting van die netwerk

De Ruyter het in reaksie op ʼn vraag of ʼn algehele ineenstorting van die netwerk ʼn moontlikheid is, dit ontken. “Ons is nie op die randjie van ʼn algehele ineenstorting nie. Ons het die beste operateurs wat die stelsel baie goed en deeglik bestuur.”

Oberholzer het bygevoeg dit is baie gevaarlik om sulke gerugte te versprei.

Volg die volledige perskonferensie hier:

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

24 Kommentare

jongste oudste gewildste
Blikke

Well said Mr de Ruyter…..vervang die jokkie op die dooie perd en sien waar kom julle!!! Ek ondersteun jou 100%

BARNEY

Ons hoor net heeltyd verskonings, Mnr wonderlik het nie n verskil gemaak nie! Meskien moet n sterk peraoon met ondervinding in krag opwekking en verspreiding maar ingevoer word, en heraanstelling van al die kundige ingeneurs en ambagsmanne

Theresa

Ek haal my hoed af vir Andre de Ruyter en Jan Oberholzer. Sterkte aan die personeel van Eskom wat onder groot druk moet werk en wil werk.

Willempie

” Ons het die BESTE operateurs wat die STELSEL baie goed en deeglik bestuur ” HUH hello fase 4

Esme

Die Andre de Ruyter wat ek ken, staan nie terug vir uitdagings nie. Daar is soveel bydraende faktore en die Metro’s ondersteun nie Eskom nie – ek sien dit daagliks en ja, beurtkrag is ‘n groot uitdaging vir ons almal en ek glo dat Andre en Jan se huishoudings ook daardeur geraak word.