Huis Davidtsz: Bejaardes lê hulpeloos weens onrus

Huis Davidtsz

“Jy kan nie bejaardes slagoffers maak van arbeidsonderhandelinge wat misluk nie, dit is fataal.”

Só sê Hannes Noëth, hoof van Solidariteit Helpende Hand, nadat die organisasie saam met die polisie tot omstreeks 23:00 Woensdag sonder welslae met stakers probeer onderhandel het om toegang te verkry tot die sowat 150 inwoners van die tehuis vir bejaardes in Pretoria se middestad.

Sekere werkers het die tehuis beset en van die ander personeel belet om die perseel te betree. Dit volg glo nadat daar ʼn skorsingskennisgewing aan drie personeellede uitgereik is.

Huis Davidtsz was ook in Maart vanjaar in die nuus nadat betogers van die EFF amok by die tehuis, met geriewe vir verswakte sorg, gemaak het.

Betogers het toe ook van die personeel uitgejaag en geweier dat enigiemand terug in die gebou gaan om na die bejaardes om te sien totdat daar aan hulle eise vir beter salarisse voldoen word.

Personeel van Helpende Hand by Huis Davidtsz. Foto: Verskaf

Noëth het aan Maroela Media bevestig die stakers is tans nie gewelddadig nie. Die bestuur van die tehuis, op die hoek van Schubart- en Johannes Ramokhoasestraat, het Donderdagoggend met die personeel begin onderhandel om die situasie te ontlont.

Die stakende personeel voer steeds aan hulle ontvang nie genoeg betaling nie. Hulle eis verhogings en beter werksomstandighede.

“Ek het begrip vir die bestuur en klagtes van die personeel, maar die probleem is die bejaardes is nou die slagoffers van die geskil. Ons moet nugter dink, daar is talle ou mense met Alzheimer- en Parkinson se siekte, bejaardes wat bedlêend is of van medikasie afhanklik is.

Personeel van Helpende Hand by Huis Davidtsz. Foto: Verskaf

“My vraag is waar die departement van gesondheid en welsyn in hierdie geval is,” het Noëth gesê.

Maroela Media het intussen ontstellende boodskappe van bejaardes binne die tehuis ontvang wat aanvoer hulle lê sedert 20:00 Woensdag met vuil doeke en kateters wat gebars het en nog nie geruil is nie.

Noëth het gesê ʼn span van Helpende Hand se personeel, asook Kerksondermure staan gereed om die bejaardes in Huis Davidtsz te versorg.

Volgens Noëth het hulle kort ná 10:00 Donderdag ʼn skrywe gekry met toestemming om die terrein te betree en te gaan help. Hy het gesê daar sal onmiddellik middagete en versorging vir die inwoners gereël word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

36 Kommentare

jongste oudste gewildste
AmY

Nee!!!

Nettie

My liewe …………………………..

Hierdie stakers en anargiste (lees: EFF) het die hele land aan die kortetjies beet! Genade, waar is die Polisie, of lê en slaap hulle agter hul lessenaars, soos (meesal) die geval is? Wat het geword van privaat eiendomsreg? Hulle betree mos privaat-eiendom, nie waar nie? Dan moet hulle gearresteer word vir betreding en saakbeskadiging.

En indien een of enige van daardie arme, ou, hulpelose bejaardes sterf in dié tyd, moet ALMAL, deur die bank ALLE STAKENDES, aangekla word van moord en hulle HPCSA-lidmaatskap summier verbeur word.

Under Siege

Dit is ‘n baie ernstige misdryf, om ‘n groep mense under siege te plaas.

Lientjie

As hulle nie tevrede is met hulle salaris tans nie dan soek jy maar ander werk met ‘n beter salaris.

Ek sal help

Ek sal help om die mense te bevry, dit is teen internasionale wette om die wat toegang na hulle soek te keer. Ek sal inbeweeg en die wat my keer sal teenstand ontvang.