Huldeblyke ná diereliefhebber sterf terwyl hy help

Pieter Prinsloo. Foto: Facebook

Huldeblyke stroom in vir ʼn inspekteur van die Helderberg-dierewelsynsvereniging in Kaapstad wat doodgery is terwyl hy beeste langs die N2 naby Gordonsbaai van die pad probeer weghou het.

Volgens die dierewelsynsvereniging is Pieter Prinsloo (45) Donderdagaand dood. Sers. Noloyiso Rwexana, woordvoerder van die polisie, het gesê ʼn saak van strafbare manslag, asook bestuur onder die invloed van alkohol word ondersoek.

Volgens Rwexana is Prinsloo omstreeks 19:00 raakgery en ondersoek die polisie die omstandighede rakende die voorval. Prinsloo is op die toneel dood.

Die dierewelsynsvereniging het gesê hy is platgeslaan oor Prinsloo, wat in Desember 2010 by die vereniging aangesluit het, se dood.

“Hy was van die begin af passievol oor sy werk en was tot met sy dood amptelik aan diens,” het Julia Evans, voorsitter van die Helderberg-dierewelsynsvereniging, gesê.

“Hy het elke oggend vroeg sy huis verlaat en was nog tot laataand met noodgevalle besig. Geen krisis was te groot vir hom nie.” Volgens Evans het Prinsloo talle beseerde diere gered, agter hulle aangehardloop om hulle veilig te kry, saam met die brandweer en veiligheidsmaatskappye gewerk om katte wat in bome vasgekeer was te red en hondegevegte stopgesit.

“Hy kon soggens meestal gevind word waar hy diere op straathoeke in die Strand gevoer het. Pieter was ʼn man wat toegewy was aan sy werk. Hy het ure in landdroshowe deurgebring waar hy vir die regte van diere geveg het.”

Volgens Evans het Prinsloo sy jong dogter, Nadine, bo als die liefste gehad. “Ons medelye aan sy familie en sy jong dogter. Mag jy in vrede rus en ons salueer jou.”

Rwexana het intussen bevestig dat ʼn 36-jarige man in verband met die voorval in hegtenis geneem is en Dinsdag in die Strand-landdroshof sal verskyn.

 

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

13 Kommentare

jongste oudste gewildste
Johanna

Dis n groot verlies. Rus in Vrede Pieter Prinsloo. innige simpatie met die familie.

Anoniem

So jammer dat so n passievolle persoon so moet sterf. Daar is so min mense wat veg vir diereregte, en hul lewens toewy tot hierdie werk! Jammer vir sy gesin en familie.

Grant

Ek het steeds nie woorde nie. My hart is stukkend vir sy familie, vir die gemeenskap wat hy gedien het en vir elke dier aan wie se lewe hy nog ‘n verskil kon maak. Hy is wreed weggeneem en die blomme op die toneel is nou slegs ‘n stille herinnering aan die held wat daar gesterf het. Strafbare manslag en bestuur onder die invloed….mag hier asseblief geregtigheid geskied vir ‘n klein bietjie troos vir die wat agterbly. Saluut en Rus in Vrede Pieter Prinsloo. Jy laat ‘n reuse leemte by Helderberg Animal Welfare.

Louna

Wat gebeur met die eienaar van die diere wat reg langs ‘n snelweg wei? Ek sal graag wil weet wat die reg sê hieroor. Daardie diere is amper elke dag langs die pad en nog mense sal sterf as gevolg hiervan.

Erica

‘n Held het gegroet. My opregte simpatie met al sy geliefdes en almal by Helderberg Dierewelsynsvereniging. Mense soos Pieter Prinloo is dun gesaai.