Hulp benodig by tehuis ná personeel begin staak

Residentia Moria-aftreeoord in Krugersdorp (Foto: Verskaf)

Vrywilligers het ingespring om te help nadat ʼn groot aantal van die personeellede van die Residentia Moria-aftreeoord in Krugersdorp Woensdagmiddag op ʼn onbeskermde staking gegaan het.

Dit is glo omdat dié personeellede ontevrede is oor die instelling se Covid-19-protokol.

Volgens Joe Duvenage, uitvoerende hoof van die Residentia Moria-groep, het die departement van gesondheid, die departement van sosiale ontwikkeling en die instituut vir oordraagbare siektes tydens ʼn inspeksie by die oord bevestig dat die groep se protokolle meer as voldoende is.

Duvenage het aan Maroela Media gesê dat versorgers, skoonmakers en kombuispersoneel Woensdagmiddag die werkplek verlaat het en Donderdag nie weer vir werk opgedaag het nie. Hulle het selfs aan die bestuur ultimatums gestel.

“Ons arbeidskonsultant is reeds in gesprek met die unies. Die stakende personeel is sover vreedsaam en rustig,” sê Duvenage.

Die tehuis het Donderdag vrywilligers se hulp gevra om na die nagenoeg 100 inwoners te help omsien in verskeie fasette van versorging in die tehuis. Duvenage sê ongeveer 60 van dié inwoners is verswak en benodig volledige 24 uur sorg.

Die stakende personeel is sover vreedsaam en rustig (Foto: Verskaf)

“Vrywilligers van die publiek, Solidariteit Helpende Hand, ons eie bestuurspan en bykomende personeel het ingespring om te help. Ons het nou soveel hande moontlik nodig. Ek kan wel sê ons inwoners ontvang steeds die nodige versorging te midde van die staking. Hulle is ons eerste prioriteit,” sê hy.

Solidariteit Helpende Hand het sy streekskoördineerder en ’n maatskaplike werker na die tehuis gestuur om die situasie te evalueer en om met die bestuur te vergader.

Antoinette Deysel, Solidariteit Helpende Hand se adjunk- uitvoerende hoof van gemeenskapsontwikkeling, het Donderdag gesê Helpende Hand gaan saam met die tehuis se bestuur werk om hulp te koördineer sodat die bejaardes die sorg kry wat hulle benodig. AfriForum is ook tans by die perseel om veiligheid by die ouetehuis te verseker.

Mariette van de Werken, Helpende Hand se streeksorganiseerder van Gauteng-Suid, is by die tehuis en sê Helpende Hand is reeds besig om ’n lys op te stel van vrywilligers in die omgewing om met basiese take by die ouetehuis te help. Helpende Hand gaan ook probeer om professionele versorgers gereed te kry om met die meer gevorderde versorging te help.

Hannes Noëth, besturende direkteur van Helpende Hand, sê Solidariteit Helpende Hand het onderneem om die tehuis by te staan met die versorging van die bejaarde inwoners.

“Helpende Hand veroordeel die gedrag van die personeel wat in tye soos dié verswaktes onversorg laat ten sterkste. Dit is harteloos, koud en onverdedigbaar. Dit is ’n gemeenskap se roeping om na ons bejaardes en verswaktes om te sien. Personeel wat in sulke omstandighede staak se optrede moet ten sterkste veroordeel word,” sê Noëth.

Duvenage sê hulle is dankbaar vir al die hulp wat hulle reeds ontvang het. “Daar kom darem iets goeds uit hierdie slegte situasie. Die vrywilligers is ons goue randjie,” sê hy.

Lede van die publiek wat ʼn hand wil bysit om as ʼn tydelike vrywilliger by die tehuis te help, kan ʼn e-pos stuur na [email protected] of haar by 071 548 8013 bel.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

14 Kommentare

jongste oudste gewildste
Anel

As hulle nie die werk wil doen nie, hoekom bedank hulle nie? Niemand dwing hulle om daar te werk nie. As hulle staak, gaan dit nie oor die werk nie. Vir hulle gaan dit mos net oor die geld en ” it is a job”.

Elmarie

Mens wil ampers sê wie het die dekselse werkers nodig as daar Afriforum en ander vrywilligers is. Ongelukkig werk dit nie so nie, maar ja, wat ‘n absolute skande man!

Liana

Daar is ‘n vrot appel in die mandjie wat almal beinvloed.

Pieter

Begin met her-struktrurering van tehuis se personeel en laat almal weer aansoek doen vir hul poste. Die dooie hout kan dan maklik uitgekap word.

Snowball

Dalk is daar vrywilligers wat soek na werk. Stel hulle aan en dank dié sleepvoet goed af wat staak. Laat hulle loop UIF trek en by die huis lê. Hulle sal eerder in toue staan v “grants” as wat hulle werk.