Identiteit van HuffPost-blogger bekend

Huffington Post SA (Foto: Facebook/HuffPost SA)

Die ware identiteit van Shelley Garland, die skrywer van die omstrede blog wat deur die Huffington Post geplaas is en wyd kritiek ontlok het, is Woensdag bekendgemaak.

Shelley Garland is eintlik Marius Roodt (37), ʼn navorser by die Sentrum vir Ontwikkeling en Onderneming (CDE) in Johannesburg. Sy ware identiteit is in ʼn berig deur Huffington Post bekendgemaak.

Roodt het ʼn blog getiteld “Could it be time to deny white men the franchise?” aan Huffington Post gestuur onder die skuilnaam Garland en hom voorgedoen as ʼn MA-student by die Universiteit van Kaapstad. In die stuk word aangevoer dat wit mans hul stemreg vir 20 tot 30 jaar ontneem moet word ten einde wanbalanse reg te stel.

Die artikel bevat verskeie feitefoute, soos dat wit mense 90% van die land se rykdom besit,  wit mans 97% van die Johannesburgse Aandelebeurs besit en 90% van Amerikaanse bates deur 10% van Amerikaners besit word. Daar word ook gesê dat wit mans die skuld moet dra vir Brexit en pres. Donald Trump se oorwinning.

Die artikel het wyd opslae gemaak en is gevolg deur ʼn opvolgartikel waarin Verashni Pillay, die redakteur van The Huffington Post SA, die besluit om die stuk te plaas verdedig het. Nadat dit egter aan die lig gekom het dat Garland nie werklik bestaan nie, is die blog van Huffington Post se webwerf verwyder.

Huffington Post het Woensdag ʼn berig geplaas oor sy ontmoeting met Roodt by CDE. Volgens die berig het Roodt met Huffington Post se aankoms by die kantoor gevra of hy ʼn prokureur moet kry. Roodt het ook Woensdagmiddag uit sy pos by CDE bedank. “Ek raai ek sal seker moet bedank. Ek sal seker maar onder die radar beweeg,” het Roodt gesê.

Roodt het tydens die vergadering met Huffington Post gesê hy was aanvanklik in sy skik toe Huffington Post die blog geplaas het, maar het nooit besef dat die kwessie so groot sou raak nie. “Ek het gedink jy kan amper enigiets sê wat jy wil … nie noodwendig wit mans aanval nie. Ek dink daar is ʼn gebrek aan die nagaan van feite in Suid-Afrikaanse joernalistiek. Ek het gedink, kan dit werk? En dit het gewerk,” het hy gesê.

Roodt het gesê hy is jammer oor wat gebeur het, maar glo ook die opslae wat die blog veroorsaak het, kan lei tot ʼn debat oor rasseverhouding en joernalistieke etiek wat na sy mening ʼn goeie ding is.

Pillay het Woensdag ʼn berig in reaksie op haar ontmoeting met Roodt geplaas en gesê sy was nie kwaad toe sy hom ontmoet het nie, maar eerder hartseer. “Hartseer omdat hy met die eerste oogopslag lyk soos iemand met wie ek vriende kan wees. Maar meestal hartseer dat die voorval onder my leiding gebeur het.”

Pillay verduidelik verder in haar skrywe dat wat Roodt gedoen het verkeerd is, maar dat dit haar nie kwytskeld nie.

“In my strewe om mense sover te kry om te verstaan dat voorreg bestaan, dat swart pyn ʼn werklikheid is en witheid ʼn onregverdige norm, het ek dit nie in my skrywes oor hierdie kwessie duidelik gemaak hoekom dit nodig is nie. Want ek glo in genesing. Dit is uiteindelik wat ek wil hê ons as land moet nastreef in ons rasseverhoudinge. Maar om tot daar te kom, het ek gevoel ons moet baie eerliker met mekaar wees oor ons onderskeidelike pyn en voorreg as swart en wit Suid-Afrika as wat ons voorheen was.”

Intussen het die burgerregte-organisasie AfriForum Dinsdag bevestig dat hy The Huffington Post SA en Pillay by die persombudsman aangekla het. Pillay het gesê Huffington Post wag op die beslissing van die persombudsman en sal die bevinding op die nuuswebwerf plaas saam met maatreëls wat hulle in staat sal stel “om hul stelsels te versterk”.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

55 Kommentare

jongste oudste gewildste
Cryosphear

Onnoselheid

Wil dit seg

Maar Pillay is nie hartseer omdat sy die artikel se anti-wit haatspraak teenoor mans verdedig het nie.

M.i. is dit glad nie nodig vir Roodt om te bedank nie.

Reinette

G’n niks jammer nie… jammet hulle is uitgevang. Punt.
As ons nou almal sulke sotlikhede kwytraak? Daar is iets soos sosiale aanspreeklikheid. Die pers het tog n etiese kode wat hulle moet volg?

Lourens

Hoe is n wit vel onregverdige norm?

Bert

“Witheid”. Moet ek lag of moet ek huil?