Ingrypende besluit oor drank in Matie-koshuise

(Argieffoto)

Die bestuur van die Universiteit Stellenbosch het beslis dat geen alkohol voortaan op die perseel van enige universiteitskoshuis verkoop of verskaf mag word nie.

Pieter Kloppers, direkteur van die sentrum van studentegemeenskappe, het gesê daar was ook ʼn verdere versoek van Studentesake om die gebruik van alkohol in en op die perseel van universiteitsakkommodasie tydelik te beëindig, terwyl daar oor reëlings ooreengekom word wat die gebruik van alkohol daar sal reguleer.

“Die bepalings in die koshuisreëls wat tans toestemming tot verbruik van alkohol reël, het oor tyd heen probleme begin veroorsaak. Dit is gepas dat daar in die lig van die US-bestuur se besluit ook aandag gegee word aan die aanpassing van die reëlings in verband met gebruik om daarmee die kultuur van drankgebruik soos dit tans neerslag vind, positief te beïnvloed,” het Kloppers in ʼn verklaring gesê.

“In die proses sal die hantering van alkohol in universiteitsakkommodasie op ander universiteite se kampusse ook in ag geneem word. Die meeste universiteite laat nie drankverbruik in koshuise toe nie.”

Verskeie US-koshuise het klein kroegies wat grootliks tydens spesiale geleenthede gebruik word.

Leandró Hopley, ʼn B Com-student aan die universiteit en inwoner van Huis Visser, is vroeër vanjaar dood nadat sy lewensondersteunende toerusting afgeskakel is. Luidens berigte was Hopley moontlik deel van ʼn drinkspeletjie wat gespeel is en het hy ophou asemhaal.

In nóg ʼn voorval is Anzel Slimmers ernstig beseer toe hy glo by ʼn venster van die Huis Marais-manskoshuis uitgeval het. Slimmers was nie ʼn inwoner van die koshuis nie en het ʼn vriend daar besoek.

Robert Kucera, ʼn HK-lid van Dagbreek-manskoshuis, het gesê die sogenaamde drinkkultuur is wél ʼn kwessie wat met mening by die universiteit gepak behoort te word. Hy glo egter nie dié besluit is ʼn stap in die regte rigting nie en sê dit gaan drankgebruik bes moontlik net ondergronds dryf.

“Ek dink ʼn kampuswye verbod is ʼn oorvereenvoudigde en kortsigtige oplossing vanaf bestuurskant,” het Kucera gesê.

“ʼn Drankverbod werk nie, dit gaan nie die drinkkultuur verminder nie. Ons is nie gelukkig met die besluit nie: Nie omdat ons nie kan drank gebruik nie, maar omdat pogings om die kultuur van drankmisbruik te pak nou onder die mat gevee word.”

Kucera het gesê daar moet oor die kultuur wat oor die jare toegelaat is om in veral manskoshuise by die universiteit pos te vat, herbesin word. “Daar was ʼn houding [van die US-bestuur] dat koshuise gelaat is om te maak wat hulle wil en dat die bestuur van die koshuise in die hande van studenteleiers gelaat is.

“Nóú, wanneer ʼn groot besluit gemaak word, veto hulle alles.”

Kucera meen die universiteit behoort ook nouer betrokke te wees by koshuise.

Hugo Kirchner, primarius van die Helshoogte-manskoshuis, stem ook nie saam met ʼn algehele verbod nie, maar verwelkom óók planne om werk te maak van drankmisbruik. “Die probleem is nie ʼn onskuldige bier op die dek of in ʼn kamer saam met ʼn pêl nie, dit is die gevalle waar dit handuit ruk,” het hy gesê.

Hy het gesê ʼn vorm van regulering kan moontlik help om die probleem hok te slaan. Soos wat daar toegewysde rookareas is, kan dieselfde beginsel moontlik geld vir plekke waar studente toegelaat word om ʼn drankie te drink.

Kirchner het gesê dit is ʼn emosionele kwessie wat behoorlik deurgetrap moet word en dat gesprekke tussen die universiteitsbestuur en studentegemeenskappe deurslaggewend gaan wees om die probleem te pak.

Die universiteit het voorts in sy verklaring gesê al die stappe wat gevolg moet word vir ʼn reëlverandering is nog nie gedoen nie. Dit is egter die verwagting dat dit wel in die nabye toekoms afgehandel sal word en tot die nodige reëlverandering met ingang van 2020 sal lei, het die verklaring gelui.