Inhuldiging van president ‘gaan peperduur wees’

loftus6

Loftus Versfeld

Ten spyte van die land se ekonomiese toestand en armoedevlakke het die presidensie aangekondig dat die inhuldiging van die land se nuutverkose president op 25 Mei die grootste en duurste in die geskiedenis gaan wees.

Boonop gaan munisipaliteite – waarvan die oorgrote meerderheid nie genoeg geld het om behoorlike dienste te lewer nie – miljoene rande betaal om inwoners van reg oor die land na die Loftus Versfeld-stadion in Pretoria te vervoer sodat die sitplekke darem vol is – wat beteken huisvesting en kos gaan ook uit die sukkelende munisipaliteite se beperkte geldbronne moet kom.

Die presidensie het opdrag gegee dat 2 000 mense uit elk van die nege provinsies na Pretoria gebring moet word om die stoele vol te sit en dat munisipaliteite daarvoor moet betaal. Daar is tans geen aanduiding dat opposisiebeheerde munisipaliteite so ʼn opdrag sal uitvoer nie.

Wat dit alles gaan kos, is tans onseker, maar dit gaan duur wees. Loftus Versfeld het sitplek vir 51 762 mense. In 2014 het minder as 10 000 mense oudpres. Jacob Zuma se inhuldiging by die Uniegebou bygewoon.

Volgens die DA kan die inhuldiging belastingbetalers maklik R120 miljoen uit die sak jaag.

Oudpresidente Nelson Mandela en Thabo Mbeki is ook by die Uniegebou ingehuldig in min of meer soortgelyke seremonies as Zuma s’n, hoewel Mandela baie meer internasionale hooggeplaastes getrek het.

Oudpres. Kgalema Motlanthe en pres. Cyril Ramaphosa is albei sonder fanfare of veel onkoste by Tuynhuys in Kaapstad ingehuldig. Die laaste president in die vorige bedeling, FW de Klerk, se inhuldiging was sonder koste of vertoon in die NG Kerk Universiteitsoord in Pretoria.

Volgens die presidensie vind vanjaar se inhuldiging op Loftus Versfeld plaas om groter openbare deelname te verseker. Daar is ook ʼn tema vir die hele spoggerige affêre: “Ons vier almal saam 25 jaar van vryheid, hernuwing en groei vir ʼn beter Suid-Afrika.”

Die DA het by monde van sy hoofsweep, John Steenhuisen, en sy leier in die nasionale raad van provinsies, Cathy Labuschagne, gesê die idee is geldmors – geld wat ʼn beter lewe vir die land se armes kon help skep.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

46 Kommentare

jongste oudste gewildste
AmY

Liewe genade!!!

Alida

Beter lewe vir wie? Net die parlementslede leef in weelde. Hulle eie our people brand die land af oor beloftes wat 25 jaar gelede gemaak is en niks gekry het nie. As mens mooi dink kan mens hulle ook nie verkwalik nie. Die vandalisme is baie sleg. Hulle “rent a croud” om alles te verwoes. Wat as CR nie inkom nie en Mmaine wen gaan daai geld nog beskibaar wees. Kom ons wag en kyk.

Theresa

Ag vaderland… vir entertainment sal daar altyd geld wees maak ni saak hoe sleg dit in die land gaan nie. Miljoene word gemors vir 1 dag van “plesier”

Bloudrom

Die mense wat belangstel kan dit mos op televisie kyk.

Niccy

Land van melk en heuning vir sekere mense.