Inperkings nie die antwoord nie, sê organisasies

Argieffoto (Foto: congerdesign/Pixabay)

Verskeie organisasies het reageer ná pres. Cyril Ramaphosa se aankondiging Dinsdagaand dat Suid-Afrika weer na koronavirusvlak 3 terugskuif as gevolg van ʼn skerp styging in gevalle die afgelope twee weke.

Ramaphosa het gesê minstens vier van die provinsies is reeds in die derde golf van die Covid-19-pandemie.

Solidariteit

Flip Buys, voorsitter van die Solidariteit Beweging, het gesê die regering moet aanspreeklikheid aanvaar vir die katastrofiese gevolge van die derde golf.

“Die regering se entstofprogram is ʼn totale mislukking. Suid-Afrika se entstoftoedienings is 10 keer minder as die gemiddeld van die wêreld. In al hierdie tyd is geen nuwe kapasiteit geskep nie.”

Buys het gesê daar is inteendeel minder kapasiteit as vorige golwe. “Inperkings wat nou deur die regering ingestel word, is ʼn desperate poging om ʼn krisis, wat deur die regering se eie onbeholpenheid geskep is, te bestuur. Dit was geen familievergadering van ʼn pa wat omgee nie. Die pa het die familie in die steek gelaat. In hierdie stadium lyk dit selfs of die regering nie eers entstofverligting vir die vierde golf gereed gaan hê nie.”

VF Plus

Dr. Pieter Groenewald, leier van die VF Plus, meen daar moet eerder gefokus word op die toepassing van gesondheidsprotokolle as om die aandklokreël te verleng, veral by taxi’s.

“Die restaurantbedryf word benadeel en een uur maak ʼn groot verskil aan inkomste. Dit sal boonop nie die verspreiding van die virus verminder nie.” Groenewald sê die virus versprei nie in die laaste uur wat ʼn restaurant oop is nie.

Groenewald voeg by die president moet nie nou skuil agter probleme met die verspreiding van entstowwe nie. “As hulle van die begin af betyds opgetree het, sou die aantal inentings in hierdie stadium reeds baie meer gewees het.”

AfriForum

Barend Uys, hoof van navorsing by AfriForum, sê Ramaphosa se “verbeeldinglose toespraak” waarin hy vlak 3-inperkings aangekondig het maak dit duidelik dat doeltreffende vroeë behandeling en voorkoming met behulp van heraangewende medisynes soos ivermektien steeds nie op die regering se agenda is nie.

“Dit is ten spyte daarvan dat oorweldigende wetenskaplike bewyse bestaan dat dit lewens kan red en infeksies kan voorkom – boonop op bekostigbare wyse. Die data wys dat inperkings wat ondernemings en werksgeleenthede vernietig nie ’n noemenswaardige impak op die verloop van infeksies het nie.”

Uys sê die tyd het aangebreek dat die regering ook ander oplossings in werking stel om die Covid-19-pandemie die hoof te bied. “Voorkoming en vroeë behandeling met ’n kombinasie van medisynes, wat ivermektien insluit, kan infeksie voorkom, verhoed dat hospitale onder druk geplaas word en kan ook lewens red. Ons moet gelyklopend verskillende stappe doen om Covid-19 te beveg – stappe wat daarop gemik is om nadelige gevolge vir die ekonomie te voorkom.”

Demokratiese Alliansie

John Steenhuisen, leier van die Demokratiese Alliansie, het gesê die inperkings wat die president ingestel het, is slegs nodig omdat sy administrasie versuim het om ʼn voldoende voorraad entstof te bekom, versuim het om ʼn doeltreffende inentingsveldtog te ontwerp en in werking te stel en ʼn versuim om gesondheidsorgkapasiteit uit te bou.

“As hulle betyds die entstowwe bekom en toegedien het, sou mense se lewens en lewensbestaan tydens die derde golf beskerm gewees het. Nou gaan Suid-Afrikaners onnodig verliese ly.”

Steenhuisen sê sommige mense sal met hul lewens boet vir die regering se versuim, ander sal geliefdes verloor en talle sal hul inkomste verloor. “Almal se lewens sal ontwrig word – van kinders wat nie sal kan skool toe gaan nie en voedingsprogramme en sportaktiwiteit by die skool sal misloop, tot die verlies aan kosbare tyd saam met vriende en familie. Dit is alles weens ʼn regering wat nie vir sy mense omgee nie, wat onbekwaam en korrup is.”

Die DA het ʼn omvattende parlementêre ondersoek versoek oor die regering se hantering van die entstofprogram.

Steenhuisen voeg by selfs in die afwesigheid van ʼn suksesvolle inentingsprogram kon talle van die beperkings voorkom word as ander provinsiale regerings genoeg hospitaalbeddens, suurstof en menslikehulpbronkapasiteit verseker het om diegene te red wat dit nodig het.

“Die DA en die Wes-Kaapse premier, Alan Winde, het deurlopend versoek dat daar ʼn doelgemaakte benadering moet wees afhangend van ʼn provinsie se gereedheid en dat provinsies meer mag moet hê om hul eie reaksie te bepaal. Die Wes-Kaap het genoeg hospitaalkapasiteit opgebou om seker te maak dat almal wat behandeling benodig om hul lewe te red, dit sal kry. “[Die Wes-Kaap] behoort dus nie aan dieselfde beperkings onderwerp te word as ander provinsies wat nie ʼn poging aangewend het om kapasiteit op te bou nie.”

Steenhuisen sê talle van die beperkings is ondoeltreffend en word slegs ingestel om ʼn illusie te skep dat iets gedoen word.

“Alhoewel die beperkings wat ingestel is grootliks onnodig is, is dit noemenswaardig dat die regering se reaksie op die derde golf nie naastenby so erg is soos hul hardhandige reaksie op die eerste en tweede golf nie. Dit is ʼn duidelike bekentenis dat die DA in April 2020 reg was om ʼn einde te versoek aan ʼn harde inperking wat die land na raming R13 miljard per dag gekos het en miljoene mense in hongersnood en armoede gedompel het.

“Soveel lewens en mense se lewensbestaan sou gered gewees het as die DA nasionaal aan bewind was tydens dié pandemie. Want anders as die ANC, kry die DA goed gedoen.”