Internasionale optogte teen plaasmoorde: ‘SA regering kry dalk van hul eie medisyne’

Die optog in Perth in Australië (Foto: Facebook)

Wat is die impak van die talle internasionale protesoptogte wat nou opnuut die kollig op plaasmoorde in Suid-Afrika plaas? Vestig dit die wêreld se aandag op die probleem en kan dit regtig druk op die Suid-Afrikaanse regering plaas om enige iets te doen?

Maroela Media het met politieke kenners gesels om meer hieroor uit te vind nadat sowat 3 000 betogers Sondag weer in Perth, Australië, byeengekom het om ʼn optog teen plaasmoorde en onteiening sonder vergoeding te hou. Honderde mense het ook in Maart in die strate van Brisbane ingevaar om teen die aanslag op Suid-Afrikaanse boere te betoog.

Plaasmoorde en eiendomsregte is in dieselfde maand in Vlaandere bespreek en ʼn optog teen plaasmoorde in Suid-Afrika is ook onlangs in Gent in België gehou.

Peter Dutton, die Australiese minister van binnelande sake, het ook vroeër vanjaar gesê die land wil die emigrasieproses vir wit Suid-Afrikaanse boere versnel omdat hulle in hul eie land “vervolg” word.

Die optog in Perth in Australië (Foto: Facebook)

Druk vir verandering

Proff. Deon Geldenhuys, ʼn politieke ontleder verbonde aan die Universiteit van Johannesburg, sowel as Theo Neethling, hoof van die Universiteit van die Vrystaat se departement politieke studies, sê die internasionale optogte plaas die Suid-Afrikaanse regering in ʼn baie ongemaklike situasie, maar hulle twyfel of dié soort optrede die regering skielik tot beter landelike beveiliging sal aanspoor.

Geldenhuys reken die binnelandse druk op die Suid-Afrikaanse regering is net so belangrik, indien nie belangriker nie, as die buitelandse druk oor die kwessie van plaasmoorde en grondonteiening sonder vergoeding. Hy sê dié soort optogte moet deel wees van ʼn groter strategie aan die kant van landbou- en burgerregte-organisasies.

“As ʼn mens dit in isolasie beskou gaan internasionale protesoptogte nie ʼn blywende impak hê nie. Dit sal opgevolg moet word met verdere kommunikasie en deel word van ʼn deurlopende bewusmakingsproses met die klem op volhoubaarheid.”

Hy reken sosiale media is ʼn uitstekende manier om dit te doen.

“Die druk van binne én dié uit die buiteland sal onderliggend versterkend wees. Dit is ʼn internasionale verskynsel dat binnelandse kwessies geïnternasionaliseer word en dit is maar net iets waaraan die Suid-Afrikaanse regering gewoond gaan moet raak.

“Die ANC was self in die dae van apartheid meesters in die internasionalisering van Suid-Afrika se binnelandse politiek. Ek dink hulle begin nou ʼn bietjie van hul eie medisyne terugkry en dit is ongelukkig so dat ʼn mens nie jou eie knoeiwerk meer agter skanse kan wegsteek nie,” voeg Geldenhuys by.

Neethling beaam dat sosiale media ʼn al groter rol speel om politici verantwoordbaar te hou en hy glo dit is ʼn faktor waarmee ons regering sal moet rekening hou.

Geldenhuys sê ook dit is nie meer deesdae vreemd dat lede van die publiek van een land direk met regerings van ander lande gesels nie. “Dit is oudmodies en uitgediend om te reken dat net regerings oor sekere sake met mekaar mag kommunikeer en dit is plein nonsens om te dink sekere groepe in Suid-Afrika kan nie met buitelandse regerings praat nie.”

Betogers in Brisbane. Foto: Zelna Palm

Suur verhoudings

Hy reken ook as die amptelike verhoudings tussen die regerings van Suid-Afrika en Australië wel oor die optogte en uitsprake versuur, dit net sal wees omdat die Suid-Afrikaanse regering op sy perdjie gespring het en ongelukkig is.

“Ek dink nie die Australiese regering is so seer ongelukkig nie. Daar is nie enige beletsels op vreedsame optogte nie – dit is alles deel van ʼn vreedsame demokrasie.

“Buitendien het Australië ʼn diverse bevolking en hulle sien sekerlik ook gereeld protesoptogte van ‘expats’ van verskillende lande. Oud-Suid-Afrikaners het sekerlik ook die reg om dit te doen.

“My houding teenoor die Suid-Afrikaanse regering sou wees om dit in Engels te sê ‘get over it’. Regerings knor elke nou en dan vir mekaar oor die een of ander saak maar ek dink die Suid-Afrikaanse regering is definitief in die geval te liggeraak. Miskien is dit omdat ʼn rou senuweepunt nou raak getrap is,” sê Geldenhuys.

Neethling reken die optogte kan dalk die verhoudinge tussen Suid-Afrika en Australië versuur maar die plaaslike regering se verhouding met Westerse state het in elke geval oor die afgelope twee dekades aansienlike afgekoel.

“Die uitbou van die verhouding met Afrika-state, die Brics-groepering en ontwikkelde lande is in die algemeen veel hoër op die lys as lande soos Australië of België.”

Betogers in Brisbane. Foto: Zelna Palm

Buitelandse politici wat optogte kaap vir eie gewin

Dan is daar die aantygings dat politici, van veral regse partye, die optogte oor plaasmoorde en grondonteiening sonder vergoeding vir eie gewin aanblaas.

Geldenhuys sê hy is nie seker of regses die optogte in Australië enigsins gekaap het nie. “Ek dink dit is eintlik maar net goedkoop politiekery om ʼn regse etiket aan die optogte te hang en alles verdag te maak. Dit is net so verkeerd om te sê die klomp oud-Suid-Afrikaners wat oor die naweek in Perth betoog het, is ʼn klomp regses – dit is pure bog. Ek dink nie ʼn mens moet jou steur aan daardie etiket nie.”

Hy glo wel as instansies in Suid-Afrika op die internasionale verhoog wil speel, moet hulle redelik versigtig wees oor die vennote wat hulle kies om voorbrand te maak vir jou saak in die buiteland. Dit is iets wat ook deur Neethling beaam word.

“Dit sal die geloofwaardigheid van die optogte in die gedrang bring en in die hande speel van politici soos Julius Malema wat onlangs smalend hierop gereageer het en dit met rassistiese oud-Suid-Afrikaners in Australië en Nieu-Seeland in verband gebring het,” sê Neethling.

Die optog teen plaasmoorde in Gent, België. Foto: Facebook

Maar dit help wel

Neethling reken ʼn mens moenie die druk wat die optogte in die buiteland op die plaaslike regering onderskat nie.

“Dit skep immers die indruk dat goeie orde en ʼn doeltreffende veiligheidstelsel nie in die land aan die orde is nie. Dit verskerp ook die fokus op een van die mees basiese funksies en verpligting van ons regering, naamlik om sy burgers te beskerm.”

Neethling glo ʼn verbeterde veiligheidstelsel in die land sal inderwaarheid nie alleen baie sterk politieke wil verg nie, maar onder meer ook afhang van hoër vlakke van funksionaliteit en professionaliteit binne die strukture van die SAPD.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

29 Kommentare

Dirk ·

Terwyl ek hier sit en lees dink ek aan ‘n ou met die naam Peter Hain (the pain) wat só erg teen die blanke bewind was. Hy sit in die Engelse parlement vandag, kan nie help om te wonder wat hy alles te sê het nie, het hy sy sin gekry? Is hy jammer vir sy aandeel? Wonder maar net.

Cherokee ·

Dink jy De Klerk is jammer oor sý aandeel? Of Pik Botha (wat ook selfs ANC gestem het)? Meyer is steeds deel van hulle en so ook met Van Schalkwyk. Peter Hain se grootste pogings was om Suid Afrikaanse deelname aan sport te knel. Die land is geknel.

Hendrik ·

Ek dink dis tyd om ‘n meriete Springbokspan te skep wat onafhanklik van SARFU werk en internasionaal kan meeding.

amelia ·

Dai sanksies een moet vanaf die buiteland, teenoor Suid Afrika ingestel word. Sommer met alles, aankope, verkope, sport ens. Dit is mos hoe die regering aanbewind gekom het.

Jerry ·

Die ooglopende is dat buitelandse veldtogte n impak sal he en druk uitoefen op die regering om omsigtig te handel met grondonteiening sonder vergoeding en plaasbeveiliging. Wat die organiseerders egter uit die oog verloor is dat dit net sowel die teenoorgestelde impak kan he as waarvoor gehoop word en dat die aanslag binnelands teen die Afrikaner en die burgerregte organisasies eerder sal verskerp en versnel. Jy het hier te doen met n hartelose bevrydingsorganisasie wat sy siel verloor het aan kommunisme en sosialisme en wat streng volgens n rewolusionere agenda werk.

Willem ·

So die blaam word voor die deur van die Afrikaner en die burgerregte organisasies gelê?

Hanna ·

Die buiteland is tog te bang om as “rassisties” gebrandmerk te word. Dankie tog vir die enkeles wat wel opstaan!

Paul ·

Mmusie Maimane het met die DA se afgelope kongres gesê dat daar moet in die land en die party weggedoen word met die Westerse/Europese manier van doen, die Afrika-manier van doen, moet die norm wees.

En as die Weste/Europeërs, daardie lande, hulle nie daarmee kan versoen nie, met wie dryf jy dán handel?

Wie is dán jou vriende?

marianna ·

Peter Hain het al die suid afrikaanse probleme in die britse parlement
begin noem. Lees RT.

Paul ·

Die definisie van rassisme is: “prejudice, discrimination, or antagonism directed against someone of a different race based on the belief that one’s own race is superior.”

Dan, per die defnisie van rassisme blyk dit ook dat ‘n swart mens wat van Crimen Injuria
aangekla word baie moeilik, indien enigsins, aan rassisme skuldig bevind sal kan word,
daardie persoon sal eerder aan haatspraak skuldig bevind word, in teenstelling met dié
van ‘n wit persoon.

Dan is rassisme, wat by wyse van ‘n handeling of verbaal kan geskied, ‘n kriminele
oortreding, terwyl haatspraak, wat slegs verbaal geuiter kan word, ‘n siviele oortreding
is.

En as haatspraak mense aanspoor om tot dade oor te gaan?

Ek glo die ewehandigheid wat nie toegepas word nie, se antwoord lê in die voormelde
opgesluit. Dus, soos die wetgewing tans staan, vra ek, is dit enigsins moontlik dat ‘n
regter ‘n ewehandige uitspraak sal kan gee?

Gerrit ·

En wat doen ons bly weg van die internasionale rugby en wys jou protes so

Paul ·

Dankie Esté, as mense mekaar en hoe hul gerat is, daar in die kop, die sensitiwitweit, beter verstaan, wat die werklike versugting is, die uitdrukking, en nie sommer die duiwel in als sien nie, sal dit beter gaan. Jy kan maar skryf, berig, ongelooflik geseënd.

Verdra ons, die ultra sensitiewe, wat ook die anderkant verstaan, moet ons nie uitsluit by wyse van sensor nie, maar hoe anders maak ons om nie te lieg nie, en die waarheid te praat?

Eish ·

Ek dink tog dat die Weste die ideale springplank is om die klas van aksies geloods te kry vanweë die feit dat simpatie wat meer geredelik hier gewek gaan word as gevolg van huidige en historiese gedeelde gemeenskaplikhede.
Ter plaatse doen die Burgerregte organisasies uitstekende werk. Ons getalle en nie ons aksies nie, ons waardes teenoor Kommunisties sosialistiese agendas, is die oorsaak van onderdrukking, omgekeerde rassisme en tweedeklas burgerskap.
Verseker gaan die Westerse simpatie van veel meer waarde wees as enige binnelandse poging.
Ons hopelose situasie kan nie binnelands beredder word nie.
Synde dat integrasie nêrens ter wêreld deur geen regering of regeringsvorm ooit suksesvol bestuur kon word nie, is die blanke se kans op n toekomstige menswaardige bestaan, ernstig in gevaar. Ons is nou in die “Twilight zone” en die volgende geslag blankes gaan ernstig gekortwiek wees deur n gebrek aan geleenthede en diskriminasie. Verarming gaan n massiewe impak hê wat jaarliks gaan eskaleer in felheid en intensiteit. Die vermoëndes gaan eenvoudig hul loskoop uit die helhool en padvat, maar die gewone blanke, gaan sy Moses teëkom aan die Suidpunt van Afrika.
Selfs die geleerde professore wat hier menings uitspreek is n bedreigde spesie wat besliste uitwissing in die gesig staar deur die naderende verafrikanisering van staatsuniversiteite.
Slegs n ingryping van ons Hemelse Vader kan ons omstandighede verander.

Celia ·

Ek woon in Aus en het deelgeneem aan die protes en gistraand aan n forum waar ons kon praat met MP’s hier, ons het reguit gepraat rassime was nie van spraak net gevra vir hulp aan SA burgers en bewusmaking van wat in SA aan gebeur is. Die wat ons prober stilmaak wil se ons is rassisties maar die regering hier weet wat aangaan ons sal nie stilbly nie ons het 20 jaar lank stil gebly en kyk waar is ons landgenote genoeg is genoeg.

Andrea van Vuren ·

My kinders in Kanada ook besig om die gruwels in ons land uit te lig. Net jammer dat alles van ‘buite’ gedoen word. Waar is ons eie mense? Niemand hoor meer ons klaagliedere nie?

John ·

Nee wat. Indien regerings nie die probleem aan die groot klok hang nie, sal die houding jeens vergrype in SA nie verander nie. Geen land gaan skielik die regte van wit boere verdedig nie. Kyk maar in Zimbabwe. Doodse stilte selfs vanuit naaste-geledere in Brittanje. Afrika het deur die eeue homself as die verontregte van die wereld gevestig met selfs ‘n swart koning op die troon in Brittanje en baie ander ingetrou in Europese koningshuise met huidige nasate. Waarom sou die adel dan nou skielik hul naaste eiendom in Afrika misgun. Bloed is dikker as water en goedheid en guns teenoor die eie is mos net reg. Mense se sienswyses en samehangende optrede word oor ‘n lang tydperk ingebed. Wensdenkery is wat ons nou doen… Kyk wie word tans besing en wat hul standpunte was. Enige buitelandse waarskuwing dat die verkeerde mense oordrewe opgehemel word wat chaos sou impliseer? Nee. Stilte.

Hannes ·

Ek was by die optog in Perth Sondag en gisteraand se gesprek met Minister Tudge (Minister for Citizenship and Multicultural Affairs). Uit gister se gesprek:
– Die Australiese regering aanvaar dat boere in Suid-Afrika uitgesonder word in plaasaanvalle en dat baie kan kwalifiseer vir humanitere visums (klas 201 dink ek)
– Dat nie-boere ook mag kwalifiseer vir humanitere visums as hulle die kriteria kan maak
– Dat boere organisasies in Australia die wat belangstel om te emigreer kan help om ‘n werksaanbod in die platteland te kry
– Dat baie boere moontlik ook onder die “skilled” katagorie kan kwalifiseer
– Dat familie reunie visums nie verander gaan word om die makliker te maak vir ex SAners in Australia om na hul eie familie om te sien nie

Al ·

Sou die Suid-Afrikaanse regering hom nie steur aan Westerse internasionale optogte nie – is daar egter ñ ander faktor wat hy nie in berekening gebring het nie – dat ander Afrika lande kennis neem van hul immigrante wat onderwerp word aan plundery en vernietiging van hul winkels en hul landgenote wat aan brand gesteek was en vermoor word met xenofobiese aanvalle.
Selfs die Chinese kleinhandelaars loop deur onder konstante diefstal ens waarvan ek glo China te deeglik bewus is van.
SA regering moet besef die wêreld is nie swape nie.

christa ·

Almal is bang vir die rassekaart omrede hulle die meerderheid is en die bietjie wat nog oor is sal vernietig, did mos al waarvoor hulle kwalifiseer

Jerry ·

Willem, die feit dat jy van blaam praat se vir my dat daar iewers by jou n klokkie lui. Tot en met die einde van die Zupta era het die ANC apartheid geblameer vir SA se probleme en ook om hulle strategie van doelbewuste onbevoegdheid en korrupsie te verskans. Niks verhoed hulle dus om die fokus vir blaam vir toekomstige probleme een of ander tyd te skuif na die Afrikaner burgerregteorganisasies wat in die pad van die ANC staan om hulle rewolusionere agenda deur te voer ten einde n sosialistiese demokrasie te vestig en die hele ekonomiese koek te beheer. Die Afrikaner se verset om te versoen en handdoek in te gooi, is uiteraard n hindernis en frustrasie vir die ANC. Terselftertyd bied Afrikaner verset aksies, regverdiging aan ANC reaksies, wat daarop geskoei is om die Afrikaner te blameer vir ongelooflik amper alles wat kan verkeerd gaan. Die punt is dus dat of dit geregverdig is of nie, volgens die apartheid scenario wat homself uitgespeel het, dra die Afrikaner die blaam en nie die ANC nie. Volgens die huidige verset scenario gaan die Afrikaner dus steeds die blaam dra en nie die ANC nie. Die goeie ouens van gister is nou die slegte ouens en die slegte ouens van gister is nou die goeie ouens. In die oe van Suid Afrikaners en die buiteland is die slegte ouens altyd verkeerd en haal hulle hulself die blaam op die hals vir enige aksies wat onversoenend blyk te wees.

VERSOEN ·

Versoen versoen versoen, hier is vandag se beriggie en se versoekie spesiaal van JERRY (soos al die ander dae) dat SLEGS die AFRIKANER moet versoen, dan sal plaasmoorde ophou, almal sal werk kry, BEE en EE en AA en BEEE sal onmiddellik afgeskaf word, die kwotastelsel sal afgeskaf word . GEEN moorde sal meer op blankes gepleeg word nie .. SOLANK HULLE NET VERSOEN!! VERSOEN MANNE VERSOEN!!

Magda ·

Wanneer hou ons ons eie optog soos verlede jaar? As dit konstant in die regering en ook in die internasionale gesig is kan niemand dit meer miskyk nie…..KOM ONS REEL WEER SO IETS!!!

Uncle D ·

Afrikaners word asseblief net wakker. Wat sal enige sport sanksies enigsins help met wat nou in SA gebeur. Dink jul regtig die ANC sal hul daar aan steur of ons nie aan internasionale sport kan deel neem nie. Dit is die laaste op die agenda indien ooit. Maak oop jul oë en hou op skop teen die prikkels. Ons word direk aan geval en die doel is om van die blanke ontslae te raak so dat hul totale beheer oor alles kan verkry. Om te dink sport of buitelandse se druk sal iets verander is vergesog. Kyk maar net na Zimbabwe onder Mugabe se bewind. As jul regtig ‘n verandering verwag keer nou terug na jul God op wie jul jul rug gedraai het en pleit vir Sy vergifnis en bekeer jul van jul verkeerde weë. Hy sê in Hagai 1 vers 9: Julle het uitgesien na baie, en kyk dit het min geword, en julle het dit in die huis gebring, maar Ek het dit weggeblaas. Waarom?spreek die Here van die leërskare. Terwille van My huis wat in puin lê, terwyl elkeen van julle vir sy eie huis hardloop. Bid sonder ophou tot Hy antwoord.

jean ·

China stuur sy”oorskiet” oral oor die wêreld heen sodat families en gesinne kan volg……alles wat kamtig vir hierdie ou landjie van ons gedoen wil word is net’n “pie in the sky”…….niks sal ten goede gebeur…dis net iets om almal besig te hou…..deur optogte te organiseer.

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.