Inwoner gaan baklei vir sy sypaadjie-groentetuin

Joe Nkuna sê hy is nie bang om vir sy groentetuin in die hof te baklei nie (Foto: Djo BaNkuna, Facebook)

Joe Nkuna, ʼn inwoner van Pretoria-Noord wat met R1 500 beboet is oor die groentetuin op die sypaadjie voor sy huis, gaan nie die boete betaal nie.

Nkuna het in ʼn inskrywing op Facebook gesê dat hy besluit het om hom eerder in die hof te verdedig en die boete te betwis.

“Ek is nie bang nie,” skryf Nkuna.

Dié hofsaak sal na verwagting op 23 November plaasvind.

Maroela Media het vroeër berig lede van die Tshwane-metropolisie (TMPD) het verlede week Nkuna se huis besoek nadat hulle klagtes oor die groentetuin ontvang het.

Nkuna het ’n mondelinge waarskuwing gekry omdat hy ’n sypaadjie versper wat vir voetgangers gereserveer is. Hy is versoek om aan die nodige regulasies te voldoen. Hy het egter nie daarop gereageer nie, waarna hy die boete opgelê is.

Joe Nkuna se groentetuin op die sypaadjie voor sy huis. (Foto: Facebook)

Hy is ʼn boete van R1 500 opgelê wat binne 30 dae betaal moet word anders sal hy in die hof moet verskyn waar hy die boete kan betwis.

Dit is presies wat Nkuna toe besluit het om te doen…

Nkuna het aan die media gesê dat hy die groente skenk en het op sosiale media geskryf dat hy dit verkoop.

“Ons moet ons siening en houding oor voedselsekerheid en hongersnood verander. Dankie vir die ondersteuning en gebede van mense wat my hierin ondersteun,” het Nkuna op Facebook geskryf.

“Jy koop groente en voed ’n gesin; jy plant ’n groentetuin aan en voed ʼn gemeenskap.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

40 Kommentare

jongste oudste gewildste
Dup

Groentetuin op die sypaadjie sal gevolg word deur hoenders,skape,bokke en beeste wat daar gaan wei.Die begin van die “transformasie” van woonbuurte.Waarom het hy nie sy tuin in sy erf gemaak nie?

Boerkind

As die munisipaliteit net hul bywette konsekwent wil toepas, sou hulle dalk ‘n beter saak gehad het…

Friedrich

Swak Meneer. Ek verstaan jou idee, maar nou moet mense hulle lewens in gevaar stel om Om jou groentetuin te loop. Jy gaan 10/1 nog daai groente wil Verkoop en nie weg gee nie.

Frank John

Mense kan mos maar paar rand uithaal vir sy moeite en water en arbeid. Hoekom kla die snobs nou. Hierdie man dien iets en gee ‘n voorbeeld hoe ons as mense saam mekaar se laste kan dra en mekaar kan help.

Piet parys

Hy kan maar vir hom n groenteplaas gaan koop dit lyk goed ….maar as almal die reels in die dorp verbreek dan sal dit in n plakkerskamp verander . Baie stadsrade verwag van die huis eienaar om aan die buitekant van die erf gras te sny en dan het hy mos die reg om dan maar groente te plant dan is dit baie meer nuttig as n klomp gras .