J. Arthur Brown se appèl geweier

Die konstitusionele hof het die voormalige Fidentia-baas J. Arthur Brown se aansoek om teen sy vonnis van 15 jaar tronkstraf te appelleer, van die hand gewys.

“Ons is bly dat die konstitusionele hof met ons saamgestem het dat ʼn appèl geen vooruitsig van sukses inhou nie,” het Velekhaya Mgobhozi, woordvoerder van die Nasionale Vervolgingsgesag (NVG), gesê.

Die konstitusionele hof het Vrydag die beslissing gemaak. Die NVG het Brown se aansoek teengestaan. “Ons hoop dat mnr Brown nou sy vonnis sal begin uitdien aangesien sy pogings om die saak uit te stel nou tot ‘n einde gekom het. Ons hoop hierdie vonnis sal as ‘n waarskuwing dien vir ander witboordjiemisdadigers,” het Mgobhozi gesê.

Brown is gevonnis op twee aanklagte van bedrog wat verband gehou het met die sy hantering van beleggings vir Teta, die opleidingsowerheid vir die vervoersektor, en die Mantadia Asset Trust Company tussen 2002 en 2006. Brown het aanvanklik tereg gestaan op 192 aanklagte.

Die NVG het appèl aangeteken nadat Brown in Mei verlede jaar ʼn opgeskorte vonnis en ʼn boete van R75 000 opgelê is in die Wes-Kaapse hooggeregshof. Die appèlhof het Brown hierna tot 15 jaar tronkstraf gevonnis.

Klik hier vir alle vorige berigte oor J. Arthur Brown op Maroela Media.