Jagluiperd soek in Pta

Argieffoto van ‘n jagluiperd (Foto aan Maroela Media verskaf deur Dinokeng)

’n Jagluiperd van die Rietvlei-natuurreservaat in Pretoria is steeds soek nadat dit vroeër vandeesweek uit die reservaat ontsnap het.

Die Stad Tshwane doen nou ’n beroep op besoekers en inwoners in die omgewing van die reservaat om waaksaam en op die uitkyk vir die blitsige groot kat te wees.

Selby Bokaba, woordvoerder van die Tshwane-metro, sê die jagluiperd het Dinsdag ontsnap. Dit is nie in dié stadium duidelik hoe hy dit reggekry het nie. Hy het vermoedelik deur ʼn gat onder ’n heining – wat deur kleiner diere gegrawe is – uitgekom.

Die eienaar van die aangrensende eiendom het die jagluiperd vroeër vandeesweek opgemerk en dadelik die bestuur van die Rietvlei-natuurreservaat in kennis gestel.

Bokaba sê die natuurreservaat se heinings is geëlektrifiseer en geen jagluiperd het al voorheen uit die reservaat ontsnap nie. “Die heinings word daagliks gepatrolleer en herstelwerk word gereeld gedoen om voorvalle soos hierdie te voorkom.”

Die gesoekte jagluiperd is vroeër met behulp van die Trust vir Bedreigde Spesies (EWT) se jagluiperd-uitbreidingsprojek by Rietvlei hervestig.

Die jagluiperd dra ʼn halsband wat seine uitstuur en lede van die EWT-projekspan is reeds op die spoor van die dier.

Aangrensende grondeienaars is ook gevra om dadelik die natuurreservaat te kontak indien hulle die jagluiperd gewaar. ’n Veearts is ook op bystand om die dier te verdoof.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

5 Kommentare

jongste oudste gewildste
Anel

Nou as EWT ‘n opsporingstelsel om sy nek het, hoekom is hy nog nie opgespoor?

Dries

Awww hy kan maar by my kom bly. Vrek oor hulle

Janee

Moet hom tog nou asb net nie skiet nie!

Danie

Ek hoop hy word weer veilig en ongedeerd na die natuurreservaat gebring.