Jagter tuis ná maand in hospitaal

Die Schoonwinkel-gesin. (Foto: Facebook)

Marco Schoonwinkel (32), die beroepsjagter wat onlangs deur ’n gemsbokhoring in die Thabazimbi-omgewing in Limpopo deurboor is, is Donderdag ná ’n maand uit die hospitaal ontslaan.

Sy vrou, Clarisa, beskryf dit as ’n “wonderwerk”.

“Marco het gistermiddag ná 31 dae lange ‘op en af’ uitgekom.

“Ons is baie dankbaar. Hy is werklik ’n wonderwerk en die Here is so goed vir ons.”

Marco Schoonwinkel. (Foto: Verskaf)

Clarisa sê daar lê nog ’n lang herstelpad vir haar man voor, maar hy loop darem al “kort entjies”.

Maroela Media het vroeër berig die gemsbokbul se horing het Schoonwinkel net onder sy naeltjie deurboor. Die horing het gevolglik dwarsdeur na sy rugwerwels deurgedring en sy hoofslagaar geskeur.

Die ongeluk het tydens ’n wildverskuiwingsoperasie plaasgevind.

Die span wat saam met hom was, het dadelik noodhulp op hom toegepas om bloedverlies te beperk.

Schoonwinkel is met ’n noodhelikopter na ’n hospitaal in Thabazimbi vervoer en later na die Cintocare-hospitaal gevlieg waar hy ’n noodoperasie van bykans vier uur lank ondergaan het.

’n Stent is tydens dié operasie in sy hoofslagaar geplaas.

Schoonwinkel moes egter kort daarna weens inwendige bloeding nóg ’n noodoperasie ondergaan.

Clarisa sê haar man het uitstekende sorg in die hospitaal ontvang en dat die personeel uiters behulpsaam was.

Die egpaar het ’n driejarige seun en Clarisa verwag hul tweede kind.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

9 Kommentare

jongste oudste gewildste
Smirre

Baie bly hy is tuis, Sterkte!

marius

Net genade . Bly om te hoor hy is tuis . Word gou gesond !

ES

Baie bly! Spoedige herstel vir jou!

SjN

Baie bly vir sy part, so gemsbokhoring is vlymskerp en eina.

Fubar

Ons is báie dankbaar om te lees dat jy op die herstelpad is, Marco. Seënwense vir jou en jou gesin.