Jason Rohde mag na dogters terugkeer

Rohde tydens sy vorige hofverskyning. Foto: Skermskoot eNuus-video

Rohde tydens sy vorige hofverskyning. Foto: Skermskoot eNuus-video

Jason Rohde, die uitvoerende hoof van Sotheby’s International Realty South Africa, sal toegelaat word om terug te keer na sy dogters in Johannesburg tot sy volgende verskyning in die Stellenbosch-landdroshof.

eNCA berig Rohde het vandag weer in die hof verskyn, waar landdros Greg Jacobs hom verlof gegee het om terug te keer na sy huis in Bryanston. Rohde is op 30 Augustus op borgtog vrygelaat, maar kon volgens sy borgtogvoorwaardes nie die Wes-Kaap sonder toestemming verlaat nie en het in die tyd by sy swaer in Melkbosstrand tuisgegaan.

Sy verdediging het Vrydag aangevoer hy moet na Johannesburg terugkeer omdat hy die risiko loop om sy werk te verloor indien hy nie daar is om sy pligte uit te voer nie. Rohde se regspan het ook gesê die saak is baie traumaties vir sy dogters en hy wil spesifiek sy 18-jarige dogter bystaan, wat nou haar matriekeksamen moet skryf.

Die staat het hierdie versoek teengestaan en gesê Rohde is tydelik by Sotheby’s geskors en hoef dus nie in Johannesburg te wees vir werk nie. Dit het ook aan die lig gekom Rohde het na bewering sonder die nodige toestemming dubbele burgerskap van Suid-Afrika en Australië gekry. Die staat het in die lig hiervan gesê hulle kan nie waarborg dat Rohde nie ʼn vlugrisiko is nie.

Jacobs het egter Rohde se versoek om terug te keer na Johannesburg toegestaan en sy borgtog verleng. Die saak is uitgestel tot 27 Januarie volgende jaar.

Rohde staan tereg op ʼn skedule 5-aanklag van moord op sy vrou, Susan (47). Haar liggaam is die oggend van 24 Julie in die badkamer van ʼn hotel op die Spier-wynlandgoed gevind, waar sy met die koord van ʼn haartang opgehang is. Rohde beweer sy het selfmoord gepleeg, terwyl die staat aanvoer Susan is verwurg. ʼn Private patoloog en staatspatoloog wat verskillende nadoodse ondersoeke gedoen het, is dit nie eens oor hoe Susan gesterf het nie.

Lees alle vorige berigte oor Jason Rohde op Maroela Media.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

28 Kommentare

jongste oudste gewildste
Alida

Ek kan regtig geen rede sien hoekom hy nie na sy kinders toe kan gaan nie. Ek is bly oor die bevel. Die man is nog nie skuldig bevind nie en mens kan sien dit is ‘n beskaafde opgevoede man met ‘n ordentlike werk. Die klippe gaan seker nou weer rol soos met die OP saak. Die mense wat so klippe gooi moet objektief wees. Hierdie is nie ‘n misdadiger soos die duisende wat elke dag mense doodmaak en daarmee wegkom nie.

vytjie

Alida – Ek glo nie hy is skuldig nie. Te veel teenstrydighede. Dalk skuldig aan ander dinge, maar betwyfel moord.

Interessant

Ek dink dit is baie interessant dat hy onwettige dubbele burgerskap aansoek intussen kan doen en dit is ok. Soos julle sê, hy lyk ordentlik en ek dink nie hy sal vlug, net baie interessant. Dit is egter ‘n hartseer saak en ek voel vir die kinders wat meer as ons tussen 2 vure sit. Sonder Ma en aangekla van Pa as moontlike moordenaar. Sterkte ons dink aan julle. Die gereg moet egter sy gang gaan as hy dit gedoen het sal ek wil hê hy moet net soos alle ander behandel word, nie bedoelende gewone misdadigers nie, mens kan… Lees meer »

Rottweiler

Alida, ons wag nog so bietjie….daars nog nie genoeg om spoor te vat nie……

ToffieProffie

Mens kan nie onwettige dubbele burgerskap van Australie en SA kry nie. Dit is onmoontlik – die proses werk nie so nie. Wanneer jy aansoek doen vir Ausraliaanse burgerskap word alle vorige “burgerskappe” automaties gekanselleer TENSY jy spesifiek vra om dit te behou. Die proses om jou bestaande burgerskap te behou word deur die betrokke regerings gehanteer en is heeltemaal uit jou hande, en heetelmaal onderhewig aan hulle diskresie. Hulle sal jou laat weet. Die enige resultaat van die proses is dat jy OF Aus burgerskap het OF Aus + Ander land se burgerskap het. So eenvoudig soos dit. Dit… Lees meer »