Jhb-peuter veg om lewe na honde-aanval

WAARSKUWING: ‘n Foto in die berig is grafies van aard en kan sensitiewe lesers ontstel.

Desjuane Farmer. Foto: Verskaf

Desjuane Farmer. Foto: Verskaf

ʼn Dogtertjie van 17 maande van Alberton veg om haar lewe nadat haar gesig en kopvel Woensdag deur ʼn hond verskeur is.

Desjuane was glo saam met haar ma, Hilda Sage en pa, Rodney Farmer, by Hilda se werkgewer se huis toe die voorval plaasgevind het.

Mercia Farmer, Desjuane se ouma, het aan Maroela Media gesê die gesin het ʼn jaareindfunksie by die huis bygewoon en die kettingboel (bull mastiff) is buite die huis toegemaak sodat hy nie naby die gaste kon kom nie.

“Hy het op die een of ander manier die deur oopgestoot en in die huis in gestorm, reguit op Desjuane af. Sy het met haar rug na hom toe gestaan en hy het van agter af op haar gespring en haar grond toe gepluk,” het sy gesê.

Die volwassenes het so vinnig as moontlik die hond van Desjuane afgeruk, maar nie voordat hy haar klaar erg gebyt het nie. “Hulle het dadelik met haar hospitaal toe gejaag en sy moes gisteraand ʼn noodoperasie ondergaan om die ergste oop wonde te heg,” het Mercia gesê.

Desjuane Farmer in die hospitaal nadat 'n hond haar gebyt het. Foto: Verskaf

Desjuane Farmer in die hospitaal nadat ‘n hond haar gebyt het. Foto: Verskaf

Desjuane is tans onder verdowing in die pediatriese waakeenheid van die Netcare Clinton hospitaal. “Sy sal ten minste nog 10 tot 14 dae onder verdowing gehou word, want sy het geweldige pyn. Behalwe vir die talle bytmerke aan haar kop en gesig, het sy ook frakture in haar gesig opgedoen en haar traankliere is beskadig,” het sy gesê.

“Die dokters verwag hulle sal moontlik plate in haar gesiggie moet sit en nog verskeie operasies moet doen om haar wonde te heg. Sy sal ook waarskynlik in die toekoms rekonstruktiewe chirurgie moet ondergaan.”

Die hond is intussen van kant gemaak, het sy gesê.

Volgens Mercia gaan die familie deur ʼn baie moeilike tyd, maar probeer hulle om ter wille van Desjuane sterk te wees. “Dit is nou net in God se hande. Ons probeer maar rustig bly, maar met tye voel dit asof jy net uitmekaar val. Ons kan nou net bid,” het sy in trane gesê.

Desjuane het nie ʼn mediese fonds nie en na raming sal haar mediese onkostes meer as ʼn halfmiljoenrand beloop. Die gesin het bankbesonderhede verskaf waar donasies vir haar mediese onkostes inbetaal kan word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

87 Kommentare

jongste oudste gewildste
Melkies

So jammer vir die familie en kleine lyfie.
Die werkgewer moet bydra tot haar mediese onkostes.

Schalk

Tragies! Ek is nie tengunste van diere uitsit na aanvalle nie, maar in hierdie geval sou ek dit persoonlik gedoen het.

Boetman

Is jammer Netcare kan dit nie oor hul hart kry om simpatie met hul kliente te he nie. Die grootste gedeelte van die mediese kostes is hospitaal verblyf wat niks met mediese behandeling te doen het nie. Ook moet mens in gedagte hou dat die maatskappy se Besturende Direkteur laasjaar sowat een en ‘n kwart miljoen per maand verdien het – geld van mense in nood.

tamboti

Vervlakste hond, hy moet daar wees vir inbrekers en nou val hy die klein hulpelose kindjie aan. Dit wys net dat dierlike instink ontembaar is. Honde en wilde diere is net so gevaarlik soos swembaddens!
Ouers pas jul kinders op asof daar leeus en aasvoels om elke draai is!

Suz

So hartseer om hiervan te lees… baie sterkte aan ouers en kleinding!

Werkgewer sal moet instaan vir mediese uitgawes!