J&J-entstof glo vandag hier

(Argieffoto: Ted S. Warren/AP)

Die eerste besending van Johnson & Johnson se Covid-19-entstof kom glo vandag (Dinsdag) in Suid-Afrika aan. Die eerste inentings onder gesondheidswerkers sal na verwagting reeds Woensdagoggend afskop.

“Hierdie keer gaan dit werk,” het dr. Angelique Coetzee, nasionale voorsitter van die Suid-Afrikaanse Mediese Vereniging (Sama), vroeër vandag in ’n onderhoud met eNCA gesê.

Coetzee is oortuig dat die eerste fase van Suid-Afrika se inentingsprogram teen Covid-19 môre sal afskop.

Popo Maja, nasionale woordvoerder van die departement van gesondheid, het by navraag aan Maroela Media gesê die departement sal later vanmiddag kan bevestig of dit wel die geval is.

Volgens Coetzee sal tweederdes van die eerste 80 000 entstofdosisse aan die openbare sektor verskaf word en ’n derde aan die private sektor.

Spesifieke hospitale in al nege provinsies, waar die inenting van gesondheidswerkers sal plaasvind, is reeds geïdentifiseer. Dié hospitale sluit in:

Huisdokters van privaat praktyke wat die entstof wil ontvang, sal oor die volgende twee Sondae ingeënt word, het Coetzee gesê. “Dit is vir eers uiters belangrik dat algemene praktisyns en ander gesondheidswerkers so gou moontlik ingeënt word.”

Maroela Media het vroeër berig Suid-Afrika se eerste besending van die die AstraZeneca-entstof het sowat twee weke gelede in Suid-Afrika aangekom. Die entstofprogram is kort daarna tydelik opgeskort nog voordat dit kon begin, nadat navorsing gewys het die AstraZeneca-entstof het moontlik nie dieselfde doeltreffendheid teen die 501Y.V2-variant nie.

Die Johnson & Johnson-entstof se doeltreffendheid teen die Suid-Afrikaanse variant van die virus is reeds bewys.