J&J: Min newe-effekte onder SA gesondheidswerkers

Foto ter illustrasie. (Foto:
Hakan Nural/Unsplash)

Die Suid-Afrikaanse Mediese Navorsingsraad (MNR) het gesondheidswerkers verseker dat onder diegene wat reeds die Johnson & Johnson-entstof ontvang het, daar bitter min newe-effekte aangemeld is.

Die VSA het inentings met dié entstof gestaak toe dit aan die lig gekom het dat enkele mense wat daar ingeënt is, bloedklonte ontwikkel het. Suid-Afrika het intussen as voorsorgmaatreël ook die toedien van die Johnson & Johnson-entstof tydelik opgeskort.

“Uit die 289 787 gesondheidswerkers wat die entstof as deel van die fase 3B-entstofstudie ontvang het, het 2,2% newe-effekte gerapporteer. Slegs 134 mense is vir verdere evaluering gestuur, maar die meeste van hierdie gevalle was geringe, plaaslike of sistemiese reaksies,” het die MNR, wat saam met ander rolspelers die fase 3B-entstofstudie fasiliteer, in ʼn verklaring gesê.

“Een persoon het wel ʼn ernstige allergiese reaksie ervaar, maar het sedertdien vinnig en volledig herstel.”

Die MNR sê die paar gevalle van gedissemineerde intravaskulêre stolling wat wel aangemeld is, hou nie verband met die outo-immuun-sindroom, trombositopenie (ITP), nie. Gedissemineerde intravaskulêre stolling is wanneer ʼn bloedklont afbreek en na ʼn ander deel van die liggaam beweeg om ʼn bloedvat te blokkeer.

“Dit is belangrik om daarop te let dat gedissemineerde intravaskulêre stolling ʼn algemene komplikasie van die koronavirus is. Dit word ook geassosieer met ander kroniese medisynes, waaronder voorbehoedpille en gepaardgaande siektes soos vetsug, diabetes en kardiovaskulêre siektes.”

Voorts het die MNR gewaarsku dat mense se risiko vir bloedklonte nadat hulle die Johnson & Johnson-entstof ontvang het, binne die eerste drie weke van ontvangs die hoogste is.

“Nietemin, as voorsorgmaatreël moet enige iemand wat die entstof ontvang het dadelik ʼn dokter gaan sien indien die volgende simptome voortduur. Dit sluit in kort van asem, pyn in die bors of maag, swelling in die bene of verswakte sig en erge hoofpyne. Ernstige simptome sluit in aanhoudende bloeding, menigte klein kneusplekke, rooierige of pers kolle of bloedblase onder die vel.”

Dokters wat hierdie pasiënte behandel, word aangeraai om die MNR te kontak en bloedverdunners soos heparien te vermy totdat ʼn diagnose gemaak is.

“Ons wil gesondheidswerkers en die publiek gerusstel dat veiligheid vir ons en ander rolspelers die hoogste prioriteit is. Die MNR, Johnson & Johnson, die Suid-Afrikaanse Reguleringsowerheid vir Gesondheidsprodukte (Sahpra) en die departement van gesondheid sal eers wag vir die resultate wat Amerika se Food and Drug Administration (FDA) gaan oplewer.

“Tydelike pouses in die uitrol van Covid-19-entstowwe is nie ongewoon nie en oor die algemeen word dit omgedraai sodra alle veiligheidsdata noukeurig ondersoek is.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

7 Kommentare

jongste oudste gewildste
Deon

Hoe nou? Lees ek reg? So die goedgekeurde medikasie word sommer nou op die wereld populasie getoets? Die laaste paragraaf lyk asof daar voorgegee word dat ons die medikasie al vir jare gebruik… As daar n stop is op die medikasie, wat word dan van die opvolg spuite?

john

As dit dan so veilig is hoekom is die staat, verspreders en vervaardigers dan gevrywaar vir eenige verantwoordlikheid as iets verkeerd gaan en kan hulle volgens wet nie gedagvaar word ? En wat van lang termyn newe effekte ? Hou maar julle vaccine vir eie gebruik.

Johan

Voltooi eers jul eksperimentele toetse,dan praat ons weer…

Dirk Mostert

AstraZeneca, Auswitsch, Johnson, Moderna, Pfizer. Het ek iets uitgelaat?