Johan de Jonge se vrou praat op radio

Johan de Jonge. Foto: YouTube-kanaal.

Rugby is ’n onderwerp wat mense selfs rondom ’n doodgewone braaivleisvuur lekker warm onder die kraag kan maak; om boonop nie eens daarvan te praat as iemand op sosiale media gal oor jou geliefde span braak nie.

Johan de Jonge, ’n Suid-Afrikaanse All Blacks-ondersteuner – het vroeër opslae op sosiale media gemaak nadat hy in ’n video omtrént vuur oor die Bokke gespuug het.

“Vir al die Bok-supportertjies wat vir my en my vriende so op Facebook vloek: Dít is waarom julle span verloor. Hou aan om ons te vloek, dit is reg; julle span sál nie met ’n Wêreldbeker(trofee) geseën word nie,” het De Jonge in ’n All Blacks-trui gesê.

Hy het al vingerswaaiend voortgegaan en nogal heftig onderneem dat hy vir Italië in die Bokke se volgende groepwedstryd sal ondersteun.

“Ek hoop Italië trap julle en kry ’n bonuspunt teen Kanada sodat julle sommer uitvoertsek uit die Wêreldbeker nog voordat die kwarteindstryde plaasvind,” het hy gesê terwyl hy met tye ’n Italiaanse aksent (“That’s a spicy meatball!”) probeer nadoen het.

Die betrokke video het op 28 September sy pad na YouTube gevind en is meer as 58 000 keer gekyk.

Nodeloos om te sê, het die Springbokke vir Italië met 49-3 getroef en ’n paar weke later het hulle die William Webb Ellis-trofee in Jokohama omhoog gehou.

Nou het De Jonge se vrou, Martie, in ’n gesprek met Martin Bester op Jacaranda FM gesê dat hul gesin onder boelies deurloop.

“Aan al die Bok-ondersteuners wil ek net sê dat ons gesin genoeg geteister, geboelie en uitgehaal is op sosiale media,” het sy gesê.

“Julle het nou die Wêreldbeker gewen en nes julle ondersteun ons ook ons span. So, los ons asseblief net uit.”

Sy het verder gesê dat hul gesin onder geweldige druk is. “My kinders word elke dag by die skool geboelie. En emosionele goed … dit raak net rof.”

Volgens De Jonge verstaan sy waarom Springbok-ondersteuners vir haar man vies geword het, maar ’n saak het altyd twee kante.

“Al wat Johan gedoen het, is om sy span heeltyd te verdedig en die video was ’n reaksie op iemand anders se kommentaar.”

“Ek kan vir die mense sê dat ek en Johan nie die enigste All Blacks-ondersteuners in die land is nie. Hier is duisende in Suid-Afrika.”

Bester het die De Jonge-egpaar genooi om saam met hom in die ateljee op sy Breakfast with Martin Bester-program te kom gesels.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

331 Kommentare

jongste oudste gewildste
oh please

As jy jouself as ‘n toffie wil uitgee moet jy maar bereid wees om gekou te word…

Gerard

Ai sooo tragies…….

Pops

Ag asseblief tog. Dan moes hy nie sy ou video-tjie op sosiale media gedeel het nie, mev de Jonge. Hy moet nou maar sy pak soos ‘n man vat. Jy vat nie aan ‘n Springbok-ondersteuner se rugby span nie, maar dit het jou man nou seker te laat agtergekom ne??

Johan

Seker waar oor die toffie en bereid moet wees om gekou te word. Maar ek dink ons Suid-Afrikaners moet dan leer om die betrokke individu te “kou” (as ek die toffie beeldspraak gebruik). Kom ons los die man se kinders en vrou uit – asseblief.

All Black Pel

Sterkte my ou maat. Die stof sal weer gaan lê en die Kiwigras sal weer daaroor groei!