Jong boer trek aanvaller vas wat tydens braai toeslaan

Argieffoto: Lorraine Claasen

ʼn 32-jarige boer van Komatipoort in Mpumalanga het ʼn man wat hom en sy gesin Vrydagaand op sy plaas tydens ʼn vleisbraaiery probeer aanval het, ná ʼn stoeiery platgetrek.

Die boer, wat uit vrees vir sy gesin se veiligheid verkies om anoniem te bly, het Sondag aan Maroela Media gesê hy en vriende was omstreeks 20:00 besig om vleis te braai toe sy honde meteens “snaaks” geblaf het.

“Ek het aanvanklik gedink daar is ʼn slang. Ons woon teen ʼn berg en hier is baie slange. Ek het in die huis gehardloop om my haelgeweer te gaan haal,” het die man gesê.

“My vrou skreeu toe dat sy mense se skaduwees sien en skielik storm daar ʼn baie lang man op ons af. Ek self is 1,91 meter lank en die man nóg langer as ek.”

Volgens die boer het die aanvaller met sy hande omhoog op hom afgepyl en hy het gedink die man het ʼn wapen in sy hand. Hy het toe ʼn waarskuwingskoot afgevuur, maar die man het op hom afgestorm en glo geskreeu: “I’m going to kill and rob you!”.

Die boer het nog ʼn waarskuwingskoot afgevuur, waarna die aanvaller op die boer se vrou afgestorm het. Die jong boer, wat gestoei en vyf jaar lank selfverdedigingklasse op skool bygewoon het, het daarna die verdagte ʼn goeie opstopper toegedien, waarna die twee op die grond begin stoei het.

“Ek het vir my vrou geskreeu om hulp te ontbied. My pa-hulle woon op die plaas langs ons sʼn. Die huise is gelukkig net sowat 40 meter uitmekaar. Ek kan nie regtig onthou wat verder gebeur het nie, want die adrenalien het ingeskop. Ek weet net die man was baie sterk en aggressief.”

Die boer verduidelik alles het so vinnig gebeur – toe hy weer sien, was daar ander boere van die gemeenskap op die toneel en is die man deur veiligheidswagte van Securicon in hegtenis geneem.

Die boere van die gemeenskap het die gebied gefynkam vir die ander verdagtes, maar kon niemand opspoor nie.

Die aanvaller, moontlik van Mosambiek, is na die plaaslike polisiestasie geneem.

Die boer was vol lof vir die boere van die gemeenskap, Securicon en die polisie wat blitsig op die toneel was. Niemand is ernstig tydens die aanval beseer nie.

“Was dit nie vir die selfverdedigingklasse destyds op skool nie, kon dinge baie anders uitgedraai het,” het die man gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

34 Kommentare

jongste oudste gewildste
Louise

Bly jy en jou vrou leef. Maar jy moes eintlik daai suurstof dief skiet. Behoorlik. Dat hy nie gou weer kan of wil ‘n boer beseer. Weet nie of hy ooit tronk sal sien nie? Sterkte vir julle!

Andre Traut

Ek is baie bly julle is veilig, en stem saam met Louise, jy moes sy draad net daar geknip het.

HPV

Mooi man! Jy het egter alle rede gehad om die aanvaller dood te skiet.

Appel

Ons moet almal selfverdedigings en beveiligingskursusse doen.

Margaret

Veels geluk! Ek dink net dit kon julle jul lewens gekos het om nie te skiet nie. Daarby gesê dit is nie maklik om n sneller te trek as jy op iemand mik nie… Ons is nie sulke dinge gewoond nie.