Jong Lichtenburg-rugbyspeler sterf

Cody Mulligan. Foto: Verskaf

Cody Mulligan. Foto: Verskaf

Cody Mulligan (22), die rugbyspeler van Lichtenburg wat drie weke gelede sy nek tydens ʼn wedstryd gebreek het, is Saterdag in ʼn hospitaal in Pretoria oorlede.

Woenie Viljoen, president van die Lichtenburg-rugbyklub, het die nuus aan Maroela Media bevestig. “Cody het net ophou asemhaal. Net nadat hy seergekry het, het die dokters vir ons gesê daar is ʼn goeie kans hy sal dit nie oorleef nie, aangesien sy diafragma en die spiere wat hom help asemhaal, beseer is en dit vir hom al hoe moeiliker sal raak om asem te haal. Hy is dood weens hierdie besering.”

Maroela Media het vroeër berig Cody is verlam gelaat nadat hy op 2 April tydens ʼn rugbywedstryd teen ʼn klub van Leeudoringstad met sy kop teen ʼn ander speler se bors vasgeduik, ʼn werwel in sy nek gebreek en sy ruggraat beseer het. Cody was sedert die ongeluk van sy nek af ondertoe verlam, maar was deurentyd vasbeslote dat hy weer sou kon loop en rugby speel, het Viljoen gesê.

Cody was ook ʼn IT-tegnikus by Viljoen se onderneming en ʼn vriend van Viljoen se dogter.

“Ons is almal stukkend oor Cody se dood, maar in my hart het ek vrede. Ek weet die Here het hom die geleentheid gegee om sy saak met Hom reg te maak voordat hy gegaan het,” het Viljoen gesê. Hy het verduidelik Cody het oor die afgelope drie weke in die hospitaal werklik sy lewe vir die Here gegee en onophoudelik gebid.

“Toe ek hom Woensdag vir die laaste keer gesien het, het ek vir hom gesê ek sal hom nou eers weer Sondag sien, omdat ons rugbywedstryde in die volgende paar dae moes speel. Hy het vir my gesê, ‘Oom, moenie oor my bekommerd wees nie. Ek is nooit alleen nie. Wanneer Oom-hulle nie hier is nie, is die Here altyd by my’,” het Viljoen hartseer gesê. “Hy het gesê al kan hy nie sy arms beweeg nie, weet hy hy maak sy hand deur die nag toe, want hy hou die Here se hand vas.”

Viljoen het gesê Cody se familie en sy vriendin, Cherise Poolman, hanteer die nuus baie swaar. “Behalwe vir die mense na aan hom, het hy so baie ander mense aangeraak. Selfs mense wat hom nie geken het nie, het my gekontak en vertel hoe Cody se geloof en positiewe gesindheid hulle inspireer,” het hy gesê. “Sy laaste drie weke op aarde het die wêreld verander. Sy laaste drie weke op aarde was ʼn getuienis vir die Here. En daarin vind ek my berusting.”

ʼn Gedenkdiens vir Cody sal na verwagting Donderdag in Lichtenburg plaasvind. Die reëlings sal in die week gefinaliseer word.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

21 Kommentare

jongste oudste gewildste
johann cb

Innige simpatie aan Cody se familie en vriende. Hy is waar ons graag wil wees – by ons Here. Sterkte!

Sarie Duvenhage

Cody jy was n ster op aarde. Jy is nou n ster by God. RIV Cody.

Liz

Verskriklik jammer, ek dink aan julle en bid vir julle!

Skapie

My simpatie met sy familie en meisie. Wonderlik om te weet hy is by Jesus.

Karlien

Woorde is daar nie. Baie sterkte aan oom Ivan (sy pa) Don (sy neef) en die res van sy geliefdes. Rus sag Codels.. Jy is nou waar jy hoort. Ons harte is stukkend maar jy is veilig. Jou pleki op aarde is leeg maar in die hemel is dit gevul.