Jong man ‘maak oë oop’ ná skietongeluk

Gustav Louw. Foto: Facebook

Die 22-jarige man in wie se hande ’n jaggeweer ontplof het, het sy oë oopgemaak en registreer as sy pa met hom praat.

Gustav Louw is Sondag in die waakeenheid van die Mediclinic Welkom opgeneem ná ’n skietongeluk op sy pa se plaas buite Theunissen in die Vrystaat.

Jannie Louw, Gustav se pa, het Donderdag aan Maroela Media gesê sy seun kan al self asemhaal, hoewel hy nog sporadies suurstof kry. “Hy het sy oë oopgemaak vanoggend, hoewel hy nog onder verdowing is. Ek het vanoggend met hom gesels en hy registreer. As ek sê: ‘Gustav, pappa is hier,’ dan draai hy sy kop na my toe om vir my te kyk en knik sy kop.”

Volgens Louw kan sy seun ook sy regterhand en -been beweeg, maar is daar nog nie beweging aan sy linkerkant nie. Hy het gesê hulle wil Gustav na ’n hospitaal in Bloemfontein oorplaas waar neurochirurge na hom kan omsien.

“Daar is egter nog bloeding en swelling op sy brein, so hy moet vir eers stilgehou word en hy moet eers heeltemal stabiel wees. Waar daar lewe is, is daar hoop”

Volgens Louw was paramedici van Netcare911 blitsvinnig op die toneel ná die ongeluk net na 11:00 plaasgevind het en kon dinge baie anders gewees het as dit nie die geval was nie.

Die geweer wat ontplof het.

’n Stukkie metaal van ongeveer 2 cm lank sit in die agterkant van Gustav se brein vas nadat dit van die .308-geweer afgeskiet het en deur sy voorkop, net onder sy haarlyn, sy skedel deurdring het. Die metaal kom vermoedelik van die geweerslot. “Daar is net ’n klein krapmerkie in sy gesig. Die dokters het gesê hulle gaan die metaal glad nie verwyder nie, aangesien dit net meer skade aan die brein kan aanrig.”

Daar is ook skrapnel in Gustav se regterhand, voorarm en skouer wat nog verwyder moet word. Volgens Louw is sy seun ’n baie goeie skut en behoort hy aan die Suid-Afrikaanse Jagtersvereniging. Hy het gesê Gustav het ’n vriend van hom se geweer op die skietbaan op die familie se plaas ingestel en dit het ontplof toe hy ’n skoot afvuur. Hulle het herlaaide patrone gebruik.

Louw het gesê die polisie se forensiese eenheid het die geweer op die plaas gaan haal om te probeer vasstel wat presies gebeur het. Die geweer is erg beskadig in die ontploffing.

Gustav se vriende wat by was toe die ongeluk gebeur het, kry intussen berading.

Gustav bly en boer op die plaas waar die voorval plaasgevind het. Hy en sy pa boer met wild en beeste.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

15 Kommentare

jongste oudste gewildste
Sjoe

Sjoe dit bly maar skokkend, ten minste weet ons nou hy is in goeie hande en maak vordering. Ons het net die foto’s ontvang – dan gaan daar maar baie gebede saam, want iewers in die ongeluk staan hartseer ouers. Sterkte vir julle as gesin en vir die jong man.

Dawid

DIt lyk soos n ourige jag geweer dan sit hulle mos silencers op en hardloop warem rontes deur die ding. Die yster met tyd ontwikel swak plekke en dit kan maak dat dit nie die hoe druk kan hanteer nie. Sterkte ou seun hoop jy kom gou weer reg!

Gerrit van Wyk

Hallo Dawid nee maat kom ons wag vir die kenners voor ons begin spekuleer wat gebeur het. Daar is baie faktore wat kan lei tot so n ongeluk. Baie sterkte aan die familie in die tyd.

Sportskut

Die redes hoekom ‘n vuurwapen kan ontplof is legio. Die werklike rede sal deur forensiese toetse bepaal word, so kom ons los maar die ekspert menings en bid dat die seun gesond sal word.

Gesiggie

So verlig dat Gustav al beterskap toon, kan net dink waardeur sy ouers moet gaan, bly praat met hom, hy moet weet jul is daar, mag God genees waar daar skade is… sterkte aan die Familie en vriende