Jong pa tydens plaasaanval vermoor

Argieffoto

Argieffoto

Jakes van Deventer (35) is Dinsdag in die vroeë oggendure tydens ʼn aanval op ʼn plaas naby Bela-Bela (Warmbad) in Limpopo vermoor.

Kol. Ronel Otto, provinsiale polisiewoordvoerder, het aan Maroela Media gesê vier verdagtes het die man en sy gesin omstreeks 01:00 in hul huis oorval. Hulle het glo toegang tot die huis verkry deur die kombuisdeur en veiligheidshek oop te breek.

“Die verdagtes het die slagoffer in sy slaapkamer aangeval en met skerp voorwerpe gesteek. Hy is op die toneel dood. Die verdagtes het die vrou aangerand, maar sy kon die aanvallers afweer en het glo een van hulle met ʼn mes gesteek,” het Otto gesê.

Die verdagtes het twee televisiestelle, ʼn handsak en ʼn vuurwapen gesteel en van die toneel af gevlug.

Na wat verneem word, is die vrou se vingers onder meer gebreek.

Ian Cameron, AfriForum se hoof van gemeenskapsveiligheid, het gesê sy is na die St. Vincent’s-hospitaal in Bela-Bela geneem vir mediese behandeling.

Die paartjie se drie kinders en hul ouma was tydens die aanval in die huis. Na wat vasgestel kan word, is hulle erg getraumatiseer.

Die polisie het reeds van die klere en die televisiestelle teruggevind.

Niemand is nog in verband met die voorval in hegtenis geneem nie. Die polisie is op die toneel om met die hulp van spoorsnyers en die honde-eenheid na die verdagtes te soek.

Lees ook die opvolgberig: Foto’s: Warmbad-plaasaanval: Ma veg verbete terug, verdagte later vasgetrek

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

36 Kommentare

jongste oudste gewildste
KAG

Waar de hel gaan hierdie eindig….. Nog ‘n dag, nog ‘n boer dood.. Vermoor deur satanskinders. Nee wat, hierdie land is ‘n gemors.

nig

Jinne mens moet behoorlik met oop oë slaap. Het honde nie geblaf en het niemand dan gehoor toe vieligheidsdeur ens gebreek word nie? Dit moes seker tog raas? Ek dink mens moet ook maar deesdae allerhande “traps” stel, bv sit ‘n leë koekblik voor deure dat dit omval en geraas maak as iemand inkom, allerhande goed waaroor hulle struikel en val by deure en so – ja dis dalk moeite en klink miskien simpel, maar enigiets is beter as niks. Hoe meer geraas gemaak word hoe gouer kan mens dalk reageer, almal toesluit in ‘n vertrek en hulp ontbied.

joey

Julle wil mos nie my kommentaar wys nie

scalla

Dit kan mos nie so aangaan nie, owerhede kan mos sien dit gaan net oor moord en doodslag, vier lafaards, sterkte aan die gesin.

Elizabeth

Wanneer word daar opgetree teenoor die plaasmoorde daar word net gepraat daaroor en niks gebeur nie hoeveel moet nog vermoor word voordat daar opgetree word bring die doodstraf terug