Jong pa vir twee selfone op kleinhoewe vermoor

Nico Ras en sy seun Dean . Foto: Verskaf

Nico Ras en sy seun Dean . Foto: Verskaf

ʼn Jong pa van Pretoria is Vrydagaand op ʼn kleinhoewe buite die stad deur ʼn bende van nagenoeg agt mans koelbloedig vermoor vir twee selfone.

Nico Ras (31) was Vrydagaand omstreeks 23:00 buite ʼn kommunehuis op ʼn kleinhoewe in Kameeldrift-Wes besig om ʼn sigaret te rook toe hy deur die gewapende mans oorval is. Hy is eers met die kolf van ʼn geweer op sy oogbank geslaan waarna hy so hard in sy ribbes geslaan is, dat dit gebreek het.

“Hy was besig om terug na die huis te struikel toe hulle hom in sy rug geskiet het,” het Ras se gebroke vrou, Antoinette (36), Maandag aan Maroela Media gesê. Hulle het bly skiet en hom twee keer in die maag en ook in die sy getref.

Sy het gesê hul vriende, JJ Venter (25) en sy verloofde, Marlise Jacobs (22), en nog ʼn gesin woon ook in die kommune. Altesaam vyf gesinne en twee enkellopendes woon op die kleinhoewe.

“Dit het soos ʼn oorlogsone geklink. Ek het minstens tien skote gehoor,” het Jacobs aan Maroela Media gesê. Sy en Venter was tydens die aanval in hul kamer saam met Jacobs se vierjarige dogter, Abigail. Venter het opgespring om hulle in hul kamer te beveilig, maar is van buite af deur die venster geskiet. Hy is in sy rug geskiet.

Intussen het een van die aanvallers toegang tot Antoinette se eenheid bekom deur ʼn badkamervenster oop te breek. Sy en Nico se seun, Dean (wat oor twee maande twee jaar oud word), was tydens die aanval in die kamer. Nico was ʼn veiligheidsbeampte en Antoinette kon sy pepersproei in die hande kry en ʼn aanvaller daarmee afweer.

“Skielik het iemand anders wat ook op die kleinhoewe was, twee skote afgevuur en daarna het almal gevlug. Sover ons kon vasstel is net die twee selfone, wat Nico by hom gehad het, gesteel,” het Antoinette bygevoeg.

Nico het van buite af om hulp geroep en gesê: “Bok, kom help my, ek is geskiet”. Sy het haar man ingehelp en sy wonde op hul bed met Dettol behandel. “Hy het vir my gesê hy is lief vir my en dat ek hom moet vergewe as hy ooit iets verkeerd gedoen het.”

Paramedici van Best Care-ambulansdienste was 15 minute later op die toneel en het met Nico en Venter na die Kalafong-hospitaal gehaas. Nico het Saterdag omstreeks 02:30 in die hospitaal aan sy beserings beswyk.

Venter is gestabiliseer en is Maandag reeds ontslaan. Antoinette en Jacobs het gesê hulle gaan nie terugkeer na die kleinhoewe nie. Antoinette en Dean woon nou by Nico se familie in Filadelfia Ark, ʼn plaas in die omgewing waar talle behoeftige mense en gesinne gehuisves en versorg word.

Antoinette het gesê Dean roep nog na sy pa en dat die twee onafskeidbaar was. “Nico was ʼn wonderlike man en ʼn fantastiese pa. Hy het baie omgegee vir ons en was altyd opgewek en vol grappe. Dean was altyd soos ʼn stertjie agter sy pappa aan as Nico nie gewerk het nie. Hy het Vrydagaand wakker geword toe ek Nico op die bed behandel het. Hy het Saterdag- en Sondagoggend wakker geskrik en geskree ‘Pappa eina, Pappa eina’,” het sy bygevoeg. Antoinette het nog nie toegang tot ʼn berader gehad nie, en sê sy fokus nou net om reëlings te tref dat Nico begrawe kan word.

Nico was die enigste kind. Buiten sy vrou en seun laat hy sy ma en stiefpa, Antoinette en Jimmy Reed, agter.

Jan Nel, die voorsitter van die Hercules sektor 4-gemeenskapspolisiëringsforum, het aan Maroela Media gesê daar is ʼn bende in die gebied wat al die afgelope twee jaar ʼn skrikbewind in die omgewing voer. “Hulle slaan toe op die weerloses op kleinhoewes en informele nedersettings. Hulle val nie net wit mense aan nie, maar ook swart inwoners en hulle steel gewoonlik kleiner items soos selfone, kontant en skootrekenaars,” het Nel gesê.

“Hulle is uiters gevaarlik en sal nie huiwer om te skiet nie. Donderdagaand was daar twee aanvalle skaars ʼn kilometer van waar Nico en JJ geskiet is. Tydens een voorval is ʼn Nigeriese dokter drie keer geskiet en beroof. Ons verneem dat hy stabiel is, maar steeds in die hospitaal.”

Nel het gesê die inwoners van die omgewing hou Dinsdag ʼn noodvergadering en hulle hoop dat ʼn verteenwoordiger van die Hercules-polisie hulle sal kom toespreek. “Ons het baie vrae vir die polisie.”

Kapt. Thomas Mufumadi, polisiewoordvoerder van die streek, kon ná verskeie pogings nie vir kommentaar bereik word nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

36 Kommentare

jongste oudste gewildste
Willie

Waar gaan die eindig? Dit lyk nou soos moor vir moor spelletjie… maak n witte dood en wen n Datsun? Mense die tyd is hier om saam te staan… ons volkie word vermoor, ling en regs…

Theresa B

Jip – En daar val ek weereens uit die bus met my kommentaar. Ek het nie eers gevloek nie maar seker omdat ek die woord rassis gebruik het. Maar hierdie klomp mag alles skryf en uitskreeu!!

PJ

Vra ek weer waar is de klerk en kie met al wysheid teewigte wigte en al Bach gaan seker nou weer vra of ek nie aan iets anders kan dink nie want my kommentaar aangaande de klerk raak afgesaag seker so maar feite bly feite en die waarheid maak seer

m

Dit lyk al hoe meer of hierdie mense in groot getalle nou op die plase en kleinhoewes toesak, dis lankal nie net 3 of so nie . Dis maak mens bekommerd want wie kan teen soveel veg en hulle weet dit al te goed??? Sterkte aan hierdie familie.

Jakes

Hulle weet al van die bende se bedrywighede vir 2 jaar , dis vrotsig , kan nie ñ bende in 2 jaar vang nie , pateties