Joodse matrikulant: ‘Ek wil nie sy lewe verwoes nie’

Danni Heymann het heeltemal oorweldig gevoel nadat sy die stemboodskap ontvang het. Foto: Facebook

Die Joodse matrikulant wat die afgelope week ʼn haatdraende stemposboodskap van ʼn gr. 8-leerder gekry het waarin hy sê sy moes in die Jodeslagting gesterf het, sê sy wil nie hê die seun se lewe moet verwoes word nie, maar hoop hy leer uit sy fout en besef woorde maak saak.

Suid-Afrika se klein Joodse gemeenskap van sowat 70 000 siele het die afgelope week met skok kennis geneem van die stemposboodskap wat die gr. 8-leerder aan die eksklusiewe private skool Treverton-kollege op Mooirivier in KwaZulu-Natal gestuur het aan Danni Heymann, ʼn gr. 12‑leerder aan die Joodse hoërskool King David Victory Park, Johannesburg.

In ʼn voorbladberig skryf die Jewish Report die boodskap het gelui: “Ons stem almal saam jy moes in die Holocaust omgekom het. Jy weet daai asbakke vol Joodse mense … miskien moes hulle jou by daai hopie [as] gevoeg het.”

Die seun sluit die boodskap af met ʼn “grap”: “Wat noem ʼn mens ʼn vlieënde Jood? Rook!” terwyl sy maats hoorbaar op die agtergrond lag.

Heymann, wat op die oomblik haar matriekeindeksamen skryf, het aan die Jewish Report gesê dit het begin met ʼn stemposboodskap wat sy aan ʼn vriend van die Treverton-leerder gestuur het nadat hy ʼn vriendin van haar in die sosiale media geboelie het.

“Toe ek sy boodskap kry, het ek net begin huil,” het sy vertel. “Dit het my hart gebreek, nie net omdat dit ʼn ‘grap’ oor die Jodeslagting is nie, maar omdat ʼn 15-jarige so iets kan sê en geen berou voel nie.”

Heymann se oupagrootjie was een van nagenoeg ses miljoen Jode wat die Nazi’s voor en tydens die Tweede Wêreldoorlog stelselmatig tydens die Jodeslagting of Holocaust uitgewis het.

Dit het my hart gebreek, nie net omdat dit ʼn ‘grap’ oor die Jodeslagting is nie, maar omdat ʼn 15-jarige so iets kan sê en geen berou voel nie.

Sy het die seun laat weet sy sou sy boodskap deel en sy identiteit probeer vasstel, maar hy het haar op WhatsApp blokkeer.

Haar inskrywing het soos ʼn veldbrand versprei en daartoe gelei dat Heymann ondersteuningsboodskappe uit alle wêrelddele ontvang het. Dit was vir haar ʼn riem onder die hart, maar ook oorweldigend vir dié 18-jarige.

Al is sy besig om vir haar eksamen voor te berei, het sy 24 uur lank nie ʼn oog toegemaak nie.

Die Suid-Afrikaanse Joodse Raad van Afgevaardigdes (SAJRA) het dadelik ingegryp om haar by te staan en met die skool gesprek te voer. Kean Broom, die skoolhoof, het Heyman Woensdag gebel om persoonlik verskoning te vra en te gesels oor hoe die onreg reggestel kan word.

Wendy Kahn, die SAJRA se nasionale direkteur, sê telkens wanneer anti-Semitisme voorkom, besluit hulle in oorleg met kenners hoe om die spesifieke geval te benader.

“Ons behaal uitstekende resultate in samewerking met skole ten opsigte van opvoeding en gedragsverandering,” vertel sy. “Ons doelwit is nie om berouvolle oortreders te straf nie, maar gedragsverandering te bewerkstellig.”

Ek het werklik trots gevoel en bewus geword van waar ek tuishoort. Ek is so dankbaar ek is Joods.

“Ons probeer altyd sulke gevalle in ʼn leerervaring omskep,” sê Mary Kluk, die raad se president. “Dis nie vir ons om te veroordeel nie. Al wat ons dadelik kan doen, is om die skole en leerders te help om anders te reageer op mense wat nie soos hulle is nie.”

Broom het aan die Jewish Report gesê hy wil die Suid-Afrikaanse Joodse gemeenskap opreg om verskoning vra vir die seerkry wat die voorval veroorsaak het.

Volgens hom is opvoeding oor die Holocaust deel van die skool se geskiedenisleerplan en besoek leerders wat dié vak neem, die Holocaust-sentrum in Durban. Hy het onderneem dat dié besoeke voortaan alle leerders sal insluit, ongeag hul vakkeuse.

Heymann se grootste wens is dat die seun uit die ervaring sal leer en verstaan woorde dra gevolge. Sy sien die goeie in die voorval raak, want dit het haar groter waardering vir haar mense en haar godsdiens gegee. “Ek het werklik trots gevoel en bewus geword van waar ek tuishoort. Ek is so dankbaar ek is Joods.”

Sy sê sy was van plan om volgende jaar in Amerika te gaan werk wanneer sy die eerste keer buite Suid-Afrika sal reis, maar ná hierdie voorval wil sy alles in haar vermoë doen om seker te maak haar eerste oorsese besoek is aan die Joodse staat Israel.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

90 Kommentare

jongste oudste gewildste
Paul

En die ergste is die seun is nie onkundig oor die Joodse geskiedenis nie, waar anders kom hy aan sy uitsprake. Dis skokkend. ‘n Verpligte voorgeskrewe boek vir alle skoliere is ‘Die rutelose Shalom” van Abraham H de Vries.

WH van der Merwe

Swart seun?

ChrisE

Geen haan sal daaroor kraai indien iemand ‘n soortgelyke boodskap aan ‘n Afrikaanse kind sou gestuur het nie, bv jy moes ook in die Boere oorlog gesterf het. Waaroor die bohaai?

Ilse

Sal sy identiteit bekend gemaak word ?
Wat ‘n skande om so-iets kwyt te raak.

ANA

Skuus my,die skoolhoof vra haar om verskoning en die rassistiese klein bog kom skotvry hiervan af…?
Verstaan ek nou reg?