Skermgreep uit die kringtelevisiebeeldmateriaal (Rusa/Facebook)
ʼn Veiligheidsbeampte is in ʼn kritieke toestand ná hy Woensdag tydens ʼn rooftog by die Gateway-winkelsentrum in KwaZulu-Natal geskiet is.
Reaction Unit South Africa (Rusa) se beheerkamer het sedert omstreeks 14:30 verskeie oproepe ontvang van inkopiegangers wat inligting oor die rooftog verskaf het. Die beampte aan diens het gehoor ‘n groot groep verdagtes het op Damjee Jewellers en NWJ toegeslaan, het Rusa in ʼn verklaring gesê.
Alle beskikbare reaksiebeamptes en Rusa-paramedici is na die toneel ontbied. “Met hul aankoms by die toneel het hulle ʼn veiligheidsbeampte in die parkeerterrein aangetref wat geskiet is.”
Hy was in ʼn kritieke toestand en is op die toneel deur paramedici van Netcare 911 gestabiliseer.
Die rowers het verskeie skote gevuur, aldus inkopiegangers. Verskeie 9 mm en aanvalsgeweer-doppies is in die sentrum gevind.
“Die rowers het na bewering met ʼn wit Toyota Corolla en ʼn wit Mazda-bakkie gevlug.”
Shawn Herbst, woordvoerder van Netcare 911, het gesê die veiligheidsbeampte is in die maag geskiet. Hy het bevestig die man is na ʼn nabygeleë hospitaal geneem vir dringende behandeling.
Ooggetuies het aan Netcare 911 gesê daar was tussen 10 en 15 verdagtes wat op die juwelierswarewinkels toegeslaan het.
Kringtelevisiebeeldmateriaal van die voorval is beskikbaar in die kommentaargedeelte op hierdie Facebook-plasing.
Ag agbare president ons hoop hulle vang hulle.
KZN raak rof. Dalk moet Cele daar gaan rondloop instede van die Wes-Kaap se strande…
Hel! Nogals aanvalsgewere en 9mm hulle vat werklik nie snert nie! Ek is seker dis gelisensieerd…
Sterkte aan die veiligheidsbeampte!
Welkom in die mak wildeweste waar die sherrif n groot hoed dra!!
En is dit my verbeelding of het die winkels (een ten minste) nie sekuriteitshekke by hul ingang gehad nie?
Die rowers kon net instap so hoe stupid is dit in die nuwe sa.