‘Jy het my nommer,’ sê Eben vir Bakkies

Die Springbokke se Eben Etzebeth. Foto: Patrick Hamilton/AFP.

Vergeet maar van die komende kryt-stryd tussen Eddie Hall en Hafthor Björnsson, ’n mens sal bereid wees om op te dok vir ’n kaartjie as Eben Etzebeth en Bakkies Botha sou besluit om die bokshandskoene vir ’n vertoongeveg nader te trek.

Veral noudat daar ’n lekker storielyn tussen die twee Springbokbrekers ontwikkel het.

Dit het alles begin nadat die 30-jarige Etzebeth aangedui het dat hy teen die einde van die huidige Europese seisoen om persoonlike redes Toulon vir die Haaie gaan verlaat.

“Ek sal egter steeds my beste vir die span gee om sodoende te verseker dat sy posisie op die punteleer verbeter,” het hy in ’n onlangse verklaring gesê.

Dit was egter een te veel vir Botha – ’n vuurvreter wat in sy speeldae ’n rits titels saam met Toulon gewen het.

Die 42-jarige voormalige slot het in ’n onderhoud met die Franse koerant Midi Olympique gesê dat Etzebeth ’n ongelooflike speler is, maar selde op sy beste vir Toulon is.

“Hy is die voorste slot ter wêreld, maar hy speel ongelukkig net sy beste rugby vir die Springbokke. In die kleure van Toulon is hy voortdurend beseer, herstel van harsingskudding en speel uiteindelik nooit nie,” het Botha aangevoer.

Volgens die voormalige Bloubulspeler is Etzebeth nie gemaak vir rugby in Frankryk nie, terwyl hy sy rug op die klub se probleme gedraai het met sy beplande terugkeer na Suid-Afrika.

“Dit is teleurstellend. Ek is mal oor Eben, maar jy kan nie met jou aankoms by Toulon sê dat jy “die kampioen van Frankryk” wil wees en dan ’n rukkie later – sonder dat jy veel van ’n verskil by die klub gemaak het – loop nie.”

Bakkies Botha het in sy speeldae ’n spul trofees saam met Toulon gewen. Foto: Bertrand Langlois/AFP.

Botha het drie keer vir Toulon gehelp om die Europese Kampioenskap te wen, terwyl hy ook die Top 14-trofee omhoog gehou het.

Nodeloos om te sê was Etzebeth – ’n Springbok-veteraan met 97 internasionale toetse agter sy naam – nie te ingenome met Botha se kritiek nie.

“Bakkies Botha – ek neem kennis. Jy het my nommer vir die volgende keer wat jy jou mening wil afdwing,” het hy getwiet terwyl hy die oud-Springbok sommer aan sy erekode herinner het.

Etzebeth was geruime tyd langs die veld nadat hy in die Bokke se toets teen Engeland op Twickenham vir die derde keer harsingskudding opgedoen het.

Dan het hy Toulon se jongste wedstryd teen Perpignan met ’n kuitbesering misgeloop en hy sal waarskynlik vir nóg ’n maand op die krukkelys wees.

Tog het hy die een skittervertoning na die ander vir die nasionale span gelewer en was hy as’t ware die gom wat die Springbokpak aanmekaar gehou het.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

27 Kommentare

jongste oudste gewildste
Anoniem

Maklike sommetjie Eben, hoe lank was jy by Toulon, hoeveel keer het jy vir Toulon gespeel, hoeveel is jy betaal en hoe lank was jy buite aksie gedurende die tydperk?

Renier

Niemand gee om nie.Maroela jaag weer sensasie aan.

domheks

eiertjie te le….

Riaan

Jy moet sê OOM Bakkies my broer, bietjie respek toon aan die ouens wat daar was en deur dit is. In sy glorie dae sou hy jou ‘n goeie pakslae gegee het, moontlik selfs nogsteeds

Sobymykoolkop

Totaal nie ń aanhanger of ondersteuner van een van die 2 nie, maar Bakkies is 100% reg. As ek heer Eben was sou ek te skaam gewees het om die miljoene van Toulon te vat, want dis beslis nie ” verdien ” nie.