’n Polisiebeampte is Dinsdagaand in Kaapstad doodgeskiet toe hy ’n rooftog-verdagte in hegtenis geneem het.
Brig. Novela Potelwa, woordvoerder van die polisie, sê in ’n verklaring konst. Thando Sigcu (38) het die verdagte omstreeks 21:00 in Heerengrachtstraat in hegtenis geneem toe twee beamptes van die Stad Kaapstad op die toneel stilgehou het.
Volgens Potelwa is skote afgevuur en die polisiebeampte is noodlottig gewond. Die verdagte is ook in die proses gewond en na ’n hospitaal geneem vir mediese behandeling.
Lt.genl. Yolisa Matakata, provinsiale polisiehoof, het haar medelye met die konstabel se familie betuig.
Sigcu was sowat vyf jaar in die polisiediens en word beskryf as ’n verantwoordelike en gedissiplineerde polisielid.
Die Valke ondersoek nou die voorval.
Klink my sy kollegas is verantwoordelik vie sy dood.
Effens onduidelik wat ‘n “beampte van die Stad Kaapstad” is.