Kaapstad: Fase 1 van water-rampbestuurplan in werking

Kaapstad (argieffoto) Foto: HPBotha, Pixabay

Inwoners in Kaapstad word gewaarsku dat waterrantsoenering tot onderbrekings in watertoevoer kan lei, weens die erns van die vlak van die beskikbare water.

Watertoevoer sal waarskynlik onderbreek word in spitstye in die oggend (tussen 05:00 en 09:00) en in die aande (tussen 17:00 en 21:00) indien die verbruik hoër is as die vereiste vlakke, het die Stad Kaapstad in ʼn verklaring gesê. “Die Stad sal voldoende watertoevoer beskikbaar maak, maar as die verbruik te hoog is, sal diegene in hoogliggende gebiede onderbrekings ervaar. Die Stad doen ʼn beroep op diegene in laagliggende gebiede om hul waterverbruik te verminder.”

Die dienste sal herstel word sodra die verbruik verminder word binne die beperkings van vlak 5-waterbeperkings. “Indien ʼn gebied meer as die daaglikse beperking gebruik, sal rantsoenering deur middel van waterdrukbestuur toegepas word totdat die perk bereik word. Dit is dus moeilik om te sê presies hoe lank die onderbrekings sal duur, aangesien dit van die gedrag van die verbruikers afhang.”

Waterrantsoenering werk nie soos beurtkrag (elektrisiteit) nie. Tydens beurtkrag word bepaalde gebiede vir ʼn twee uur periode afgeskakel. Tydens waterdrukbestuur is water steeds beskikbaar, maar weens swak waterdruk kan persone in hoogliggende dele of in geboue, met meer as een verdieping, onderbrekings ervaar.

Die stad is ook reeds besig met noodskemas en na verwagting sal tussen 130 en 240 miljoen liter water per dag tussen Desember 2017 en Mei 2018 beskikbaar gemaak word deur middel van ontsoutingsaanlegte, hergebruik van water en grondwateronttrekking.

“Die vermindering van waterverbruik is egter steeds ononderhandelbaar, ongeag van die verskillende planne wat ingestel sal word. Ons versoek alle waterverbruikers om ons te ondersteun sodat ons deur hierdie droogte kan kom,” het Xanthea Limberg, burgemeesterskomiteelid van informele nedersettings, water en afvaldienste, gesê.

Damvlakke staan tans op 38,5%, met bruikbare vlakke van 28,5%. Die beperking van verbruik is tans 585 miljoen liter water per dag.

Wat inwoners moet doen

  • Hou tussen 5 en 10 liter drinkwater beskikbaar (gemiddeld van vier persone per huishouding)
  • Hou bykomende water beskikbaar vir troeteldiere
  • Oorweeg jou waterverbruik tydens spitstye; moenie langer as ʼn minuut stort nie; stort voor 06:00 in die oggend of ná 21:00 in die aand
  • Hou kennisgewings dop oor waterdrukbestuur by CTAlerts en die Stad Kaapstad se webwerf
  • Wanneer jy ʼn gebrek aan watertoevoer ervaar, en voor jy die Stad se kontaksentrum skakel, maak eers seker of jou buurman ook ʼn onderbreking in watertoevoer beleef as gevolg van rantsoenering
  • Maak seker dat alle krane toegedraai is wanneer dit nie in gebruik is nie, om skade en oorstromings te voorkom wanneer die waterdruk herstel word
  • Wanneer die watertoevoer herstel word, kan die water melkerig lyk weens die erge waterdrukvermindering. Moenie die aanvanklike water mors nie – stoor dit en gebruik dit om die toilet mee te spoel.
  • Stoor noodwater in ʼn koel, donker plek – weg van lig en stof
  • Bottels moet geseël bly om besoedeling te voorkom
  • Maak seker waterbottels word duidelik as “drinkwater” gemerk, in teenstelling met water wat nie gedrink mag word nie
  • Hou water, wat nie gepas is vir drinkwater nie, om toilette mee te spoel (veral in verdiepinggeboue, aangesien die hoër vlakke moontlik tydens die waterdruksiklusse nie water sal hê nie
  • Gebruik minder toiletpapier, aangesien dit minder water sal benodig om te spoel en verstoppings sal voorkom. Spoel slegs die toilet wanneer nodig en maak die deksel van die toilet toe wanneer urine nie gespoel word nie. Gebruik behoorlike ontsmettingsmiddels en gesigmaskers en handskoene waar nodig
  • Gebruik eerder enkellaagtoiletpapier om verstoppings te voorkom
  • Gebruik eerder waterlose handsaniteerders waar moontlik
  • Maak seker dat alle brandblussers in ʼn werkende toestand is

Wat inwoners nie moet doen nie

  • Moenie oormatige munisipale water stoor nie
  • Moenie ʼn enkele druppel water mors nie
  • Waar water, wat nie gedrink kan word nie, gestoor word vir toilette, moet dit nie vir langer as ʼn paar dae gestoor word nie
  • Moenie om die bos gelei word deur persone wat aanvoer hulle is van Stad Kaapstad om waterdoeltreffende toestelle in huise te installeer nie – hulle wil slegs toegang bekom tot jou eiendom
  • Moenie vir langer as ʼn minuut stort nie
  • Moenie alternatiewe waterbronne vir enige gebruike buite die huis aanwend nie, as gevolg van die erge droogte. Gebruik dit slegs binnenshuis om toilette mee te spoel

Vir meer inligting, besoek die Stad Kaapstad se webwerf en sien verdere inligting oor waterbeperkings.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

20 Kommentare

jongste oudste gewildste
pieterdp

Die water probleem is al jare aan die gang en nog steeds het die ANC minister van waterwese niks gedoen nie.
Nou probeer die ANC mint uit die vir knorsing slaan soos altyd. Almal se skind nie die ANC nie. Maat die bedrog en omkoop tap soos stroop van hul lipe af.

Linda

Gee inwoners idees hoe om Grey water te recycle.. Bad/stort water, skottelhoed water asook wasgoed water kan hebruik word …

Vaaldam

Ek hier teen die wal van die Vaaldam het gesien hoe die dam tot oorlopens toe vol raak in ‘n ommesientjie van 25% tot 105%. Mag dieselfde genade julle tref daar in die Kaap.

Juffie

Wonder nou net watter raad is daar vir die magdom muskiete wat nou uitbreek weens staande swembadwater?

paul visser

Pateties Kaapstad Pateties, Die A.N.C. sou die krises beswaarlik swakker kon hanteer.