Kaapstad lê beslag op duisende sigarette

sigarette

(Foto: pixabay)

Die metropolisie in Kaapstad het hul hande vol met winkeleienaars wat steeds sigarette verkoop en só die bepalings van die staat van algehele afsondering verontagsaam.

“Ons wetstoepassingsoptrede wys talle winkeliers verkoop steeds sigarette. Hoewel ʼn mens begrip het vir die beginsel van vraag en aanbod, is die verkoop van sigarette onwettig en winkeliers stel hulself bloot aan die gevaar van inhegtenisneming,” het JP Smith, burgemeesterskomiteelid vir veiligheid in Kaapstad, gesê.

Beamptes het beslag gelê op 179 pakke tabak, 918 los sigarette, 4 894 pakkies sigarette en verskeie bokse met sigarette, het hy gesê.

Tientalle ander mense is aangekeer vir verskillende oortredings wat insluit dronkbestuur, openbare geweld, die onwettige besit van dwelms en oortredings van die Wet op Rampbestuur.

Beslag is gelê op mandrax, tik en dagga.

JP Smith, Kaapstad se burgemeesterskomiteelid vir veiligheid. (Foto: Brendan Magaar/ANA)

Vier mense is in Soutrivier in hegtenis geneem nadat hulle glo by sakeondernemings in die gebied probeer inbreek het, het Smith gesê.

Metropolisielede het 1 937 voertuie voorgekeer en 1 988 boetes uitgereik.

Smith het gesê hoewel daar weens die staat van algehele afsondering minder voertuie op die paaie is, is mense oënskynlik meer roekeloos en meer voorvalle van spoedoortredings is aangemeld.

Kaapstadse metrobeamptes het 5 536 voorvalle van spoedoortredings aangemeld, 11 motoriste in hegtenis geneem en 19 minibussies geskut.

“Hoewel daar ʼn beduidende afname in die aantal voertuie op ons paaie is, lyk dit of diegene wat wel agter die stuur is dink dit is in die haak om vet te gee. Die meeste van die spoedoortredings was tussen 50% en 150% meer as die spoedbeperking,” het hy gesê.

Die stad het ook 20 mense vir kabeldiefstal in hegtenis geneem.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

20 Kommentare

jongste oudste gewildste
Rodger17

Stop asb nou die drank en sigaret plundery sap!Het jul nog nie genoeg gevat wat nie jul eiendom is nie!

Boortor

Los die sigarrette en drank en keer die virus!! Dis tog waaroor ons in huisarres is! Dan nie!??

Fedup

Why do they waste time, resources and energy on sigarette sales? Concentrate on crime. If that is not too much to ask.

Cryptogruppe

Ons lewe in ‘n “nannie-staat” en dit gaan net erger word.

Burgermeester

Ramaphosa was korrek toe hy gese het dat die inperkingstydperk diepliggende probleme bloot stel. Diepliggende probleme soos ‘n onbevoegde regerende party, korrupte parlementslede, ‘n polisiehoof wat dink hy is hoof van die mafia, en ‘n president wat te kort skiet aan kritiese denke. Hoekom wil jy mense verder straf wat in afsondering vasgevang is? Gee die mense hulle sigarette, laat hulle rook as dit hulle beter gaan laat voel.