‘n 28-jarige kabeldief is dood aangetref langs ‘n pad in Kwandengezi, KwaZulu-Natal.
Kol. Jay Naicker, woordvoerder van die polisie, sê die kabeldief het wonde aan sy kop en lyf gehad toe die polisie hom Donderdag gevind het. “Daar word beweer die oorledene is betrap terwyl hy kragkabels probeer steel het waarna hy deur glo deur gemeenskapslede aangerand is.”
Naicker sê die polisie ondersoek ‘n saak van moord maar dat niemand nog in hegtenis geneem is in verband met die voorval nie. “Hulle het hom glo daarvan beskuldig dat hy kragonderbrekings in die area veroorsaak aangesien talle huis elektrisiteitprobleme het weens kabeldiefstal. Hy is glo aangerand, met ‘n skerp voorwerp gesteek en doodgekap.”
Lt.genl. Mmamonnye Ngobeni, provinsiale polisiehoof, het die voorval veroordeel. “Ons doen ‘n beroep op die gemeenskap om saam met die polisie en gemeenskappolisiëringsforums te werk deur vir hulle inligting te gee oor kriminele aktiwiteite in hulle areas sodat misdadigers in hegtenis geneem kan word. Mense moet nie die reg in eie hande neem nie.”
