Kabinetskommeling bied geleenthede vir Ramaphosa

President Cyril Ramaphosa
(Oktober 2018) Foto: Kopano Tlape/GCIS

Die kabinetskommeling wat deur omstandighede op pres. Cyril Ramaphosa afgedwing word, bied aan hom die geleentheid om die land se regering te versterk.

Minstens twee veranderings gaan nodig wees weens die afsterwe van die minister van omgewingsake, Edna Molewa, en die versoek deur die minister van finansies, Nhlanhla Nene, om van sy pligte onthef te word.

In Nene se geval lyk dit nie asof Ramaphosa ʼn ander keuse gaan hê as om in te stem om hom te laat gaan nie. Eerstens het Nene aanvanklik in die openbaar gelieg oor of hy die Guptas tuis besoek het. Die vraag is waarom, en waaroor hy dalk nog lieg.

Tweedens het Nene gekies om twee en ’n half jaar te swyg oor wat onder meer met die gepoogde kernwapenooreenkoms gebeur het voordat hy met die sak patats vorendag gekom het. In daardie tyd het die land, onder meer deur sy stilswye, groot skade gely weens staatskaping.

Derdens blyk dit dat Nene se seun ’n groot geldelike inspuiting van die Openbare Beleggingskorporasie (OBK) gekry het terwyl Nene as adjunkminister van finansies die voorsitter van die OBK was. Dit is ’n regstreekse botsing van belange – en een wat Nene verkies het om te verswyg.

As voorloper vir die sleutelposisie van minister van finansies word die naam van die Gautengse LUR vir finansies, Barbara Creecy, genoem. Dit is ’n ope vraag of sy die gravitas het wat die pos vereis.

Ander name wat genoem word, is dié van Mcebisi Jonas, voormalige adjunkminister van finansies, en Enoch Gondongwana, lid van die ANC se nasionale uitvoerende komitee.

Ramaphosa het ook die opsie om ’n kundige van buite die politiek te nader om as minister van finansies te dien.

Wat die ministerie van omgewingsake betref, is daar nie juis iemand in die ANC se parlementêre koukus wat uitstaan nie. Die geleentheid bestaan egter om die kabinet te skommel, nuwe bloed in te bring en van die swakker skakels te vervang.

Die twee heel swakste skakels is sekerlik Malusi Gigaba (binnelandse sake) en Bathabile Dlamini (vroue, kinders en gestremdes). Albei is – afsonderlik en oor verskillende kwessies – in die hof aan meineed en ondergrawing van die Grondwet skuldig bevind.

Eintlik is hul posisie in die kabinet onhoudbaar, maar Ramaphosa sal weet dat die afdanking van Gigaba (’n voormalige leier van die ANC-jeugliga) en/of Dlamini (tans leier van die ANC-vroueliga) vir hom as nasionale ANC-leier baie negatiewe gevolge kan inhou binne die mynveld van ANC-magspolitiek.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

22 Kommentare

jongste oudste gewildste
Nettie

Ek wens hy wil die kabinet só skommel dat hy homself sommer as President UITskommel – uit die kabinet, uit die politiek en UIT DIE LAND uit. En mag hy sommer maar ‘n paar van sy ANC kaders en hul 100’e duisende “ingevoerde” stemmers vir 2019 saamneem.

Reg

Bring vir Gordan terug na finansies.

J van Rustenburg

Hy sal moet kies tussen SA eerste of sy eie politieke oorlewing

ne

Nou sal ons sien of CR regtig staatskaping wil hok slaan!

Paul

As hy maar net van die ACE in die pak en Mpumalanga se joker ontslae kan raak en natuurlik Jessie, maar dit is ‘n pie in the sky. Dalk slaan hulle nog die kitaar met die nuwe aanstellings.