Kampsbaai-moord: Beskuldigde wag steeds op bed in psigiatriese hospitaal

Die man van Guatemala wat aangekla word van die moord op ʼn Amerikaanse vrou in ʼn hotelkamer in Kampsbaai, wag steeds op ʼn bed in die Valkenberg- psigiatriese hospitaal waar hy sielkundig evalueer moet word.

Diego Novella (41) het Woensdag vlugtig in die Kaapstad-landdroshof verskyn. Regter Jackie Muller het beveel dat Novella in aanhouding bly tot sy volgende verskyning op 30 Oktober. Hy word in die hospitaalafdeling van die Pollsmoor-gevangenes aangehou.

Novella word daarvan beskuldig dat hy Gabriela Alban (39) op 29 Julie in ʼn luukse hotel in Kampsbaai verwurg en wreed seksueel aangerand het met ʼn krultang. Dit het later in die hof aan die lig gekom dat Novella gevind is waar hy halfkaal op ʼn strand rondgeloop het. Toe hy glo gevra is waar Alban is, het hy bloot geantwoord: “Sy is dood.” Haar liggaam is toe in hul hotelkamer aangetref.

Tydens Woensdag se hofverrigtinge het Asghar Mia, Novella se regsverteenwoordiger, gesê sy kliënt is nommer 83 op die waglys vir ʼn bed in die Valkenberg-hospitaal. Die verdediging het vroeër versoek dat Novella vir 30 dae se psigiatriese observasie gestuur word.

Lees alle vorige berigte oor die saak op Maroela Media.