Woede ná motoris gansies opsetlik doodry

Die gesin Egiptiese ganse steek Adderleystraat by die Groote Kerk (agtergrond) oor, oomblikke voor die bestuurder van die motor regs van hulle voet neergesit en twee van die babaganse doodgery het. Foto: DBV Kaap die Goeie Hoop via Facebook

Kapenaars het ontstoke gereageer nadat ʼn motoris blykbaar doelbewus oor ʼn gesin kolganse gejaag en twee van die babagansies doodgery het.

“Ek het pas gesien hoe hierdie hartelose, onmenslike persoon opsetlik twee babaganse op die hoek van Spin- en Adderleystraat [in die Kaapse middestad] doodry,” het Jessica Shelver, woordvoerder van die Wes-Kaapse onderwysdepartement, Vrydag op haar Facebook-profiel geskryf. Sy was een van die verbygangers wat dit sien gebeur het.

“Ek sê doelbewus, want ons het probeer keer dat hy by die verkeerslig wegtrek, maar hy het hulle gesien en eenvoudig bo-oor hulle gery. Wat ʼn walglike entjie mens!”

Een van haar Facebook-vriende, Bashier Sibda, was ewe verontwaardig. “Ons het dit Vrydagoggend sien gebeur,” skryf hy in reaksie op haar inskrywing. “Een van die veiligheidswagte en ʼn vrou het die ganse oor die straat help kom. Mense het nog foto’s geneem.

“Dit het hulle gelukkig gemaak net om die ganse daar in die straat te sien. En wat daai ou gedoen het, is ʼn wrede daad. Om hulle dood te ry, was ongevraag.”

Die DBV sê hulle het kennis geneem van die “hartelose” daad waarin die babaganse blykbaar met opset deur ʼn bestuurder in die Kaapse middestad doodgery is.

“ʼn Verbyganger was besig om die gesin Egiptiese ganse af te neem … toe die voorval gebeur wat tot die gansies se dood gelei het,” skryf die vereniging op sy Facebook-blad.

“Ons is besig om die eienaar van die motor se nommerplate na te gaan en het ook ʼn werknemer na die toneel gestuur om die oorskot bymekaar te maak vir die doel van ʼn nadoodse ondersoek. Ongelukkig was dit reeds verwyder en kon nie opgespoor word nie.”

Die DBV sê hulle is dankbaar vir die ooggetuies wat na vore gekom en verklarings afgelê het, sowel as fotografiese en videobewyse. “Ons vra dat enige ander getuies wat dié afskuwelike vertoning van minagting van en wreedheid teenoor diere asseblief hul weergawe van die gebeure by die Kaap die Goeie Hoop-DBV rapporteer.”

Die vereniging kan tydens kantoorure by 021 700 4158/9 gebel word, ná ure by 083 326 1604, of stuur ʼn e-pos na [email protected]

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

63 Kommentare

jongste oudste gewildste
Susan

Hoop di pes word swaar gestraf. Ni aldag dat ganse met hulle baba gansies di pad oor steek ni en dit nog op n kruising. Kry ma gans jammer dat sy 2 gansies moes verloor.

Danie

Stem saam. Net een verbetering: Afrikaans is “kolgans”

Piet

Ai wat in party mense se kop aangaan wil mens eerder nie weet nie. Wat de……………….?

Rodney van Rensburg

Wel ek moet sê julle vat bietjie lank.
(‘n Nommer Plastic vat nie so lank om adress ens te kry nie)
Daardie vark sal gestraf moet word.

Msp

Sooooo siek. Dis die monsters van die wereld.