Karl Reich-moord: Só trek speurder hulle vas

Karl Reich.

Die saak teen twee mans van Thabong in Welkom, wat daarvan verdink word dat hulle die 82-jarige Karl Reich vermoor het, is in die landdroshof in Bloemfontein tot aanstaande week uitgestel.

Maroela Media het vroeër berig dat Thanki Motseki (27) en Mojaleta Tseki (34) verlede week deur die Valke in hegtenis geneem is. ʼn Derde verdagte is steeds soek.

Dit het intussen aan die lig gekom dat Reich op die dag van sy verdwyning, in September verlede jaar, verwurg is en dat sy liggaam in die kattebak van een van sy voertuie na Pretoria vervoer is waar dit naby die Fonteinedal in ʼn stormwatersloot op die N14 gelaat is.

Reich het op raaiselagtige wyse by sy huis in Jim Fouchepark in Welkom verdwyn en hoewel plaaslike speurders alles in hulle vermoë gedoen het, is hy nooit gevind nie.

Twee maande gelede het Reich se familie die Bloemfonteinse privaat speurder, Leon Rossouw, se dienste bekom. Rossouw sê toe hy die saak oorneem, was daar reeds baie inligting deur verskeie mense aan Reich se familie oorhandig, maar niemand kon al die los drade bymekaarbring nie. Een van die verdagtes was ook al voorheen in hegtenis geneem, maar moes vrygelaat word omdat daar nie genoeg bewyse teen hom was nie.

Leon Rossouw.

Rossouw se ondersoekwerk word deur middel van selfoontegnologie gedoen en hy het die selfoonstate wat reeds in die speurders se besit was van voor af begin ontleed. Reich se selfoon is byvoorbeeld deur een van die verdagtes gebruik, maar met ʼn ander simkaart in die handstuk en dus ook met ʼn ander selfoonnommer. Dié inligting het die verdagte reeds om 11:20 op die dag van Reich se verdwyning op die moordtoneel geplaas en teen 14:00 dieselfde dag is die foon in Soshanguve, noord van Pretoria, gebruik.

Die selfoonstate het ook gewys wie van Reich se foon af gebel is en waar almal was toe die oproepe gemaak en ontvang is. Sulke inligting word afgelei omdat die state die selfoontoring wys wat naaste aan die beller en die ontvanger van die oproep is. Toe daar boonop ʼn e-tolrekening vir Reich se motor by sy huis opdaag, is beeldmateriaal van die tolhekke bekom en so kon daar vasgestel word dat die verdagtes met Reich se twee motors deur die tolhekke is.

Een van Karl Reich se voertuie ry deur ‘n tolhek op die N1.

Selfoontorings op die roete tussen Welkom en Pretoria het gewys dat die verdagtes op verskeie plekke gestop en tyd verwyl het. Al hierdie plekke is vir Reich se liggaam gefynkam, maar niemand wat met die ondersoek gemoeid was, het gedink dat daar so ver as Pretoria gery sou word met ʼn lyk tussen ander gesteelde huishoudelike ware in die motor se kattebak nie.

“Ons het almal aangeneem dat hulle nie ver met hom sou ry nie en so gou moontlik van hom ontslae sou geraak het,” sê Rossouw. “Niemand sal die risiko loop om ver met iemand te ry wat hulle vermoor het nie, of so het ons gedink en geredeneer!”

Tog het Rossouw se net al stywer om die verdagtes begin span hoewel daar steeds geen teken van Reich was nie. As privaat ondersoeker is hy nie by magte om verdagtes in hegtenis te neem nie en hy moes ʼn plan maak om hulle te ondervra.

“Dis toe dat ek die hoof van die Valke in Bloemfontein gaan spreek en om hulp aangeklop het,” sê Rossouw uit Bloemfontein waar hy woon.

Een van Karl Reich se voertuie ry deur ‘n tolhek op die N1.

Sowat twee weke gelede is AO Lynda Steyn van die Valke na die saak oorgeplaas. Steyn en Rossouw het oor die afgelope 15 jaar verskeie sake saam opgelos en die twee het onmiddellik aan die werk gespring en inligting gedeel.

“Leon is briljant met tegnologie en sy prosessering van die selfooninligting het die saak vinnig in die regte rigting gestuur,” sê Steyn.

Toe die verdagtes vir ondervraging ingebring is, het hulle binne enkele ure bes gegee en vertel waar hulle Reich se liggaam weggesteek het. Daar is toe vasgestel dat hy reeds die dag ná sy verdwyning deur ʼn verbyganger opgemerk is wat die polisie in kennis gestel het.

Ongelukkig is die twee sake nooit verbind nie en die welaf Karl Reich is later in ʼn armmansgraf in Pretoria begrawe. Sy liggaam sal nou opgegrawe en aan sy familie oorhandig word.

Reich se skoonseun, Johan Ferreira, het aan Maroela Media gesê almal wat aan die saak gewerk het, het hulle uiterste beste gedoen. Die familie is uiters dankbaar dat sy skoonpa se liggaam gevind is.

Leon Rossouw (regs) saam met een van die verdagtes nadat hy in hegtenis geneem is.

“Absa se forensiese afdeling, lede van die publiek, eggenotes van polisiemanne asook die advokaat van die Nasionale Vervolgingsgesag, almal het ons gehelp.”

Rossouw sê met die Reich-ondersoek is net weer bevestig dat elkeen wat in verdagte omstandighede vermis raak se saak in ʼn ernstige lig beskou moet word en dat daar so gou moontlik met mense in die omgewing gepraat moet word.

“Skei feite van bespiegeling, volg leidrade op en moenie fokus verloor nie. Besoek lykshuise in die omgewing en kry ʼn foto van die vermiste persoon en sirkuleer dit by polisiestasies!”

Rossouw sê sy grootste beloning is om vir die familie antwoorde te kan gee en aan hulle hul geliefde terug te besorg. “Dis wat my dryf en laat aanhou soek na antwoorde.”

Rossouw ondersoek ook die moord op Natasha Mans wie se liggaam op 13 Junie in ʼn erf in Groenvlei buite Bloemfontein gevind is nadat sy sowat twee weke lank vermis was. Lees meer hier.