‘Katslagter’ slaan wéér toe

Twee van die katte wat deur die vermeende katslagter geslag is (Foto: Verskaf)

Waarskuwing: Die berig bevat grafiese besonderhede en kan sensitiewe lesers en kinders ontstel.

Die oorskot van nóg ʼn kat wat op wrede manier geslag is, is Vrydag in Ruimtestraat in Manenberg, Kaapstad gevind.

Dít nadat die slagting van minstens 37 katte sedert 15 Julie in dié nedersetting aangemeld is – soms tot drie per dag.

Nadoodse ondersoeke wat op die oorskot van twee katte gedoen is, het intussen bevestig dat die katte met opset deur een of meer persone doodgemaak is.

Allan Perrins, woordvoerder van die Dierewelsynsvereniging in Kaapstad, het vroeër gesê dat alle moontlikhede oorweeg is, selfs dat die voorvalle moontlik met hondegevegte verband kon hou.

Maroela Media het vroeër berig dat inwoners uiters bekommerd is oor dié wrede raaiselagtige slagtings en vir die welsyn van hulle troeteldiere vrees.

“Dit is egter nou duidelik dat ons na ʼn tweebeen-monster op soek is en nie ʼn vierbeen-monster nie.”

Die Dierewelsynsorganisasie het nou selfs  ʼn beloning van R7 000 uitgeloof vir enigiemand met meer inligting wat tot die inhegtenisneming van die vermeende katslagter in Manenberg kan lei.

Perrins het vroeër gesê dat die katte oënskynlik op dieselfde wyse doodgemaak word.

“Al die dooie katte se mae is oopgesny en die ingewande is netjies langs die oorskot geplaas. Die katte is van kop tot stert oopgesny. Wat veral vreemd is, is die feit dat daar op al die tonele nie ʼn druppel bloed gevind is nie. So asof die kat eers skoongewas is.”

Uit die nadoodse ondersoeke blyk dit nou dat die katte met ʼn skerp lem oopgesny is waarna hulle harte en longe onder meer verwyder is.

Minstens 38 katte is sedert Julie dood gevind (Foto: Verskaf)

Dit is egter nie duidelik wat die presiese oorsaak van die katte se dood was nie, hoewel daar baie ooreenkomste op die twee katte se oorskot gevind is.

“Ons het aanvanklik vyf katte vir die nadoodse ondersoek oorhandig, maar weens die gevorderde ontbindingstadium van die diere se oorskot kon betroubare nadoodse ondersoeke nie daarop uitgevoer word nie.

“Dit is egter uit albei ondersoeke duidelik dat ʼn mens, eerder as ʼn dier, agter die slagtings sit.”

Volgens Perrins lyk dit ook asof die katte netjies op spesifieke plekke geplaas word.

Die slagtings vind ook binne ʼn radius van ʼn kilometer in die gebied van Manenberg plaas.

Volgens Perrins is die dooie katte langs paaie, by skole, kerke en buitekant die polisiestasie gevind. Daar is ook ʼn paar gevalle aangemeld waar die katte op inwoners se erwe en opritte gevind is.

Dit is ook nie net rondloperkatte nie, maar ook troeteldiere wat geteiken word.

Perrins sê voorts weens die wreedheid wat met hierdie dade gepaardgaan en die skaal waarop dit plaasvind, het die gemeenskap moontlik met ʼn baie gevaarlike persoon te doen.

“Dit kan ʼn psigopaat of groep psigopate wees.”

Perrins sê hy hoop dat die polisie die saak met die nodige erns sal ondersoek.

“Hierdie is nie jou alledaagse dieremishandelingsaak nie. Hierdie is dalk ʼn reeksmoordenaar in wording.”

Perrins sê hoewel hulle geen idee het wie vir die slagting verantwoordelik is nie, vermoed hy dat dit iemand binne die gemeenskap is.

Daar is ook ʼn moontlikheid dat die persoon of persone krapmerke aan hulle liggame kan hê.

“Die aandklokreël weens die Covid-19-inperking maak dit effens moeilik om ondersoek in te stel aangesien dit moontlik gedurende dié tyd kan gebeur.”

Kapt. Joseph Swartbooi, polisiewoordvoerder, het Vrydag aan Maroela Media gesê dat niemand nog in verband met dié slagtings in hegtenis geneem is nie, maar dat twee sake van dieremishandeling ondersoek word.

Katslagtings van dieselfde aard is vroeër die maand ook op die Surrey-landgoed, wat reg langs Manenberg geleë is, aangemeld. Vyf onthoofde katte is verlede maand in Faure ontdek, asook katte wat lewend gebrand is in Parow. Dié verbrande katte se oorskot is in swart sakke op mense se erwe gegooi.

In Mitchells Plain het die Dierewelsynsvereniging ook twee gevalle gehad van ʼn kat wat gehang is en ’n kat wie se vier pote afgesny is.

Dit is egter nie in dié stadium duidelik of die slagtings in Manenberg met bogenoemde gevalle verbind kan word nie.

Die Dierewelsynsorganisasie het ʼn beloning van R7 000 uitgeloof vir enigiemand met meer inligting wat tot die inhegtenisneming van die vermeende katslagter in Manenberg kan lei. Enigiemand met meer inligting kan die vereniging by 021 692 2626 skakel.