Kenner getuig oor Poppie se beserings

Poppie van der Merwe (Foto: Facebook)

Die aard van Poppie van der Merwe (3) se beserings gaan na verwagting Dinsdag in diepte in die Pretoria-hooggeregshof weergegee word.

Prof. Gert Saayman, een van die land se beste patoloë wat ook in die opspraakwekkende Oscar Pistorius-verhoor oor Reeva Steenkamp se nadoodse ondersoek getuig het, gaan geroep word om oor Poppie se beserings te getuig.

Poppie se ma en stiefpa, Louisa (46) en Kobus Koekemoer (44), staan tereg op ʼn aanklag van moord, twee aanklagte van aanranding met die doel om ernstig te beseer en ʼn aanklag van kindermishandeling. Van dié aanklagte hou verband met die beweerde aanranding van ʼn sesjarige seuntjie en ʼn 16-jarige meisie tussen September 2015 en Oktober 2016. Die egpaar het onskuldig gepleit op al die aanklagte teen hulle.

In die verhoor wat verlede Maandag begin het, het die hof gehoor Louisa het in 2014 van Westonaria aan die Wes-Rand na Orania in die Noord-Kaap gevlug nadat haar vorige lewensmaat haar glo aangerand het. Kobus het later na Orania verhuis en Louisa daar ontmoet. Hulle het in September 2015 saam ingetrek en is op 14 November 2015 getroud.

Die Koekemoer-egpaar het aan die einde van September 2016 “oornag” uit Orania na ʼn kleinhoewe in Mamogaleskraal naby Brits in Noordwes verhuis terwyl Orania se Maatskaplike Raad (OMR) glo bewerings van kindermishandeling ondersoek het.

Poppie is op 25 Oktober 2016 na die Brits-hospitaal gehaas en is met haar aankoms daar dood verklaar. Kobus is kort daarna in hegtenis geneem en Louisa op 15 Desember. Albei is sedertdien in aanhouding nadat hulle borgtog geweier is.

Adv. Hanna Conradie, die staatsaanklaer tydens die Koekemoer-egpaar se borgtogaansoek in die Brits-landdroshof in Desember, het destyds gesê ʼn staatspatoloog het in die nadoodse ondersoek bevind die oorsaak van Poppie se dood was ʼn harde hou teen haar kop.

Die patoloog het verder bevind Poppie het ronde kneusplekke aan albei hande, voorarms en voete gehad en albei haar oorskulpe was gekneus “wat dui op oormatige aanranding van die kind”. Die patoloog het ook aangedui daar was bloed aan die onderkant van Poppie se skedel en aan die linkerkant van haar brein.

Conradie het aangevoer Poppie het nie weens ʼn “episode” gesterf nie, maar bloeding op die brein opgedoen nadat Koekemoer haar kop teen ʼn kas geslaan het. Volgens Conradie het Louisa in ʼn verklaring aan die polisie vertel sy was ʼn ooggetuie van hierdie aanranding, wat glo die dag voor Poppie se dood gebeur het.

Louisa het tydens die borgtogaansoek in haar verklaring beweer dat sy nooit haar hand teen Poppie gelig het nie. Sy het in haar verklaring erken sy het nooit tussenbeide getree om die aanrandings te keer nie omdat sy vir Kobus bang was. “Hy het gedreig om my, my kinders en my ma dood te maak. Veral nadat ons [van Orania] na Brits getrek het, het Kobus vir Poppie gereeld aangerand. Daar was niks wat ek kon doen nie,” het Louisa gesê.

Lees alle vorige berigte oor Poppie van der Merwe op Maroela Media.

Kobus en Louisa Koekemoer in die Pretoria-hooggeregshof (31 Oktober 2017). Foto: Phillip Bruwer

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

24 Kommentare

jongste oudste gewildste
Cindy

Louisa hoe kan jy sê dat daar niks was wat jy kon doen nie? Natuurlik kon jy iets doen. As poppie se ma moes jy haar beskerm het maak nie saak hoe bang jy was vir Kobus nie. Jy kon as Kobus by die werk was kon jy hulp gekry het al het jy net polisie stasie toe gegaan. Jy kon gekeer het as hy vir poppie so aan rand, al het dit beteken jy kry die houe wat vir haar bedoel was. n ma sal altyd plan maak om haar kinders te beskerm. Nee jy is net so skuldig… Lees meer »

Anoniem

Jammer, geen simpatie ! Indien Julle dit gedoen het aan ‘n onskuldige dogtertjie is ek bevrees gaan Julle wat skuldig is MOET BOET en LANK ook ! Wat ‘n SKANDE !!!!???

JK

Daar was baie wat sy kon gedoen het. Sy wou net nie die kind gehelp het nie

Marthie Kruger

Liewe Poppie wens ek het jou lankal geken almal het jou gefaal , jou mamma , jou oumas ,oupas ,jou eie pappa ,die kleuterskool juffrou en die welsyn ,maar in my hart het ek die wete dat Juses jou hand met elke hou en skop vasgehou het en dat jy nou veilig by Hom is Rus sag Engelkind .

Jeni

Die Here het vir die kind n ma gegee om haar te beskerm en lief te he, hoe is jy bang vir die man? is jy bang JY kry seer? dink net hoe seer moes sy gehad het! Genade ek sal my hande af baklei vir my kinders. Sy is net soos hy!