Kenners: Hef verbod op rook op

sigarette

(Foto: pixabay)

Kenners aan die Universiteit van Pretoria (UP) meen die regering se verbod op sigarette het tot gevolg dat rokers en die regering nou die vrugte pluk van ʼn vergiftigde boom.

Prof. Francois Steyn, medeprofessor in kriminologie aan die universiteit se Departement van Maatskaplike werk en Kriminologie, en Harriét Klopper, ʼn lektor in kriminologie aan dieselfde departement, meen die oplossing is duidelik – die regering moet die verbod op die verkoop van sigarette ophef.

Steyn en Klopper skryf in ʼn meningstuk dat die meeste rokers vertroud is met die gesondheidsgevare verbonde aan rook en dus die gesondheidsgevolge daarvan moet aanvaar. Hulle meen egter indien dit die regering se voorneme met die tabakverbod was om die getal rokers in Suid-Afrika te verminder en/of die negatiewe gevolge te probeer verlig as rokers Covid-19 opdoen, het hul strewe duidelik misluk.

Nkosazana Dlamini-Zuma, minister van samewerkende regering en tradisionele sake, het vroeër die week met die aankondiging van die regulasies vir vlak 4 van die afsonderingstydperk gesê die verbod op sigarette bly van krag. Dit het gevolg nadat pres. Cyril Ramaphosa net enkele dae vantevore gesê het die regering is van plan om die verbod op vlak 4 op te hef.

Steyn en Klopper meen ondanks aanvanklike ondersteuning vir die landwye afsonderingstyperk het die verbod op die verkoop van sigarette ʼn wig tussen die land se nagenoeg sewe miljoen rokers en die regering ingedryf en lig gewerp op die sosiale kontrak tussen die partye.

(Foto: pixabay)

“Die regering het ʼn gulde geleentheid misgeloop om die steun en welwillendheid van miljoene rokers te verkry. Suid-Afrika het van die strengste tabakwetgewing ter wêreld, en rokers hou in die algemeen by hierdie wetgewing. Dit is nie teen die wet om te rook nie, maar die koop van onwettige tabakprodukte is egter. Na raming dra die onwettige tabakbedryf by tot regeringsverliese van R7 miljard per jaar,” skryf Steyn en Klopper.

Tydens die aanvanklike afsonderingstydperk se verbod op die verkoop van wettige tabakprodukte het die fiskus ongeveer R35 miljoen per dag aan belastinginkomste verloor wat R1,2 miljard beloop tydens die aanvanklike verbod van vyf weke.

Steyn en Klopper wys daarop dat rokers nou ander planne maak om sigarette te bekom en dat dit onder meer ook tot gevolg het dat pryse deur die dak skiet.

Terwyl die duidelike gevolg vir rokers die onwettige koop van ʼn onwettige produk is, is die latente gevolg vir die Suid-Afrikaanse ekonomie baie meer verwoestend. “Die regering kies blykbaar verder om dié kwessie te ignoreer: Hoewel rook skadelik is vir die gesondheid van ʼn mens, word onwettige tabak vervaardig sonder gehaltebeheermaatreëls wat die gesondheidsrisiko’s van rook verder verhoog.”

Daar is kort ná die aankondiging deur Dlamini-Zuma verwys na haar beweerde bande met die omstrede sakeman en sigaretbaas Adriano Mazzotti.

Steyn en Klopper meen die feit dat sommige politici en hoëprofiel-individue met die onwettige tabakbedryf verbind word, laat die vraag ontstaan oor wie dan nou eintlik baat by die verbod op sigarette.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

28 Kommentare

jongste oudste gewildste
Nie Verbaas

Waar daar n rokie trek is daar n vuurtjie. Mazzotti en Dlamini Zuma verbind. Hoekom sal sy n uitspraak maak wat hom “negatief gaan beinvloed”?

Burgermeester

Ek probeer hard dink, maar ek kan nie onthou of die regering al ooit ‘n regte besluit geneem het vandat hulle aan bewind gekom het nie. Dalk was daar een, maar dit moes so vêr in die verlede gebeur het, dat dit in my geheue verdwaal het. Alle beslissings en wette deur die ANC, word daar gestel om die ‘kamerade’ te bevoordeel ten koste van die land. As die mense wil rook, laat hulle rook; as die mense wil drink, laat hulle drink. Laat ‘n man toe om die donker en ongekende tye met ‘n beter gemoed in die gesig… Lees meer »

Scalla

Die onwettige sigarette en drank mark floreer en staat verloor belasting, as jy wil drink en rook is dit mos jou eie besluit.

Bosnimf

Dan kan ń mens dieselfde sê van die verbod op alkohol. Dieselfde wig tussen verbruiker en die regering is hier van toepassing. Sinneloos, jy geniet ń drankie in die gemak van jou huis want geen publieke plekke is oop vir saamkuier. Maar die ou wat sy drankie geniet saam met sy braai is tans gevaarliker as die roker. Die roker is blykbaar die “slimmer” weergawe van verbruikers wat geld in die ekonomie instort.