Kerke reageer op Ramaphosa se vergunning

Argieffoto ter illustrasie (Foto: Unsplash)

Pres. Cyril Ramaphosa se onlangse aankondiging dat kerke, moskees en ander plekke van aanbidding onder vlak 3-afsondering met geloofsaktiwiteite kan voortgaan, word wyd verwelkom, selfs al word dit op ’n beperkte wyse toegelaat.

Een kerkgroep wil wel nou vergoed word vir inkomste wat gedurende die algehele afsondering verlore gegaan het, terwyl ’n ander steeds nie heeltemal gelukkig is met die president nie. Kerke was tot nou nog verbied om eredienste of enige vorm van byeenkomste te hou en sou aanvanklik eers onder vlak 1 toegelaat word om hiermee voort te gaan.

Die organisasie Freedom of Religion SA (For SA) het vandeesweek gesê die president se aankondiging oor die heropening van kerke word verwelkom aangesien dit die geloofsektor in staat stel om in die fisieke, sielkundige en geestelike behoeftes van die land te voorsien te midde van die Covid-19-pandemie.

Volgens Michael Swain, uitvoerende direkteur van For SA, is die organisasie “dankbaar” dat Ramaphosa en die nasionale bevelraad eindelik gehoor gegee het aan gelowiges se pleidooie.

Hy het gesê FOR SA het verskeie briewe namens sowat 18 miljoen mense aan die regering gerig waarin hulle versoek het dat godsdienstige leiers en godsdienstige organisasies as “noodsaaklike werkers” erken moet word en dat plekke van aanbidding moet heropen.

Argieffoto ter illustrasie (Foto: Unsplash)

Die Afrikaanse Protestantse Kerk het ook vandeesweek sy dank aan Ramaphosa uitgespreek, hoewel dié kerk nie die president te veel krediet vir die besluit wil gee nie. “Die Sentrale Kerkekommissie (SKK) van die AP Kerk het met groot dankbaarheidheid teenoor die Here geluister na die president se aankondiging dat godsdienstige byeenkomste weer gehou mag word.

“Tog is dit vir ons jammer dat ons eers ʼn ultimatum aan die president moes stel en hom met die hof moes dreig alvorens hy gereageer het,” het ds. HSW Strauss, voorsitter van die SKK, in ʼn verklaring gesê.

Volgens Strauss kan die AP Kerk beslis nie Ramaphosa se lof besing nie. “Hy het eers ná druk dit teruggegee wat nooit syne was om te neem nie. ʼn Staat wat sy plek ken, rig versoeke tot die kerk van Christus, nie voorskrifte nie,” meen Strauss.

Hoewel die Jesuïete-instituut die president se besluit verwelkom, bevraagteken hy dit. “Hoe meer mense meng, hoe groter is die potensiaal vir verspreiding. Plekke van aanbidding is nie immuun teen die virus nie,” het Russell Pollitt, direkteur van die Jesuïete-instituut, gesê.

Vergoeding vir verlore inkomste

Intussen het die Sionistiese Kerk nou gesê hy wil vergoed word vir inkomste wat verlore gegaan het weens die algehele landwye afsondering.

kerk-banke

Argieffoto

Die sionistiese biskop Bheki Ngcobo het vroeër in Durban gesê die regering se besluit om die verkoop van alkohol en die heropening van skole toe te laat, maar kerke gesluit te hou, is ’n belediging vir kerke en godsdiens, berig eNCA.

“As ’n kerk het ons baie verloor. Geboue is gesluit en die kerkmotors se paaiemente is agterstallig. Al hierdie goed moet nou betaal word. Jy kan nie jou betalings ignoreer nie,” het Ngcobo gesê.

Ngcobo het tog sy dank uitgespreek dat plekke van aanbidding onder vlak 3-afsondering met geloofsaktiwiteite kan voortgaan. Hy het wel gevra dat kerke meer mense gedurende kerkdienste moet kan akkommodeer, terwyl sosiale afstand gehandhaaf word.

Maroela Media het vroeër berig beperkte geloofsaktiwiteite onder vlak 3-afsondering sal die volgende behels:

  • Plekke van aanbidding kan dienste hou, mits nie meer as 50 mense dié dienste op een slag bywoon nie. Hoe kleiner die ruimte waar die diens plaasvind, hoe minder mense word toegelaat.
  • Sosiale afstand moet tydens dié dienste gehandhaaf word en almal teenwoordig moet ʼn gesigmasker dra.
  • Die regte stappe moet gedoen word om te verseker plekke van aanbidding word behoorlik voor en ná ʼn diens skoongemaak.
  • Enige godsdienstige aktiwiteit wat ʼn risiko vir die oordra van Covid-19 inhou, moet liefs vermy word.
  • Godsdienstige leiers kan as noodsaaklike werkers beskou word vir die doeleindes van berading en die lei van begrafnisse.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

21 Kommentare

Fluisterwind ·

Kan iemand my dalk help met waar die “nuwe” regulasies in die staatskoerant gepubliseer is? Want deesdae weet mens nie of jy na die president of minister of media kan luister nie. Geskrewe wet is die beste.

AmY ·

Die regering is deesdae soos jou ouers; jou pa sê ja, en jou ma sê nee…

Jaco ·

“Volgens Strauss kan die AP Kerk beslis nie Ramaphosa se lof besing nie”
Ek kan ook nie die AP Kerk se lof besing nie. Ek wonder of Ramaphosa weet dat die AP Kerk oop is NET vir wit mense?
Vreemd dat dieselfde mense wat so kla oor die ANC se “rassisme” teenoor wit mense, maar ook hulle eie vorm van rassisme toepas. dit nogal in die kerk van alle plekke.

Debbie ·

Sjoe, maar julle is negatief teenoor die kerk. Net soos julle bekommerd is oor rekeninge wat julle moet betaal, so is die kerke ook bekommerd. Geboue moet nog betaal word, mense moet salarisse ontvang. Bowenal moet hulle ook vir behoeftige mense in die gemeenskap sorg. Dit is een van die take wat die kerk moet doen. En hulle moet gesinne wat in hul gemeentes is wat swaarkry, bystaan. Waar dink julle kom die geld vandaan? Van mense se bydraes. Mense is baie gou om die kerk te kritseer, totdat hulle hul werk verloor, dit finansieël swaar gaan of hulle deur een of ander krisis gaan. Dan moet die kerk dadelik help. Maar wanneer die kerk vra vir hulp, dan raak mense vieslik of sarkasties. Niemand sê jy moet geld gee wat jy nie het nie. Niemand kan jou ook voorskryf oor hoeveel jy moet gee nie. Maar waar moontlik help die kerk. Deur geldelike bydraes kan hulle die gemeenskap help, en so God se liefde aan mense bewys.

Maria M S ·

Debbie, baie dankie vir jou wyse woorde. Net een sin waar ek van jou verskil : Die Bybel sê bring julle tiendes na die Kerk, dit is wat Hy van ons verwag.

Botterblommetjie ·

Die woord (Bybel) sê ons moet ons bydrae lewer. Kom ons doen dit so ver moontlik. Die predikers het baie koste dalk aangegaan om data, elektroniese toerusting ens. te bekom om die preke vir ons te verskaf in die toesluit tydperk. Hulle het ook gesinne om te onderhou, skoolgeld ens. Kerke kos baie geld om te onderhou, die werkers te betaal asook die woord te versprei en sendelinge ens. Ek voel die gemeente moet hul bes doen om hul predikers en kerk te ondersteun. Tog stem ek daar is die gemeentes waar die predikers in weelde leef ens. Wil jy hê jou dominee moet die siekes besoek in ‘n motor wat net net ry. More lê jy in die hospitaal en niemand besoek jou dalkies nie. Wees realities en gaan volgens God se woord. Sou ook graag wil byvoeg. Gemeentes hou julle gevegte weg van sosiale media. Gaan op jul knieë soos die lidmaat doen en vra God vir kalmte, wysheid en finansiële uitkoms. My man ook nie gewerk in die tydperk nie en ek weet God het ons deurgedra. Alle eer aan Hom.

Tinus ·

Ek die persone met negatiewe kommentaar moet asseblief nie kommentaar lewer oor iets waarvan julle geen benul het nie.Dit is duidelik uit julle skrywe dat julle nie die werking van enige kerk verstaan nie,omdat julle nooit daar kom nie.Ek is dankbaar saam met miljoene ander vir n geleentheid om weer ons Here in sy huis te kan aanbid en verheerlik.

Anton ·

Snaaks, my God hoor my as ek in my huis bid en dan hoef ek nie nog die prediker se Ferari te help betaal nie.

Maria M S ·

Anton, waar, God hoor jou, ongeag waar jy bid, MAAR Hy sê in die Bybel moenie die onderlinge samekoms met mede-Christene versuim nie.

Robert ·

Ek hoor jou, maar om aan te dring op belastinggeld vir vergoeding vir inkomste verloor… daai een wen my logika.

Retha ·

Ongelukkig mag jy nie sing nie, slegs solo sang toelaatbaar, gaan lees maar die hele berig oor kerkgaan.

penny ·

My skoonpa het altyd gesê.. vir wat mag die prediker wat die Here se woord verkondig nie ook geseën word met ordentlike voertuig of mooi huis nie. Nee die gemeentelede mag net die beste besit maar iemand wat vir ons Vader werk, moet aan sukkel. God sal die seën wat opreg gee en ander net die beste gun. Dankie dat daar in die land nog mense is wat God se woord versprei. Dit maak my gelukkig as ek sien hoe ons Vader ons elke dag seën en dra. Dankie Here!!!

marius ·

Meeste oorloee is aangevuur deur geloofs verskille . Daar is geen universiele geloof nie . Daar bestaan ook nie ‘n reenboog nasie geloof nie . Waneer geloof en denke in mense se kele afgedruk word , spat die vonke . Mense wie verplig word om geen geloof aan te hang nie , en die wie se geloof vertorring is , kan soos skape na die slagpale gelei word deur die ware heersers van die wereld , en dit is presies wat nou gebeur .

Alida ·

Wat dra die kerke by tot die ekonomie? Mens kan jou godsdiens beoefen in die veiligheid van jou huis. Sommige kerke soek die massas se geld dis al.

OW ·

Die Kerk die liggaam van Christus word nie in terme van geld en die Ekonomie gemeet nie.As jou kerk se hoofmotief geld is,is dit ‘n wolf in skaap klere.God het nie ons geld nodig nie,Hy soek ons harte.

Rudolph ·

Mense hoef nie bymekaar te kom in massas om hulle dankoffers / donasies / skenkings vir die kerk te gee nie. Ek dink baie gemeentes gaan hierna agterkom dat om ‘kerk’ te wees beteken nie jy het groot geboue, blink karre en kantore nodig nie. Ek voorsien dat baie kerk eiendom na dese in die mark gaan wees

Rina ·

Dis in hierdie tyd nodig om Kerk te wees, Jesus se hande en voete hier te wees.
Alles gaan nie net altyd oor geld nie!

Ek is dankbaar vir ons aanlyn dienste die laaste 6 weke,
Hier is soveel dubbel standaarde in die grendeltyd, ons kry ons opdrag om gehoorsaam aan die owerheid te wees, God verwag dit van ons. Want in gehoorsaamheid kom seëninge!

Dankie vir elke kerk wat uitreik na sy eie lidmate wat swaarkry asook ander mense wat op hul pad gestuur word in die tyd!

Bid vir ons president veral en vir sy veiligheid. Ek hou self nie van hom nie, die besluite wat hulle maak, steek my dwars in die krop, maar God vra dat ons vir ons regering sal bid sodat ons rustig kan lewe.
Bid dat God sy siel sal red en dat hy beter besluite vir ons land kan maak.

Ek is dankbaar dat mens weer kan kerk toe gaan, dis tog waar ons kan saambid met ander gelowiges en Paulus vra dat ons nie die byeenkomste van gelowiges afskeep nie.

Dankie Mnr President, mag God Drie-Enig u verder lei op Sy Pad.

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.