KFC-saak: Aanklagte voorwaardelik teruggetrek

Stephan Nel, Dicky Junior Van Rooyen, Marius Harding, Ockert Muller en Joshua Schultz in die Pretoria-Noord-landdroshof tydens ‘n vorige verskyning.

Alle aanklagte teen die vyf mans in die sogenaamde KFC-saak is Donderdag in die landdroshof in Pretoria-Noord voorwaardelik teruggetrek.

Marius Harding, Stefan Nel, Dicky Junior van Rooyen, Ockert Muller en Joshua Schultz is daarvan beskuldig dat hulle in Augustus 2017 ʼn egpaar, Jacob en Dudu Sono, by ʼn KFC-kitskoswinkel in Montana aangerand het.

Die vyf het aanvanklik tereggestaan op aanklagte van poging tot moord en aanranding met die doel om ernstig te beseer. Die staat het egter later die aanklag van poging tot moord laat vaar en die aanklag van rig van ʼn vuurwapen is ook verander na die rig van ʼn lugpistool.

Volgens Nols Nolte, wat drie van die beskuldigdes verteenwoordig, het die staat Donderdag die aanklagte voorwaardelik teruggetrek weens uitstaande ondersoekwerk.

Nolte het gesê die Gautengse direkteur van openbare vervolging het die opdrag gegee. ʼn Brief van die Nasionale Vervolgingsgesag (NVG) is in dié verband ingedien.

“Hulle het reeds 21 maande terug vir ons gesê die ondersoek is afgehandel.”

Volgens Nolte is dit belaglik dat daar amper twee jaar later gesê word daar moet verdere ondersoek gedoen word. Hy het gesê hulle het reeds einde Maart vertoë gerig dat die saak teen die mans laat vaar moet word.

Volgens Nolte het hulle vroeër navraag gedoen oor hoeveel video’s van die voorval tydens die verhoor gebruik gaan word. Daar word nou aangevoer dat daar ander video’s is wat ondersoek word en dat ʼn gesigsdeskundige ook aangestel moet word.

“Daar is ook nog nie eens ʼn verslag van die dokter wat die egpaar ondersoek het nie. ʼn Mens sou dink al die goed is in plek as daar gesê word die ondersoek is afgehandel.”

Die mans is kort ná die voorval in hegtenis geneem en Muller is kort daarna op borgtog vrygelaat. Nel, Schultz en Van Rooyen is aanvanklik borgtog geweier, maar uiteindelik in Oktober 2017 op borgtog vrygelaat nadat hulle appèl aangeteken het. Harding is eers in April vanjaar op borgtog vrygelaat. Hy is aanvanklik borgtog geweier weens twee ander sake wat teen hom hangend is.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

31 Kommentare

jongste oudste gewildste
Dankie

Dit is amper to goed om waar te wees om vir ‘n verandering so iets te lees. As julle ouens weer lus is vir KFC, bel eerder vir aflewering dan is daar geen kans om weer in so onbenulligheid betrokke te raak nie. Voorspoed

Andre

Swak. Dit is duidelik dat die ondersoekbeampte, sy bevelvoerder en die aanklaer geen idee het van die ondersoek van misdaad en die voorlegging van getuienis nie. Wat soek hulle in hulle poste. (Hul salaris?)

Johan Pretorius

Baie beter om net weg te bly van KFC.

Lee

Ag asseblief. Wat ‘n lot gemors. Dis net omdat hulle wit is. As die bordjies verhang was het die saak nie eers die hof gehaal nie. Wat wil hulle nou weer ondersoek. Soek madam en meneer seker geld. Hulle het skaars seergekry. Belaglik! Hulle moet ook aangekla word want ek glo nie vir 1 minuut dat hulle kamstig heeltemal onskuldig was nie. Hulle is daarop uit om die wittes uit te tart. SA se Regstelsel moet bykom en almal regverdig behandel!!!!

Magda

Die was van die begin af n WOLHAARSTORIE – As alles op die ou einde laat vaar word, en ek glo dit sal hoop ek die ouens sit klagtes van Naamskending en wat ookal daarby saamgaan teen die paartjie in. Groot boete vir elkeen ook ASB.