Khoza aangekla: ‘Hoekom word ek uitgesonder?’

ANC-LP Makhosi Khoza. Foto: Reuters/ANA

ANC-LP Makhosi Khoza wil weet hoekom sy uitgesonder word nadat die ANC haar formeel ingelig het van ʼn tugverhoor teen haar.

Khoza het gesê sy sal haar samewerking gee rakende die dissiplinêre stappe teen haar, maar sy twyfel of dit regverdig sal wees. Sy het weereens uitgevaar teen die ANC en pres. Jacob Zuma en gesê albei het “die pad byster geraak”. Dit is juis Khoza se kritiek teenoor Zuma wat tot die dissiplinêre stappe gelei het.

Khoza het haar die afgelope paar weke al meer openhartig oor die ANC se “blinde lojaliteit” teenoor pres. Zuma uitgespreek. Die ANC-LP het aangedui sy sal stem dat Zuma verwyder moet word indien die parlement ʼn geheime stemming sou hou tydens die mosie van wantroue.

“Verskeie senior ANC-lede, onder wie LP’s, het onlangs in die openbaar hul bekommernisse rakende ons president uitgespreek. Daar is geen stappe gedoen teen die individue nie. Die ANC moet verduidelik hoekom ek uitgesonder word,” het Khoza gesê in reaksie op die dissiplinêre stappe teen haar.

Khoza is Woensdag formeel ingelig oor die stappe teen haar en dat ʼn tugverhoor op 10 September sal plaasvind. Sy is intussen besig om haar regsverteenwoordiger te raadpleeg. “Ek word vervolg omdat ek nie meer by die party se reëls hou nie. Ek kan nie korrupsie, plundery, die miskenning van mense wat ons aan bewind gebring het en die groeiende kleptokrasie aanvaar nie.”

Khoza het gesê die ANC smoor rede, moraliteit en etiese gedrag. “My uitlatings is slegs ʼn weerspieëling van wat miljoene Suid-Afrikaners reeds gesê het, naamlik dat hulle genoeg gehad het.”

Volgens Khoza het sy die polisie se beskermingsdienste van die hand gewys aangesien Fikile Mbalula, minister van polisie, haar “swartgesmeer” het. Die beskermingsdienste is aangebied in die lig van doodsdreigemente wat Khoza glo ontvang het.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

15 Kommentare

jongste oudste gewildste
Theresa

Oeps. As mense die waarheid praat is dit mos nie verkeerd nie?

Mad

Hierdie vrou is reg. Ons Moet haar verdedig.

VIVA

Hier’s iemand met insig. En guts. En ‘n gewete.
Makhosi vir president, viva!

Pierre

Ek is bly sy hou by haar standpunt. Ongeag die feit dat sy ‘n lid is van die ANC skroom sy nie om op te staan vir wat reg is nie. Ek hoop dat diegene wat soos sy voel binne die ANC hulle nou by haar gaan skaar en sal ondersteun. Hierdie is maar weereens net ‘n poging om die ander issues soos Gupta en kie, bedrog, en noem maar op eenkant toe te skuif en te hoop dat dit gaan verdwyn. Hoop sy het ‘n goeie regsverteenwoordiger.

Susan

Ek hoop ook sy kry ‘n fantastiese regs-span.