ʼn Kind is onder die vier slagoffers wat Dinsdag in ʼn gru-ongeluk op die N6 buite Bloemfontein dood is.
Luidens ʼn verklaring van die nooddiens VRMED, was twee voertuie laatoggend in die ongeluk in die rigting van Reddersburg betrokke.
“Paramedici van VRMED het ʼn man, ʼn vrou en ʼn kind vasgekeer in ʼn bakkie aangetref, maar hulle het ongelukkig reeds aan hul beserings beswyk.
“Die bestuurder van die ander voertuig het ook reeds gesterf.”
Nooddienswerkers van die Mangaung-nooddiens het spesialistoerusting ingespan om die slagoffers uit die voertuigwrakke te bevry.
Die polisie ondersoek die oorsaak van die ongeluk.