Kind sterf toe ‘kapers’ van polisie vlug

ʼn Hoëspoed-jaagtog tussen polisiebeamptes en vermeende kapers in Durban het tragies geëindig toe die verdagtes glo ʼn kind wat langs die pad gestaan het, doodgery het.

Lt.kol. Thulani Zwane, woordvoerder van die KwaZulu-Natalse polisie, het gesê ʼn motoris is Vrydag omstreeks 16:45 in Kenville deur drie gewapende aanvallers genader terwyl hy langs die pad in sy motor gesit het. Die verdagtes het die man van twee selfone en sy skootrekenaar beroof voordat hulle in sy Kia Rio-voertuig gevlug het. ʼn Saak van motorkaping is by die Greenwood-polisiestasie aanhangig gemaak.

“Omstreeks 19:00 daardie aand het lede van die blitspatrollie saam met beamptes van die opsporingsmaatskappy die motor in die Tafuleni-gebied gewaar en agternagesit,” het Zwane gesê. “Die verdagtes het weggejaag en in die ry op die polisiebeamptes geskiet. Die beamptes het teruggeskiet.”

Volgens Zwane het die bestuurder van die gekaapte motor vermoedelik beheer verloor en in ʼn groep kinders ingejaag wat langs die pad gestaan het. Een van die kinders is op die toneel dood, terwyl ʼn tweede kind na ʼn hospitaal gehaas vir behandeling. Die ouderdom van die kinders is nie bekend nie.

“Twee verdagtes, een met ʼn skietwond, is op die toneel in hegtenis geneem,” het Zwane gesê. Die gewonde verdagte is onder polisiebewaking na ʼn hospitaal geneem.

Aanklagte van poging tot moord, die besit van gesteelde goedere en strafbare manslag is aanhangig gemaak. Die eerste verdagte, wat 18 jaar oud is, het reeds vandag in die Durban-landdroshof verskyn. Die tweede verdagte sal verskyn sodra hy uit die hospitaal ontslaan is.