Ten spyte van omstanders se pogings om ʼn tienjarige seun se lewe met kunsmatige asemhaling te red, is die seun dood verklaar nadat hy by ʼn oord in eMalahleni (Witbank) verdrink het.
Russel Meiring, woordvoerder van ER24, het gesê paramedici was omstreeks 10:20 op die toneel. Die seun het langs die swembad gelê en besoekers het reeds met kardiopulmonêre resussitasie begin.
“Paramedici het oorgeneem en met gevorderde lewensondersteuning begin. Die kind is kort daarna na die Witbank Algemene Hospitaal vir verdere behandeling geneem,” het Meiring gesê.
“Die seun het geen tekens van lewe getoon nie en is in die hospitaal dood verklaar.”
Die verloop van gebeure wat tot die verdrinking gelei het, is in dié stadium nog onbekend.