Kinderhuis-aantygings: ‘Dit was leuens’

‘n Skermskoot uit die video. Die meisies se gesigte word verbloem om hul identiteite te beskerm soos die Kinderwet vereis.

Die ma en suster van een van die meisies wat in ʼn selfoonvideo verskeie aantygings oor ʼn bekende kinderhuis in Vereeniging in Gauteng gemaak het, het gesê die bewerings was leuens.

Maroela Media het vroeër berig die meisies, van wie twee minderjarig en een 18 jaar oud is, kan op die video gesien word waar hulle in hul skoolklere vertel hulle is inwoners van die Catherine Robson Kinder-en-jeugsorgsentrum.

Hulle verskaf hul name en ouderdomme terwyl die stem van ʼn vrou in die agtergrond gehoor kan word en sy vir hulle vrae vra. Die meisies vertel dat hulle een aand sonder kos buite die kinderhuis moes slaap. Hulle beweer ander kinders het hulle “deur die tralies” probeer kos gee en dat dié kinders toe ook gestraf is. Hulle beweer niemand is gelukkig by die kinderhuis nie en die huismoeders vloek en slaan hulle glo. Hulle beweer hul kos word in vuil kastrolle voorberei en dat hulle al miere, kokkerotte, staalwol en proppe in hul kos gekry het.

Ds. Danie Kruger, bestuurder by Catherine Robson, het Vrydag in ʼn verklaring gesê een van die meisies in die video se ma en suster het intussen in ʼn ondertekende brief bevestig dat die meisies se aantygings nie waar is nie. “Een van die meisies se ma en suster het skriftelik aan die Catherine Robson-bestuur erken dat die dogters nie die waarheid gepraat het nie,” het Kruger gesê.

Maroela Media weerhou die name van die kind se ma en suster, omdat die kind volgens wet nie geïdentifiseer mag word nie.

Volgens Kruger lui die brief, wat deur die meisie se ma en suster onderteken is, soos volg: “Die bewerings wat [in die video] gemaak is, is onwaar. Ons het nadat die video geplaas is, uitgevind dat dit leuens was. Ons was emosioneel betrokke en dit is waarom ons nie gedink het die video gaan nagevolge hê nie. Die video het daartoe gelei dat die departement [van maatskaplike ontwikkeling] dit wel gaan ondersoek en [die departement] is tans besig daarmee. Dit waarvan die kinderhuis beskuldig word, is onwaar.”

Kruger het gesê die ma en suster het ʼn afspraak met die kinderhuis se bestuur aangevra en die brief is tydens hierdie vergadering onderteken.

Mbangwa Xaba, woordvoerder van die departement van maatskaplike ontwikkeling, het vroeër aan Maroela Media gesê die departement is bewus van die video en het maatskaplike werkers aangewys om die aantygings te ondersoek. Die voorlopige verslag met die bevindinge sal na verwagting teen Woensdag beskikbaar gestel word.

Kruger het gesê die bestuur van die kinderhuis sal ná afloop van die departement se ondersoek op verdere stappe besluit.

Die Catherine Robson Kinder-en-jeugsorgsentrum is ʼn geregistreerde niewinsgewende organisasie wat aan die NG Kerk behoort. Die tehuis het gedurende die 1950’s tot stand gekom om sorgbehoewende kinders tussen vier en 17 jaar oud in te neem en te versorg.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

49 Kommentare

jongste oudste gewildste
Tania

Kinders het vandag ‘n vrye sê en kom weg met foutiewe inligting. Want sies tog hulle is net kinders.

Rita

Manupilasie en kontrole. Elke aksie het n reaksie. Wat sit agter als..?

Willem de Klerk

Ek is bly die dept doen ‘n ondersoek sodat die waarheid hopelik uitkom. Iets is iewers nie reg nie….

Dissie

Willem, ek stem. As die ma en suster sulke eerbare mense is, hoekom bly die kind dan in die kinderhuis en nie by hulle nie? Of verstaan ek verkeerd?

PITBULL

Ek het geleer dat waar daar ‘n rokie trek, daar maar gewoonlik ‘n ou vuurtjie brand!! Wag en kyk maar, die waarheid sal uitkom. Watter baat kon die kind daarby vind om dit te doen? Dis hoekom kinders altyd bang is om te praat oor wat wrede, perverse, gevoellose grootmense aan hulle doen. Ek dink ons moet meer begin luister wat kinders wil sê, dan sal daar baie minder stukkende “wrakke” en verwoeste lewens wees!