Kinders getraumatiseer maar terug by kinderhuise

Kinders word uit die kinderhuise verwyder. Foto: Newcastle Advertiser

“Dit was baie traumaties vir die kinders, maar ons gaan nou probeer om hulle terug in hul normale roetine te kry.”

Só het ds. Gerhard Botha, uitvoerende hoof van die KwaZulu-Natalse Christelike maatskaplike dienste (CSS), gesê nadat die sowat 200 kinders wat verlede naweek uit drie kinderhuise in KwaZulu-Natal verwyder is, almal weer terug is by onderskeidelik Môrester Ladysmith, Môrester Newcastle en Huis Meah.

“Al die kinders is terug afgesien van twee wat in die hospitaal opgeneem is vir epilepsie. Dit gaan goed met hulle in die omstandighede. Die een kind het ook ʼn epileptiese toeval gekry toe die kinders verlede naweek verwyder is.

“Dit kon so anders gewees het as die departement net met ons gekommunikeer het. Ons personeel gee berading aan die kinders en ouers uit die gemeenskap staan ons ook by.”

Phili Mngomezulu, een van die kindersorgwerkers by Môrester Newcastle, by die ingang wat versier is in afwagting op die kinders se terugkeer. (Foto: Anel du Preez)

Die CSS se regspan was Vrydagmiddag terug by die hof in Pietermaritzburg nadat die provinsiale departement van maatskaplike ontwikkeling nie gehoor gegee het aan die hofbevel om die kinders na die huise terug te bring nie. Die hof het Woensdag gelas die kinders moet binne 36 uur teruggebring word.

Volgens Botha het die eerste kinders teen Vrydagmiddag begin terugkeer. “Ons eerste doelwit was om die kinders veilig terug te kry. Ons tweede prioriteit is egter nou om die departement verantwoordelik te hou aangesien hulle die hofbevel geïgnoreer het waarvolgens die kinders teen Vrydagoggend reeds terug moes wees.”

Maroela Media het vroeër berig die kinders is verlede Vrydag en Saterdag skielik deur beamptes van die departement uit die kinderhuise verwyder en onder dwang na onbekende bestemmings geneem.

Van die kinders het papiere op die vensters geplak waarop hulle aandui dat hulle nie uit die kinderhuis verwyder wil word nie. Foto: Newcastle Advertiser

Die departement voer aan die kinders is verwyder nadat bewerings van fisieke, verbale en emosionele mishandeling, asook rassisme by een van die kinderhuise, onder die departement se aandag gekom het.

Botha het gesê die CSS sal intussen steeds poog om die departement van minagting van die hof skuldig te laat bevind. “Die ergste daarvan is dat hulle bereid was om die kinders se belange op te offer.”

Die ondersoek na die bewerings van fisieke, verbale en emosionele mishandeling, asook rassisme gaan intussen voort.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

29 Kommentare

jongste oudste gewildste
Ella

Die ouens wat die besluit geneem het is veronderstel om die nodige maatskaplike opleiding te hê om te weet dat hierdie sinnelose daad trauma vd kinders sou veroorsaak. Iemand se ego was groter as sy verstand!!!!
Hoop IEMAND dagvaar die betrokkenes!!!

Cornelia

So dankbaar. Dankie MM dat u die spoor warm gehou het. Nou kan mens weer vorentoe kyk en vertrou dat so iets hom nooit weer sal herhaal nie.

Marinda

Wonderlike nuus. Dankie MM.

Trol

Aan die eenkant wonder ek, kom dke wraak ds Botha toe? Maar die werelden sy maat is sielsalig moeg vir die wolfskreeëry en rassisme huilery. Dis in elk gevalnet ekskusies om striemde haatgierige aanvalle op wit mense te loods.

Johann

Om te dink die gewetenlose sotte het mag en pag in hand om op hoorse, weerlose kinders te traumatiseer… EN WEG TE KOM DAARMEE? Geen gevilge ip hulle persoon of werk nie? GEEN maar GEEN begrip vir of van so n trauma op n kind nie… SIEJ!