Kiwi’s bek-af dat Bokke glo Sesnasies oorweeg

(Foto: Patrick HAMILTON/AFP)

Daar is sprake dat die Springbokke in 2025 die Rugbykampioenskap vir die Sesnasies-reeks kan verruil.

En waar daar rokie trek, brand daar normaalweg ook ’n vuurtjie. James Parsons staan egter met sy brandblusser gereed om enige moontlike vuurmaak-poging te probeer smoor.

“Persoonlik hoop ek nie dat die Bokke aan die reeks onttrek nie. Hulle het so ’n ryke tradisie teen die All Blacks,” het die oudhaker – wat in meer as 100 wedstryde vir die Blues uitgedraf het – in ’n aanlyn uitsending gesê.

Die twee trotse rugbylande het al 100 toetse teen mekaar gespeel en verlede jaar se wedstryde was twee naelbytstories: Die All Blacks het eers met twee punte in Townsville gewen, waarna die Suid-Afrikaners ’n week later die bordjies met ’n heldhaftige vertoning verhang het.

Die Nieu-Seelanders het in 60 van die toetse tussen die twee lande koning gekraai, terwyl die Springbokke 37 keer aan die wenkant was. Daar was ook vier gelykopuitslae.

Die Springbokke het die All Blacks met 31 – 29 geklop. Foto: Twitter.

“Wanneer ’n All Black-speler gevra word om ’n lys van sy taaiste teenstanders op te stel, sal hy waarskynlik die name van ’n paar Suid-Afrikaanse spelers neerpen. Ek dink dit is ’n klinkklare bewys van hoeveel respek ons vir hul spel het.”

Kiwi-rugbysterre soos Dan Carter en Liam Messam het juis vantevore vir Schalk Burger uitgesonder.

“Kyk, Schalk was ’n taai kalant. Ek het gewonder of my All Blacks-trui dalk ’n teiken gehad het, want hy het net heeltyd vir my gekom. Hy sou byvoorbeeld in ’n hengse stryd met ons pak voorspelers gewikkel wees, maar hy het net nooit moed opgegee nie. Hy was ’n fisieke speler met ongelooflike krag,” het Carter destyds op Newstalk ZB van die Springbok-hardebaard gesê.

Indien Suid-Afrika wel die pad na die Noorde sou aandurf, kan hulle steeds ’n toets of twee teen hul aartsvyande speel.

“As ’n mens deur jou optimisme-bril se lense na die situasie kyk, kan die Bokke seker in Junie na Nieu-Seeland toer. Maar ek hoop van harte dat hulle deel van die Rugbykampioenskap sal bly,” het Parsons gesê.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

23 Kommentare

jongste oudste gewildste
Johan

Bokke moet gemeet word teen bestes. Is AB nog steeds die beste? Nie te goed gevaar in laaste wedstryde nie

Anel

Dit gaan vir hulle oor die geld wat hulle gaan verloor itv uitsending. Dit gaan nie om teen die Bikke te speel nie.

Jack Russ1

Hulle moet nou besluit wat hulle soek. Voor die sprake van die 6 nasies wou hulle gehad het dat SA uitgeskop moet word aangesien die lang vlugte hulle so vreeslik uitput.

Nou is daar sprake dat hulle drome bewaarheid gaan word, en nou moet SA weer bly

Ek dink die dat SA nie meer in die SuperRugby speel nie het hulle laat sien hoeveel geld hulle verloor en nou probeer hulle om te keer dat nog geld verlore gaan

Christo

Beide SA en NZ se rugby sal swakker word as hierdie 2 al hoe minder teen mekaar speel. Die bewyse is reeds daar nou dat daar nie meer aan die Super rugby reeks deelgeneem word nie. As SA aanhoudend teen Skotland, Wallis, Frankryk moet speel en nou en dan teen Engeland en Ierland, sal dit beslis negatief wees vir SA.

krodedil

Gaan die Bokke nog rugby speel in 2025?
Niemand wil meer teen ‘n blygemaakte kwota span speel nie.