Klag teen burgemeester oor ‘peperduur verjaardagpartytjie’

Andrina Matsemela, burgemeester van die Mogalakwena-munisipaliteit. (Foto: Mogalakwena-munisipaliteit)

Die burgerregtegroep AfriForum het Woensdag strafregtelike klagte teen Andrina Matsemela, burgemeester van die Mogalakwena-munisipaliteit, asook Charles Malema, hoof- finansiële beampte van dié munisipaliteit, by die Mokopane-polisiestasie in Mokopane (Potgietersrus) ingedien.

Die klagte kom ná bewerings dat Matsemela verlede jaar sowat R1,5 miljoen munisipale geld aan haar verjaardagpartytjie bestee het.

AfriForum eis dat die polisie die bewerings ondersoek om vas te stel of Matsemela en Malema hulle onder meer aan korrupsie skuldig gemaak het.

Die ouditeur-generaal se jaarlikse munisipale ouditverslag vir 2017-’18 het getoon dat munisipaliteite se ongemagtigde, onreëlmatige, vrugtelose en verkwistende uitgawes tot R122 miljard toegeneem het.

“Dié verslag dui verder aan dat die Mogalakwena-munisipaliteit die tweede grootste oortreder ten opsigte van oorbesteding is. Dié munisipaliteit het ʼn verbysterende R1,12 miljard meer as sy begroting bestee,” het Natasha Venter, veldtogbeampte by AfriForum se teenkorrupsie-eenheid, gesê.

“Munisipale beamptes kan nie langer toegelaat word om belastingbetalers se geld só te vermors nie. Daarom beskou AfriForum hierdie aantygings teen Matsemela in ʼn baie ernstige lig en verwag van die polisie om die saak noukeurig te ondersoek. Ons sal ook die saak dophou en gereeld verneem na die vordering van die polisie-ondersoek.”

David Rule, AfriForum se koördineerder vir Limpopo, het gesê dienslewering in die munisipale distrik is uiters swak en daar was al vantevore bewerings van korrupsie en onbekwaamheid teen die burgemeester.

“AfriForum staan saam met gemeenskappe om hierdie soort wanbesteding uit die weg te ruim. Indien Matsemela munisipale geld gebruik het om haar verjaardagpartytjie te finansier, bewys dit dat sy geen agting vir die inwoners in die Mogalakwena-distrik het nie, aangesien R1,5 miljoen baie beter aangewend kon word om dienste te lewer,” het Rule gesê.

Malesela Selokela, munisipale woordvoerder, het die bewerings as twak bestempel.

“Wie beweer, moet bewys. Die burgemeester het nie daardie bedrag geld bestee nie,” het Selokela gesê.

Hy het gesê die bewerings word al sedert September verlede jaar gemaak en dat daar tot dusver geen bewyse van die sogenaamde wanbesteding voorgelê is nie.

 

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

22 Kommentare

jongste oudste gewildste
skurweberg

As dit so is dat daar geen bewys is nie, moet hulle bewys dat die geld nog daar is. Skaakmat.

Die ding dat Malema se naam genoem word, bly ‘n ope vraag???

Arno Scheepers

Arme dame, sy wou net haar vriende imponeer met n goeie partytjie. Al die anc kaders doen dit dan.

Sarel

Hierdie Malema is die Finansiele Bestuurder. Natuurlik, wat verwag julle, ons het niks verkeerd gedoen nie

Rubber

Die hebsug, diewery is op ‘n skaal wat Al Capone se rampokkers sal laat bloos. Absoluut gekheid.

Tanya

Bank avc R0.000000 lol