Klagte teen Lesufi stapel op

Panyaza Lesufi. (Foto: Verskaf)

Die VF Plus eis ook dat die Gautengse LUR vir onderwys, Panyaza Lesufi, uit sy pos verwyder moet word indien die bewerings dat hy in ʼn beweerde geheime vergadering tenders aan mense beloof het, waar is.

Maroela Media het vroeër berig Lesufi het glo tydens ’n vergadering stellings gemaak wat daarop dui dat hy inmenging in tenderprosesse aanmoedig. ’n Opname is bekom waarin Lesufi glo onder meer sê dat dit sy verantwoordelikheid as LUR is om te verseker dat tenders “sy mense” tevrede stel. Daar kan ook in dié opname gehoor word hoe die LUR tydens ’n vergadering aan sy span sê dat amptenare betyds moet weet wanneer beheerliggame tenders adverteer.

Die VF Plus gaan nou die Openbare Beskermer (OB) en die Menseregtekommissie (MRK) vra om die beweerde uitlatings te ondersoek. Die party sal die ondersoeke monitor en druk op David Makhura, die premier van Gauteng, plaas om Lesufi af te dank.

“Sou hierdie uitsprake korrek wees, moet Lesufi uit sy pos verwyder word,” sê adv. Anton Alberts, die VF Plus se nasionale voorsitter en ʼn lid van die Gautengse provinsiale wetgewer.

Alberts sê voorts dit lyk of die beweerde uitsprake van Lesufi met verskillende swart rolspelers ook verdelend is aangesien daar sprake is van vooroordeel ten gunste van sekere rassegroepe teenoor ander.

Op grond hiervan word die klagte by die MRK ingedien.

“Openbare tenders mag nie gebruik word om net sekere groepe te bevoordeel nie en moet in terme van bestaande regsnorme hanteer word.”

Die VF Plus het die OB reeds gevra om die Gautengse onderwysdepartement se tenders verlede jaar vir die ontsmetting en diep reiniging van openbare skole te ondersoek. Hy gaan die jongste beweerde onthullings oor Lesufi ook by die OB indien vir ondersoek teen die agtergrond van dié problematiese tenders.

Die Educators Union of South Africa (EUSA) het reeds gevra dat Lesufi opsy staan terwyl die bewerings ondersoek word – of geskors moet word, terwyl Solidariteit versoek het dat Lesufi nie net geskors moet word nie, maar ook aangekla en uit sy amp ontslaan word. Solidariteit meen Lesufi en sy kaders het “plunderaars onder die dekmantel van ʼn regering geword”.

Lesufi het vroeër ontken dat hy enige geheime vergadering belê het om tenders te bespreek.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

18 Kommentare

jongste oudste gewildste
Persheks Adri

Hy lieg so hy glo homself en natuurlik sal hy alles ontken. MRK gaan niks doen nie gggmmmfff. Hoe vinniger dié ou uit is hoe beter laat hy gly SONDER voordele pffft

Androclus

Hulle ontken altyd alles,maar hy weet vir ‘n feit hy het dit gedoen.

Michael

Daar gaan niks met hom gebeur nie

Misky

Sluit sommer die skurk toe!!!! Hy is verantwoordelik vir duisende kinders wat daagliks in haglike omstandighede moet skool gaan

Elize

Hoe vinniger hy verdwyn hoe beter.