Kleindogter nog gereeld by gesiene oupa wat haar glo verkrag

Adv. Gerrie Nel en die familieregprokureur Amorette Gangle het die media Donderdag in Centurion toegespreek oor die saak waarin ’n oupa na bewering sy kleindogter (toe 3) verkrag het. Foto: Reint Dykema

Die burgerregte-organisasie AfriForum is bekommerd dat die vermeende verkragter van ʼn vyfjarige meisie van Pretoria onbeperkte toegang tot die kind het en haar selfs oppas terwyl haar pa uitstedig met sakebesoeke is.

Boonop is die dogtertjie se ma nou van molestering aangekla, ondanks die feit dat die kind reeds twee jaar gelede beweer het haar oupa het haar verkrag. Omdat die kind se ma nou op dié aanklag teregstaan, word sy net toegelaat om haar kind elke twee weke vir ʼn uur lank te sien.

Maroela Media het vroeër berig adv. Gerrie Nel, hoof van AfriForum se eenheid vir privaat vervolgings, het Donderdag op ʼn nuuskonferensie in Centurion gesê hulle het besluit om betrokke te raak omdat die regsproses die slagoffer, wat drie jaar oud was ten tyde van die beweerde verkragting in September 2016, in die steek gelaat het deur nie haar oupa te vervolg nie.

“Dink net daaraan,” het Nel gesê, “die verkragting vind plaas in jou oupa se huis, waar jy veilig moet wees. Jy vertel jou ma en jou pa wat gebeur het. Aanvanklik glo jou pa jou; later het jou pa ʼn ander weergawe.”

Adv. Gerrie Nel sê AfriForum wil help sekermaak daar is geen nalatigheid in die regsproses nie sodat kinders behoorlik beskerm kan word. Foto: Reint Dykema

Die beweerde verkragting het glo aan die lig gekom nadat die dogtertjie haar ouers daarvan vertel het, voordat ʼn sielkundige ook glo die seksuele aanranding tydens ʼn sielkundige regsassessering bevestig het.

Nel sê die sielkundige het dit in haar verslag duidelik gemaak sy is oortuig daarvan dat die verkragting wel gebeur het, maar sy is gedreig deur die pa van die kind deur te sê dit sou haar berou dat sy ooit dié familie teëgegaan het. “Jou lewe gaan nooit weer dieselfde wees ná hierdie verslag wat jy uitgereik het nie,” het die pa van die kind volgens Nel na bewering gedreig.

Hy sê twee weke ná die beweerde voorval het iets by die kleuter se skool gebeur wat haar onderwyseres daarvan oortuig het die kind is gemolesteer. Sy het die ma gebel om haar daarvan te vertel, maar die oupa en pa het volgens Nel afsonderlik by die skoolhoof daarop aangedring dat die onderwyseres onmiddellik afgedank word omdat sy die familie beswadder het.

“Die pa is finansieel afhanklik van die [kind se oupa],” het Nel gesê.

Die naam van die beweerde oortreder kan nie bekend gemaak word nie, maar volgens AfriForum is hy ʼn suksesvolle, gerespekteerde sakeman in die finansiële bedryf.

Die Nasionale Vervolgingsgesag (NVG) het sonder die onderwyseres of die sielkundige se verklarings besluit om nie die kind se oupa te vervolg nie.

Nel sê sy afdeling het besluit “om die regte ding te doen” en die polisie te help om die saak te ondersoek nadat die ma van die kind na hulle toe gekom het. “Ons sê vir die polisie hulle moet ʼn verklaring van die juffrou kry voor die saak aan die aanklaer voorgelê word vir ʼn beslissing [oor of vervolg sal word].

“Nou sê ek vir u: Terwyl ek hier sit, het die polisie nog geensins die juffrou genader of ʼn verklaring van haar gekry nie. Ons het. Mense in my kantoor het die juffrou genader en haar verklaring gekry.”

Hy sê hulle het met die sielkundige en die skoolhoof gepraat. “Ek wil sê, die aanklaers saam met wie ek gewerk het en vir wie ek respek het, sal hierdie saak vervolg as hulle met die juffrou en met die sielkundige beraadslaag.”

Kallie Kriel, AfriForum se uitvoerende hoof, het gesê die organisasie wil toesien die polisie en nasionale vervolgingsgesag doen hul werk so goed dat daar geen rede is om in te gryp nie. Foto: Reint Dykema

Nel meen as daar ʼn behoorlike ondersoek was en alle getuienis in die dossier was toe besluit is om nie die sakeman te vervolg nie, sou hierdie saak al afgehandel gewees het.

Hy vertel die kind se ouers is intussen geskei. Nadat ʼn toesighouer en kurator oor die saak aangestel is, is die ma gevra om die kind aan nog ʼn sielkundige evaluering bloot te stel.

In dié evaluering is die weergawe omgekeer: “Dit wat die oupa gedoen het, is nou wat mamma gedoen het,” het Nel gesê. “En daai saak word toe onmiddellik geopen by die polisie. So, daar is toe nou ʼn saak teen die ma vir die verkragting van haar kind.”

Maar Nel meen: “Daar is sekere goed wat mammas nie kan doen nie. En daar is sekere goed wat oupas kan doen.”

Nel sê toe hulle die verslag ontvang, het hulle dr. Gerhard Labuschagne, wat jare lank hoof van die polisie se forensiese afdeling was en nou in privaat praktyk is, gevra om na die verslag te kyk. “Hy het ongelooflike kritiek teen dié verslag, teen alles in die verslag.”

Labuschagne het voorgestel dat die mense wat by die verslag betrokke is, onmiddellik by die Raad op Gesondheidsberoepe verkla word. Amorette Gangle, familieregprokureur, behartig dié proses namens AfriForum.

Nel glo vas as die saak die aandag gekry het wat dit verdien en wat sy afdeling nou van plan is om dit te gee, sou die vermeende oortreder lankal skuldig bevind gewees het.

Nel sê hulle het aansoek gedoen om ʼn sertifikaat wat hulle die reg sal gee om as aanklaer op te tree. Sodra dit toegestaan word, sal hulle die nodige stappe doen om weer met die klaagster oorleg te pleeg en die saak te herbou sodat die vermeende verkragter vervolg kan word.

Nel het op ʼn vraag van ʼn verslaggewer gesê hy verkwalik die polisie dat hulle die slagoffer in die steek gelaat het deur nie die ondersoek te doen nie “weens die profiel van die beskuldigde”.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

34 Kommentare

jongste oudste gewildste
Avra

Geld wat storm is, maak nie als reg wat krom is. Hoe siek is hierdie siele nie en n kind moet daar onder ly..

Hartseer Mamma

Molestering is een van die moeilikste gevalle om te bewys wanneer n kindjie betrokke is. Dis ook die geval waar mense jou die minste glo. Mag geregtigheid seevier.

Stormrider

Ons verneem graag ook van Gerrie se vordering met ander hoë-profiel sake wat hy bedryf in algemene gemeenskapsbelang.

toy

Jy moet siek wees om so iets aan ‘n kind te doen.

Janet

Nee daar sal seker eers gewag word om met die kind te gebeur wat met klein poppie gebeur het dan moet dit geoot nuus word. Dankie Adv Gerrie Nel