Twee kleuters (2) is Maandag in ’n huisbrand in Amersfoort, Mpumalanga, dood.
Volgens kol. Donald Mdhluli, polisiewoordvoerder, was drie kleuters, ’n tweelingboetie en -sussie en hul niggie, almal twee jaar oud, alleen in die huis toe die brand ontstaan het.
“Die oppasser in wie se sorg die kinders was, het hulle alleen by die huis gelos om iets by die winkel te gaan koop. ’n Kers het in die huis gebrand aangesien daar nie elektrisiteit in dié omgewing is nie.”
Dit is nie duidelik watter soort huis dit was nie.
“Oomblikke later het bure die vlamme gewaar en om hulp geroep. Die oppasser het teruggekeer en aan omstanders gesê dat die kleuters nog in die huis is.
“Die seuntjie kon gered word, maar die meisies het albei gesterf.”
Volgens Mdhluli het nooddienswerkers die twee kleuters op die toneel dood verklaar.
Die seuntjie is na ’n hospitaal gehaas waar hy tans behandel word.
Lt.genl. Semakaleng Manamela, provinsiale polisiekommissaris in Mpumalanga, het ’n beroep op ouers, voogde en oppassers gedoen om kinders nie sonder toesig te laat nie.
Mdhluli sê die saak word ondersoek. ’n Geregtelike doodsondersoek sal ook deur die Amersfoort-polisie gedoen word.
Sjoe, dit is vreeslik hartseer
Uiters onverantwoordelik van die oppasser. So jammer vir die ouers wat die oppasser met hul kinders vertrou het.
Nèè…van wanneer af laat mens ‘n 2 jarige sonder toesig en dit met
‘n brandende kers in dieselfde gebou! Dit is verskriklik.
Sterkte aan die ouers van die kinders, dit is verskriklik
Maak my boos om van sulke onverantwoordelike optredes van volwassenes te lees.
Woedend! Hoe los jy 2 jarige kinders alleen met ‘n brandende kers!!!! :(
Hoe los jy 2 jariges alleen? Punt.
Kan jy dt oorvertel… hoop hul sluit daai oppaser toe
As die land nie so onder Staatskaping deurgeloop het nie, sou daai mense al elektrisiteit gehad het, dan was kerse nie nodig nie. Kla die ANC aan.
Pietertjie, dis presies hoe dit is.
Hoe verskriklik!!!